ފައިޒަރއިން ކޮވިޑަށް އުފެއްދި ބޭސް ވިއްކުމަށް 90 ގައުމަކާ ވާހަކަދައްކަނީ

ކޮވިޑް ބަލީގައި ބޮޑުވަރުވާ މިންވަރު 89 އިންސައްތަ ދަށްކޮށްދޭ ބޭސް ވިއްކުމަށް ފައިޒަރ އިން 90 ގައުމަކާ ވާހަކަދައްކަމުންދާކަމަށް އެކުންފުނީގެ ޗީފް އެގްޒެކެޓިވް އޮފިސަރ އަލްބަރޓް ބައުލާ ވިދާޅުވެއްޖެއެވެ.

"ޕެކްސްލޮވިޑް"ގެ ނަން ދެވިފައިވާ މި ގުޅަ ބޭހުގެ އަގު ފައިޒައިން ކަނޑައަޅާނެކަމަށް ބެލެވެނީ ފައިޒަރ އާ ވާދަވެރި މާރކް އެންޑް ކޯއިން އުފައްދާފައިވާ އެންޓިވައިރަލް ބޭހާއި އެއްވަރެއްގެ އަދަދެއްގައެވެ. މާރކް އިން އުފެއްދި މޮލްނުޕިރިއަވްރް ވިއްކަމުންދަނީ 700 ޑޮލަރަށެވެ. އެއީ ފަސް ދުވަހުގެ މުއްދަތަށް ނަގާ ބޭހެކެވެ.

ފައިޒަރއިން ޓެސްޓު ކޮށްފައިވާ ބޭހުން ކޮރޯނާ ވައިރަސް ހަށިގަޑުގެ ތެރޭގައި އިތުރުވުމަށް ބޭނުންވާ އެންޒައިމެއް ބްލޮކް ކުރެއެވެ. މިގޮތުން، އެހެން އެންޓިވައިރަލް ގުޅަ ބޭހެއް ކަމުގައިވާ ރިޓޯނަވަޔަރ އާއިއެކު ބޭނުން ކުރުމުން، މިބޭސް ހަށިގަޑުގެ ތެރޭގައި ގިނަ ވަގުތު ދެމިހުރެއެވެ. މިބޭސްވެސް ބޭނުން ކުރަންޖެހެނީ 5 ދުވަހުގެ މުއްދަތަށެވެ. އެއީ ކޮންމެ ދުވަހަކު 2 އިރު އިރަކު 3 ގުޅައެވެ.