ރައީސް މުއިއްޒު ބޭނުންފުޅުވާ ގޮތަށް ބްލޮކް ގްރާންޓް މުރާޖައާ ކުރައްވާއިރު، ކައުންސިލްތަކަށް މަސައްކަތްކުރަން ލިބޭ ފައިސާ މަދުވާނެ: އާތިފު
ބްލޮކް ގްރާންޓް ފޯރުކޮށް ދިނުމަށްޓަކައި ކަނޑައަޅުއްވާފައިވާ ފިސްކަލް ފޯރމިއުލަރ ގައިވާ ގޮތުން އާބާދީ ކުޑަ ރަށްތަކަށް ލިބޭވަރު މަދު ކަމަށް ރައީސް ވިދާޅުވި
ކުޅުދުއްފުށީ މޭޔަރު މުހައްމަދު އާތިފް ވާހަކަދައްކަވަނީ
ބްލޮކް ގްރާންޓުގެ ފިސްކަލް ފޯރމިއުލާ ރާއީސް ޑރ. މުހައްމަދު މުއިއްޒު ބޭނުންފުޅުވާ މުރާޖައާ ކުރައްވާއިރު، ކައުންސިލްތަކަށް މަސައްކަތްކުރަން ލިބޭ ފައިސާ މަދުވާނެ ކަމަށް ކުޅުދުއްފުށި ސިޓީ މޭޔަރު މުހައްމަދު އާތިފް ވިދާޅުވެއްޖެ އެވެ.
ރައީސް މުއިއްޒު އެކްސްގައި ވިދާޅުވީ ޤާނޫނު ނަންބަރު 7/2010 (ދިވެހިރާއްޖެހޭ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނުގެ 79 ވަނަ މާއްދާ)ގެ ދަށުން ކައުންސިލްތަކަށް ސަރުކާރުން ދޭ ޢާންމު ހިލޭ އެހީގެ ފައިސާ (ބްލޮކް ގްރާންޓް) ފޯރުކޮށްދިނުމަށްޓަކައި ކަނޑައަޅުއްވާފައިވާ ފިސްކަލް ފޯރމިއުލަރ ގައިވާ ގޮތުން އާބާދީ ކުޑަ ރަށްތަކަށް ލިބޭވަރު މަދެވެ. ނަމަވެސް، އާބާދީ ކުޑަ ނަމަވެސް، ބިމުގެ ގޮތުން ތަނަވަސް ރަށްތަކުގައި މުނިސިޕަލް މަސައްކަތް މަދެއް ނޫން ކަމަށެ އެވެ.
އެހެން ކަމުން، ބްލޮކް ގްރާންޓު ގެ ފިސްކަލް ފޯރމިއުލަރ މިހާރު ކަނޑައަޅުއްވާފައިވާ ގޮތުން، އެ ކައުންސިލްތަކަށް ގެއްލުން ވާތީ ފިސްކަލް ފޯރމިއުލާ މުރާޖާކުރުމުގައި ރަށުގެ ބޮޑުމިނަށް ރިއާޔަތްކުރެވޭ ގޮތަށް ބަދަލު ކޮށް، 2026 ވަނަ އަހަރުގެ ބަޖެޓު ހުށަހަޅާއިރު މި ބަދަލާ އެކު ހުށަހެޅުމަށް ވާނީ ނިންމާފައި ކަމަށެއެވެ.
ރައީސް މުއިއްޒުގެ މި ނިންމެވުމަށް ރައްދު ދެއްވަމުން އާތިފް ވިދާޅުވެފައިވަނީ، މިހާރު ޤާނޫނު އޮތްގޮތުން ދިވެހިރާއްޖޭގެ އާމްދަނީގެ 5 އިންސައްތަ ރައްޔިތުން ދެނީ ކައުންސިލްތަކުގެ މަސައްކަތަށް ކަމަށާއި އަނެއް 95 އިންސައްތަ ރައްޔިތުން ދެނީ މައި ސަރުކާރަށް ކަމަށްވާއިރު މި 2 ބަޔަކީވެސް ރައްޔިތުންގެ ފައިސާ ކަމަށެވެ.
