ކޮވިޑް-19ގެ ބަލިމަޑުކަމަށްފަހު ރާއްޖެއަންނަ ފްލައިޓްތަކުގެ އަދަދު ބޮޑުތަނުން އިތުރުވެއްޖެއެވެ.

އެމްއޭސީއެލްގެ އެއަރ ޓްރެފިކް މެނޭޖެމެންޓުން ރާއްޖެ ޓީވީވީއަށް މައުލޫމާތު ދިން ގޮތުގައި ކޮވިޑަށްފަހު ރާއްޖެ އަންނަ ފްލައިޓުތަކުގެ އަދަދު ވަނީ ގާތްގަނޑަކަށް 20 އިންސައްތަ އިތުރުވެފައެވެ.

ރާއްޖެ އަންނަ ފްލައިޓްތައް އިތުރުވުމުގެ ސަބަބުން ޕާރކް ކުރުމުގައި ދިމާވެދާނެ ދަތިތަކަކަށް ވިސްނައި އެމްއޭސީއެލްއިން މިހާރު ވަނީ ވެލާނާ އިންޓަނޭޝަނަލް އެއަރޕޯޓުގައި ޕާރކް ކުރެވޭނެ އިތުރު ޖާގަ ހަދާފައެވެ. ގިނަ އަދަދެއްގެ ފްލައިޓްތަކެއް އެއްފަހަރާ ޕާރކް ކޮށްފައި ބެހެއްޓުމުގެ ސަބަބުން ރާއްޖެއަށް ލިބެމުންދާ އާމްދަނީ އިތުރުވެގެންދާނެއެވެ.

ކޮންމެ އަހަރެއްގެ ނޮވެމްބަރ މަހުން ފެށިގެން މާރޗް މަހާއި ހަމައަށް ރާއްޖެއަށް ގިނަ އަދަދެއްގެ ފަތުރުވެރިން ޒިޔާރަތް ކުރާއިރު، އެއަރޕޯޓްގައި ފްލައިޓް ޖެއްސުމުގެ އިތުރުން, ޕާރކް ކުރުމުގެ މައްސަލަތައް މީގެ ކުރިން ވަނީ ދިމާވެފައެވެ. އެކަމަކު އެމްއޭސީއެލްއިން ބުނީ މިފަހަރު އެމައްސަލަތައް ވަރަށް ބޮޑަށް ހައްލުވެގެންދާނެ ކަމަށެވެ. އެގޮތުން ހުޅުލޭ އެއަރޕޯޓުގެ އިތުރުން މާފަރު، ދަރަވަންދޫ، މާމިގިލި އަދި ކުޑަހުވަދޫ އެއަރޕޯޓުގައިވެސް ޕްރައިވެޓް ޖެޓްތައް ޕާރކް ކުރުމުގެ ނިޒާމު ހަމަޖެހިފައިވާ ކަމަށް ބުނެއެވެ.

ގިނަ އަދަދެއްގެ ފްލައިޓްތައް މިހާރު ރާއްޖެ އަންނައިރު، އެއަރޕޯޓުގައި ފްލައިޓު ޖައްސާނެ ޖާގަ ނެތިގެން ފްލައިޓްތައް މަޑުކުރަން ޖެހުމުގެ މައްސަލައަށް އަދިވެސް މުޅިއަކުން ހައްލެއް ނާދެއެވެ.

މީގެ މައިގަނޑު ސަބަބަކަށްވެފައި އޮތީ ރާއްޖޭގެ އެއަރޕޯޓަށް ނުކަތާވަރަށް ގިނަ އަދަދެއްގެ ފްލައިޓުތަކެއް ރާއްޖެ އައުމެވެ. ގިނަ ފްލައިޓުތައް ރާއްޖެ އަންނަނީ ދުވާލުގެ ވަގުތުތަކުގައެވެ. އެހެންކަމުން ދުވާލު ގަޑީގައި ރަންވޭތައް ބާރުބޮޑުކޮށް ފެނުނު ނަމަވެސް ރޭގަނޑު ގަޑީގައި ރަންވޭތައް ފެންނަނީ މުޅިންހެން ހުސްކޮށެވެ. އެމްއޭސީއެލްއިން ބުނީ ރޭގަނޑުގެ ވަގުތުގައި ރާއްޖެ އަންނަން ބޭނުންވާ ފްލައިޓުތަކަށް ޕާރކިންގެ ދަތިތަކަކާއި ކުރިމަތިލާން ނުޖެހޭނެ ކަމަށެވެ.

ރާއްޖޭގެ ބޯޑަރު ހުޅުވާލުމާއެކު ގިނަ އަދަދެއްގެ ފަތުރުވެރީން ރާއްޖެ ޒިޔާރަތް ކުރަމުން އަންނައިރު ފަތުރުވެރިކަމުގައި ރާއްޖެއާއި ވާދަކުރާ ބައެއް ގައުމުތަކުގެ ބޯޑަރު އަދިވެސް ނުހުޅުވައެވެ. އެހެންކަމުން އެހުރިހާ ގައުމަކަށް ޒިޔާރަތްކުރަން ބޭނުންވެފައިވާ ފަތުރުވެރީންގެ އަމާޒު މިހާރު ހުރީ ރާއްޖެއާ ދިމާލަށެވެ.

މިފަހުން ރާއްޖެއާއި މޮންގޯލިއާ އާއި ދެމެދު ޗާޓާ ފްލައިޓުތައް ފަށާފައިވާއިރު، އިންޑިއާގެ ދިއްލީއާއި ރާއްޖެއާއި ދެމެދުވެސް ވަނީ ދަތުރުތައް ފަށާފައެވެ.