އެމެޖެންސީގައި ފްލައިޓް ޖެއްސުމުން 20 މީހުން ފިލައިފި
ފިލި މީހުންގެ ތެރެއިން 11 މީހުން ވަނީ ހައްޔަރުކޮށްފައި
އެމެޖެންސީގައި މަޔޯކާ އެއާޕޯޓަށް ޖެއްސި ފްލައިޓް
އެމެޖެންސީގައި ފްލައިޓް ޖެއްސުމުން ފްލައިޓުން ދަތުރުކުރި ފަސިންޖަރުންގެ ތެރެއިން 20 މީހުން ފިލައިފިއެވެ.
މޮރޮކޯ އިން ފުރައިގެން ތުރުކީއަށް ދަތުރުކުރަމުން ދިޔަ ފްލައިޓު އެމެޖެންސީގައި ޖެއްސީ ސްޕޭނުގެ މަޔޯކާ އެއާޕޯޓަށެވެ. ފްލައިޓުން ފަސެންޖަރުން ފިލުމުން ސްޕެއިންގެ އެންމެ ބާރުބޮޑު އެއާޕޯޓުތަކުގެ ތެރޭގައި ހިމެނޭ އެ އެއާޕޯޓު ބަންދުކުރަން ޖެހުނެވެ.
ސްޕެއިންގެ ފުލުހުން ބުނީ ފިލި މީހުންގެ ތެރެއިން 11 މީހަކު މިހާރު ހައްޔަރުކޮށްފައިވާ ކަމަށެވެ. އަދި ފްލައިޓް އެމެޖެންސީކޮށް ޖައްސަން ޖެހުނީ ފްލައިޓުން ދަތުރުކުރި ފަސިންޖަރަކަށް ޑަޔެބެޓިކް ކޯމާއެއް ދިމާވުމުން ކަމަށް ފުލުހުން ބުންޏެވެ.
ފުލުހުން ބުނީ ފަސިންޖަރުން ފިލާފައިވަނީ ޑަޔެބެޓިކް ކޯމާ ދިމާވި ފަސެންޖަރު ބޯޓުން ބޭލުމުގެ މަސައްކަތް ކުރަނިކޮށް ކަމަށެވެ.
ޑަޔެބެޓިކް ކޯމާ ދިމާވެގެން ހޮސްޕިޓަލަށް ގެންދިޔަ ޕަސެންޖަރުގެ އެއްވެސް މައްސަލައެއް ނެތް ކަމަށް ޑޮކްޓަރުން ބުނުމާއެކު އޭނާ ވަނީ ހޮސްޕިޓަލުން ދޫކޮށްލާފައެވެ. އެއާއެކު ސްޕެއިންގެ ފުލުހުން ވަނީ އޭނާވެސް ހައްޔަރުކޮށްފައެވެ. އަދި އޭނާއާއެކު ހޮސްޕިޓަލަށްދިޔަ އެހީތެރިޔާ ވީ ތަނެއް ނޭނގޭ ކަމަށް ފުލުހުން ބުންޏެވެ. ފުލުހުން ބުނީ އޭނާއާއެކު ހޮސްޕިޓަލަށްދިޔަ އެހީތެރިޔާ ހޯދުމުގެ މަސައްކަތްވެސް މިހާރު ކުރަމުން އަންނަ ކަމަށެވެ.
މި ހާދިސާއާ ގުޅިގެން މަޔޯކާ އެއާޕޯޓަށް ދާން އޮތް 13 ފްލައިޓެއް ޖައްސަން ޖެހުނީ އެހެން އެއާޕޯޓްތަކަށެވެ. އަދި ފުރަން ހަމަޖެހިފައި އޮތް 16 ފްލައިޓް ޑިލޭވިއެވެ.