އެހެންކަމުން ރައީސުލްޖުމްހޫރިއްޔާ ޑރ. މުއިއްޒު މި ވިދާޅުވަނީ ދިވެހިރައްޔިތުންގެ މާލިއްޔާއިން ކައުންސިލްތަކަށް ދިނުމަށް ކަނޑައަޅާފައި އޮތް ފައިސާއަށް އިތުރު ގޮތްގޮތް ހަދާވާހަކަ ކަމަށާއި ރައީސުލްޖުމްހޫރިއްޔާގެ މަސައްކަތަކަށް ވާންވީ ސަރުކާރަށް ރައްޔިތުން ދީފައޮތް %95 އިން ރައްޔިތުންނަށް އިތުރު މަންފާއެއް ކުރާނެ ސިޔާސަތުތަކެއް އެކަށައެޅުން ކަމަށް އާތިފް ވިދާޅުވި އެވެ.
މިހާރު އެ ހުށަހަޅާ ބަދަލުގެ ސަބަބުން، ދައުލަތުގެ ބަޖެޓުން ރަށްރަށުގެ ކައުންސިލްތަކަށް ލިބޭ ބްލޮކް ގްރާންޓްގެ އިންސައްތަ އެއްވެސް ވަރަކަށް ބޮޑު ނުވާ ކަމަށް ވިދާޅުވަމުން އާތިފް ވިދާޅުވެފައިވަނީ، އެ 5 އިންސައްތަ ބޮޑުނުކޮށް، މި ބަދަލު ގެނެސްފިނަމަ ބްލޮކް ގްރާންޓްގެ ގޮތުގައި ލިބޭ ފައިސާއިން ކައުންސިލްތަކަށް މަސައްކަތްކުރަން ލިބޭ ފައިސާގެ ތެރެއިން 5 އިންސައްތަ އުނިވެގެންދާނެ ކަމަށެ އެވެ.
ސަރުކާރުގެ އިހްލާސްތެރިކަމެއް ހުރީވިއްޔާ މިހާރު ޤާނޫނުގައި ކައުންސިލްތަކަށް ދައުލަތުގެ އާމްދަނީގެ ތެރެއިން ދޭންޖެހޭގޮތަށް ކަނޑައަޅާފައިއޮތް %5 ބޮޑުކޮށްދެއްވާ، ނުވަތަ އަންހެނުންގެ ތަރައްޤީއަށް މަސައްކަތް ކުރާ ކޮމިޓީއަށް މި %5 ގެ ބޭރުން ކޮންމެވެސް އިންސައްތައެއް ދައުލަތުގެ ބަޖެޓުން ހަމަޖައްސަވައިދެއްވާކުޅުދުއްފުށި ސިޓީ މޭޔަރު މުހައްމަދު އާތިފް
އާތިފް ވިދާޅުވެފައިވަނީ އެންމެބޮޑު ކަންބޮޑުވުމަކީ ކައުންސިލަރުންނާއެކު މަޝްވަރާ ކުރުމަށް އެލް.ޖީ.އޭ އިން ބާއްވާފައިވާ ފަނޯއްލަ ދަރުބާރުތަކުގައި އެކުލަވާލާފައިވާ އިސްލާހީ ކަރުދާސްތަކަށް ރިއާޔަތްކުރުމެއްނެތި، މި ސަރުކާރުން ލާމަރުކަޒީ ނިޒާމާގުޅޭގޮތުން ހެއްދެވި ދިރާސާއަށް ބެލުމެއްނެތި ކުއްލި ކުއްލިއަށް ތާކުންތާކު ނުޖެހޭ ގޯސް ބަދަލުތައް ގެންނަވަން ނިންމަވާ އިއުލާން ކުރައްވަމުންދާތީ ކަމަށެ އެވެ.
ރައީސް މުއިއްޒު މިވާހަކަތަކަށް ރައްދު ދެއްވަމުން އިދިކޮޅު ފަރާތްތަކުން ދަނީ ކުރިން މިކަން އޮތް ގޮތް ސޯޝަލް މީޑިއާގައި ހިއްސާކުރަމުންނެ އެވެ. ދިވެހިރާއްޖެހޭ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނަށް ގެންނަން އުޅޭ އިސްލާހާއި ގުޅިގެން އަތޮޅު ކައުންސިލްތައް އުވާލުމަށް ދެކެވެމުންދާ ވާހަކައަށް ގިނަ ބަޔަކު ދަނީ ކަންބޮޑުވުން ފާޅުކުރަމުންނެ އެވެ. އެގޮތުން ބ.އަތޮޅު ކައުންސިލުންވެސް މިކަމާއި ދެކޮޅަށް މާލޭ ގައި މުޒާހަރާ ކުރުމަށް ނިންމާފަ އެވެ.
