ވިލިމާލޭގައި ދުއްވާ ބެޓެރީ އުޅަނދުތައް މާލޭ ސިޓީ ކައުންސިލުގައި ރަޖިސްޓްރީކުރަންޖެހޭ ގޮތަށް ނިންމައިފިއެވެ.
އެކަމާއި ގުޅިގެން ސިޓީ ކައުންސިލުން ކޮށްފައިވާ އިއުލާނެއްގައި ބުނެފައިވަނީ ވިލިމާލޭގައި ދުއްވާ ބެޓެރި ވެހިކަލްތަކުގެ އަދަދު އިތުރުވަމުންދާތީ، ވެހިކަލްތަކުގެ ދަފްތަރެއް މާލެ ސިޓީ ކައުންސިލްގައި އެކުލަވާލަން ބޭނުންވާ ކަމަށެވެ.
އެހެންކަމުން ވިލިމާލޭގައި ދުއްވާ ބެޓެރި ވެހިކަލްތައް ނޮވެމްބަރ މަހުގެ 4 ވަނަ ދުވަހުން ފެށިގެން 15 ދުވަހުގެ ތެރޭގައި ކައުންސިލްގައި ރަޖިސްޓްރީވުމަށް ވަނީ އަންގާފައެވެ.
އިއުލާނުގައި އިތުރަށް ބުނެފައިވަނީ އެ މުއްދަތުގެ ފަހުން ވިލިމާލެއަށް އަރުވާ ބެޓެރި ވެހިކަލްތައް ވެސް ކައުންސިލްގައި ރަޖިސްޓްރީކުރަން ޖެހޭނެ ކަމަށެވެ. މާލޭ ސިޓީ ކައުންސިލުގެ ވެބްސައިޓުގައި، އެކަމަށް ކަނޑައެޅިފައިވާ ލިންކުން އުޅަނދު ރަޖިސްޓްރީ ކުރެވޭނެއެވެ.
ވިލިމާލެ އަކީ މާލޭގެ އެހެން އަވަށްތަކާއި ޚިލާފަށް ހިތްފަސޭހަގޮތަކަށް އޮންނަ އަވަށެވެ. ބެޓެރީ އުޅަނދު ނޫން އެހެން އުޅަނދު ދުއްވުން ވިލިމާލޭގައި އޮންނަނީ މަނާކޮށްފައެވެ.
