ފްލައިޓް ޖައްސަން ވަގުތު ނުދިނުމުން އެއަރ އޭޝިއާގެ ދަތުރުތައް ނުފެށިފައި

އެއަރ އޭޝިއާގެ ފްލައިޓްތައް ރާއްޖޭގައި ޖައްސަން ވަގުތު ނުދިނުމުން މެލޭޝިޔާއާއި ރާއްޖެއާ ދެމެދު ދަތުރުތައް ނުފެށިފައިވާ ކަމަށް އެއަރ އޭޝިއާއިން ބުނެފިއެވެ.

މެލޭޝިޔާގެ އެންމެ ބޮޑު އެއަރލައިން ކުންފުނި އެއަރ އޭޝިއާއިން ރާއްޖެ އެމްވީއަށް މައުލޫމާތު ދެމުން ބުނީ ރާއްޖެއަށް ދަތުރުތައް އަލުން ފެށުމަށްޓަކައި ފްލައިޓް ޖައްސަން ގަޑިއަކަށް އެދެފައިވާ ކަމަށެވެ. އެކަމަކު އެކުންފުނީގެ ފްލައިޓްތައް ޖައްސަން ރާއްޖެއިން ގަޑިއެއް ދީފައި ނުވާތީ ދަތުރުތައް ނުފެށިފައިވާ ކަމަށެވެ.

އެއަރ އޭޝިއާއިން ރާއްޖެއަށް ކުރަމުން އައި ދަތުރުތައް މީގެ ކުރިން މެދުކަނޑާލީ ކޮވިޑް-19ގެ ސަބަބުންނެވެ.

މިކަމާ ގުޅިގެން އެމްއޭސީއެލްއިން ރާއްޖެ އެމްވީއަށް ބުނީ ވިންޓަރ ސީޒަން (އޮކްޓޫބަރ-އޭޕްރީލް)ގައި ދަތުރުކުރުމަށް އެދެން ޖެހޭނީ ވަކި މުއްދަތެއްގެ ކުރިން ކަމަށެވެ. އެގޮތުން ޖުލައި މަހުގެ ކުރިން ދަތުރުތައް ކުރުމަށް ގަޑިއަށް އެދެން ޖެހޭނެ ކަމަށް އެމްއޭސީއެލްއިން ބުންޏެވެ. އެމްއޭސީއެލްއިން އިތުރަށް ބުނީ އެއަރ އޭޝިއާއިން ރާއްޖެއަށް ދަތުރުތައް ފެށުމަށް އެދިފައި ވަނީ އެމުއްދަތުގެ ފަހުން ކަމަށެވެ. އެހެންކަމުން ދެން އެކުންފުންޏަށް ދަތުރުކުރަން ގަޑިއެއް ދެވޭނީ އެ މުއްދަތުގެ ތެރޭގައި އެދިފައިވާ ކުންފުނިތަކަށް ވަގުތު ދީފައި، ބާކީ ވަގުތު އޮތްނަމައެވެ.

ރާއްޖޭގެ ފަތުރުވެރިކަމުގެ އެންމެ ތިޔާގި ދުވަސްވަރު ބޯމަތިވެފައި ވާއިރު، ގިނަ ޤައުމުތަކަކުން މިހާރު ވަނީ ރާއްޖެއަށް ދަތުރުތައް ފަށާފައެވެ. މިއާއެކު ރާއްޖެއަންނަ ފަތުރުވެރިންގެ އަދަދު މިހާރު ވަނީ ކޮވިޑްގެ ކުރިން އަންނަ ވަރަށްވުރެ ނިސްބަތުން ބަލާނަމަ އިތުރުވެފައެވެ. ކޮވިޑްގެ ކުރިން އެވްރެޖްކޮށް ދުވާލެއްގެ މައްޗަށް 4،500 ފަތުރުވެރިން ރާއްޖެ އަންނައިރު، މިހާރު އެވްރެޖްކޮށް ދުވާލެއްގެ މައްޗަށް 5،000 ފަތުރުވެރިން ރާއްޖެ ޒިޔާރަތްކުރެއެވެ.

މީގެ އިތުރުން އިއްޔެ އެކަނިވެސް ވެލާނާ އިންޓަރނޭޝަނަލް އެއަރޕޯޓަށް 76 ބައިނަލްއަގްވާމީ ދަތުރު ކޮށްފައިވެއެވެ. އަދި ރާއްޖޭގެ އެތެރޭގެ އުދުހުންތަކުގައި އިއްޔެ 41 ދަތުރު ކޮށްފައިވެއެވެ. ހަމަ އެހެންމެ 8 ޖެޓުގެ އިތުރުން އެއް ކާރގޯ ފްލައިޓު ވެސް އިއްޔެ ވަނީ ވެލާނާ އިންޓަރނޭޝަނަލް އެއަރޕޯޓަށް ދަތުރުކޮށްފައެވެ.

އެއަރ އޭޝިއާއަކީ އަގުހެޔޮ ދަތުރުތައް ކުރުމުގައި ދުނިޔޭގެ އެންމެ ނަން މަޝްހޫރު އެއް ކުންފުންޏެވެ. މެލޭޝިޔާ ސަރުކާރުގެ އެހީއާއެކު 1996 ގައި ދަތުރުތައް ފެށި މިކުންފުނިން އަންނަނީ ދުނިޔޭގެ 25 ގައުމެއްގެ 165 މަންޒިލަކަށް ދަތުރުތައް ކުރަމުންނެވެ. އަދި ކޮވިޑް-19 އައުމުގެ ކުރިން، 2019 ވަނަ އަހަރު، 20،000 މުވައްޒަފުންނާއެކު އެއަރ އޭޝިއާއިން ވަނީ ސާފު ފައިދާގެ ގޮތުގައި 354 މިލިއަން ޑޮލަރު ހޯދާފައެވެ.