ހޯމަ ދުވަހު، ވެކްސިންގެ ފުރަތަމަ ޑޯޒް ޖެހީ 70 މީހުން
ފުރަތަމަ ޑޯޒް ޖެހި މީހުންގެ އަދަދު ވަނީ 394،871ށް އަރާފައި
ވެކްސިން ޖެހުމުގެ ގައުމީ ކެމްޕޭންގެ ތެރެއިން ޓްރީ ޓޮޕް ހޮސްޕިޓަލުގައި ވެކްސިން ދިނުމުގެ މަސައްކަތް ކުރިއަށް ދަނީ
ކޮވިޑް-19ން ދިފާއުވުމަށް ވެކްސިންގެ ފުރަތަމަ ޑޯޒް ހޯމަ ދުވަހު ޖަހާފައި ވަނީ 70 މީހުންކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ން ބުނެފިއެވެ.
އެޗްޕީއޭއިން އެންމެ ފަހުން އާންމުކޮށްފައިވާ ތަފާސްހިސާބުތަކަށް ބަލާއިރު ހޯމަ ދުވަހު ވެކްސިންގެ ފުރަތަމަ ޑޯޒް މާލެ ސަރަހައްދުން ޖަހާފައިވަނީ 43 މީހުންނެވެ. އަދި އަތޮޅުތަކުން 27 މީހުން ވަނީ ވެކްސިންގެ ފުރަތަމަ ޑޯޒް ޖަހާފައެވެ. މިއާއެކު ރާއްޖޭގައި ކޮވިޑް ވެކްސިންގެ ފުރަތަމަ ޑޯޒް ޖެހި މީހުންގެ އަދަދު ވަނީ 394،871ށް އަރާފައެވެ.
ހޯމަ ދުވަހު، ވެކްސިންގެ ދެ ވަނަ ޑޯޒް 364 މީހުން ވަނީ ޖަހާފައެވެ. އެއީ މާލެ ސަރަހައްދުން ވެކްސިން ޖެހި 259 މީހުންނާއި އަތޮޅުތަކުން ވެކްސިން ޖެހި 105 މީހުންނެވެ. މިއާއެކު ވެކްސިން ފުރިހަމަކުރި މީހުންގެ އަދަދު ވަނީ 359،758ށް އަރާފައެވެ.
މިއާއެކު މިހާރު ރާއްޖޭގައި ފުރަތަމަ ޑޯޒް ޖެހުމަށްފަހު ދެވަނަ ޑޯޒް ނުޖަހާ ތިބީ 35,113 މީހުންނެވެ.
ކޮވިޑް-19ން ދިފާއުވުމަށް ރާއްޖޭގައި ވެކްސިން ޖަހަން ފަށާފައިވަނީ ފެބްރުއަރީ މަހުއެވެ. އޮކްޓޯބަރ މަހުގެ 3 ވަނަ ދުވަހުން ފެށިގެން ރާއްޖޭގައި އަންނަނީ ބޫސްޓަރ ޑޯޒް ވެސް ދެމުންނެވެ. ނަމަވެސް ބޫސްޓަރ ޑޯޒް ދޭ މީހުންގެ ތަފާސްހިސާބުތަކެއް އެޗްޕީއޭއިން ހާމަކުރަމުންނެއްނުދެއެވެ.
ވެކްސިން ފުރިހަމަ ކުރުމަށް ކަމާބެހޭ ފަރާތްތަކުން ދަނީ ތަކުރާރުކޮށް އިލްތިމާސްކުރަމުންނެވެ. ބަލިން ދިފާއުވުމަށް ވެކްސިން ވަރަށް މުހިންމު ކަމަށާއި، ބައްޔަށް ޕޮޒިޓިވްވި ނަމަވެސް ވެކްސިން ފުރިހަމަކޮށްފައިވާނަމަ ބަލިން މީހާއަށް ކުރާ އަސަރު ކުޑަ ކަމަށް ޑޮކްޓަރުން ވިދާޅުވެއެވެ.
