އެރައިސް މަޝްރޫއާއެކު ކުޅުދުއްފުށިން ކޮންމެ އަހަރަކަށް ތެލަށް ކުރާ ހޭދައިން 5.3 މިލިއަން ރުފިޔާ ސަލާމަތް ކުރެވޭނެ

އެރައިސް މަޝްރޫއުގެ ދަށުން ކުޅުދުއްފުށީ ސިޓީގައި ގާއިމުކުރާ ސޯލަރ ހަކަތައިގެ ނިޒާމުގެ ގާއިމްކުރުމަށް ބީލަމަށް ހުޅުވާލުމުގެ މަސައްކަތް ފަށައިފިއެވެ.

އެންވަޔަރަމަންޓް މިނިސްޓްރީން ބުނީ މި މަޝްރޫއުގެ ދަށުން އަހަރަކަށް 5.3 މިލިއަން ރުފިޔާ ތެލަށް ކުރާ ހޭދަކުޑަކުރެވޭނެ ކަމަށެވެ.

އެންވަޔަރަމަންޓް މިނިސްޓްރީން ބުނެފައިވަނީ، މި މަޝްރޫއުގައި މިހާރު ކުރިއަށް ދަނީ ބީލަމުގެ މަރުހަލާ ކަމަށާއި، މި މަޝްރާއުގައި ކުރުމަށް ފްލޭން ކޮށްފައިވާ މަސައްކަތްތަކުގެ ތެރޭގައި، 1.5 މެގަވޮޓް ސޯލަރ ޕީވީގެ ނިޒާމުގާއިމް ކުރުމާއި، 2 މެގަ ވޮޓް އަވަރގެ ބެޓަރީ އެނަރޖީ ސްޓޯރޭޖް ސިސްޓަމް ޤާއިމް ކުރުމާއި، ކަރަންޓު ވިއުގަ އަޕްގްރޭޑް ކުރުން ހިމެނޭ ކަމަށެވެ.

މީގެ އިތުރުން، މިމަޝްރޫއުގެ މަސައްކަތްތަށް ނިމުމުން، 2020 ވަނަ އަހަރުގެ ޕީކް ޑިމާންޑްގެ 58 އިންސައްތަ ރަށުގެ ޕީކް ލޯޑް ސޯލަރ ހަކަތައިން ދެވޭނެ ކަމަށް މިނިސްޓްރީއިން ބުނެއެވެ. އަދި 2.5 މިލިއަން ޔުނިޓް ކަރަންޓު ސޯލަރ ހަކަތައިން އުފެދޭނެ ކަމަށާއި، 6.6 ލައްކަ ލީޓަރުގެ ތެޔޮ މަދުކުރެވޭނެ ކަމަށްވެސް ބުނެފައިވެއެވެ.

މީގެ އިތުރުން އަހަރެއްގެ މައްޗަށް 5.3 މިލއަން ދިވެހިރުފިޔާ ތެލަށްކުރާ ހަރަދުން ކުޑަ ކުރެވޭނެ ކަމަށެވެ.

މިމަޝްރޫއުގެ ދަށުން 1732 މެޓްރިކް ޓަނުގެ ޖައްވަށް ދޫކުރާ ވިހަ ގޭސް ދައްކުރެވޭނެއެވެ. މިއީ 69،280 ގަހުން އަހަރަކަށް ދައްކޮށްދޭ ކާބަންއާއި އެއްވަރުގެ އަދަދެކެވެ.

އެކްސަލރޭޓިންގ ރިނިއުވަބަލް އެނަރޖީ އިންޓެގްރޭޝަން އެންޑް ސަސްޓެއިނަބަލް އެނަރޖީ (އެރައިސް) މަޝްރޫޢު މައިގަނޑު ބޭނުމަކީ ރާއްޖޭގައި ބޭނުން ކުރެވޭ އިއާދަކުރަނިވި ހަކަތައިގެ ނިސްބަތް އިތުރުކޮށް، ރަށްތަކުގެ ކަރަންޓު ވިއުގަތައް ޒަމާނީ ފެންވަރަށް ތަރައްޤީކުރުން ކަމަށް އެންވަރރަމަންޓް މިނިސްޓްރީން ބުނެފައިވެއެވެ.