ހއ. އުތީމު ހުޅަނގުފަރާތު ތުނޑިން ފެނުނު, އާސާރީ ވަޅެއް ކަމަށް ބެލެވޭ ވަޅު, ބޮޑުތަކުރުފާނު ހަނދާނީ މަރުކަޒުގެ ބެލުމުގެ ދަށަށް ގެންގޮސްފައިވާ ކަމަށް އުތީމު ކައުންސިލުން ބުނެފިއެވެ.

މި ވަޅު އުތީމު ދޫނި ތުނޑިން ފެނިފައިވަނީ މިދިޔަ މަހުގެ 27 ވަނަ ދުވަހު އެވެ. އެ ސަރަހައްދަކީ ބޮޑުތަކުރުފާނު ތުއްޕުޅުއިރު ދޫނި ހިއްޕަވަން އުޅުއްވި ސަރަހައްދު ކަމަށް ބުނާ ސަރަހައްދެވެ. އަދި ސަރަހައްދުން އެ ވަޅު ފެނުނީ, އެ ސަރަހައްދު ވަރަށް ބޮޑަށް ގިރާފައި ވަނިކޮށެވެ.

އުތީމު ކައުންސިލުން ބުނީ، އުތީމު ދޫނިތުނޑި ސަރަހައްދުން ފެނިފައިވާ, އާސާރީ ވަޅެއް ކަމަށް ބެލެވޭ މި ވަޅު (ގައުމީ ތަރިކައާބެހޭ މަރުކަޒުގެ ލަފާގެމަތިން) ބޮޑުތަކުރުފާނު ހަނދާނީ މަރުކަޒުގެ ބޭފުޅުންނާއި, އުތީމު ކައުންސިލް, އަދި އުތީމު ޕޮލިސް ޑެސްކްގެ އެހީތެރިކަމާއެކު ވަނީ ރައްކާތެރިކަމާއެކު އެސަރަހައްދުން ނަގާފައި ކަމަށެވެ. އަދި ބޮޑުތަކުރުފާނު ހަނދާނީ މަރުކަޒުގެ ބެލުމުގެ ދަށުގައި ރައްކާތެރި ކުރެވިފައި ކަމަށެވެ.

މިކަމުގައި އެހީތެރިކަން ދިން ހުރިހާ ފަރާތްތަކަށް ކައުންސިލުން ޝުކުރު އަދާކުރިއެވެ.

ހިރިގަލުން ހަދާފައިވާ އާސާރީ ވަޅެއް ކަމަށް ބެލެވޭ މި ވަޅަކީ 500 އެއްހާ އަހަރުވެފައިވާ ވަޅެއް ކަމަށް ތަޖުރިބާކާރުން ލަފާކުރެއެވެ.