ގައުމީ ބީޗް ވޮލީބޯޅަ މުބާރާތް: ޗެމްޕިއަންކަން ޑެންޒޯ/ކޯކޭ އަދި އަރީ/ނާން އަށް

ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން އިންތިޒާމުކޮށްގެން ބޭއްވި ގައުމީ ބީޗް ވޮލީބޯޅަ މުބާރާތުގެ އޯޕަން ޑިވިޝަނުގެ ފިރިހެން ބައިގެ ޗެމްޕިއަންކަން މުޙައްމަދު އަލީ (ޑެންޒޯ) އާއި އަޙްމަދު މުޙައްމަދު (ކޯކޭ) ގެ ޕެއާއިން ހޯދިއިރު، އޯޕަން ޑިވިޝަނުގެ އަންހެން ބައިގެ ޗެމްޕިއަންކަން އައިމިނަތު އަރީޝާ (އަރީ) އާއި އައިޝަތު އިމްތިނާން (ނާން) ގެ ޕެއާއިން ހޯދައިފިއެވެ.

ތިން ޑިވިޝަނަކަށް ބަހާލައިގެން މި އަހަރުގެ މުބާރާތް ކުރިއަށްގެންދިޔައިރު، މި މުބާރާތުގައި ޖުމްލަ 33 ޓީމު ވަނީ ވާދަކޮށްފައެވެ. މި މުބާރާތުގެ އޯޕަން ޑިވިޝަނުގެ ފިރިހެން ބައިގެ ޗެމްޕިއަންކަން ޑެންޒޯ އާއި ކޯކޭގެ ޕެއާއިން ހޯދީ ބުދަ ދުވަހުގެރޭ ހުޅުމާލޭ ރެޑްބުލް ކޯޓުގައި ކުޅުނު ފައިނަލް މެޗުގައި ތަޖުރިބާކާރު ޕެއާ އިސްމާޢީލް ސާޖިދު (ކުޑަކާއްޓޭ) އާއި އަޝްފާގް އާދަމް (އައްކަޅޭ) ގެ ޕެއާ ބަލިކުރުމަށްފަހުއެވެ.

މެޗަކުން ބަލިނުވެ މުބާރާތުގެ ފައިނަލަށް ދަތުރުކުރި ކުޑަކާއްޓޭ އާއި އައްކަޅޭގެ ޕެއާއިން ވަނީ މުބާރާތުގެ ގްރޫޕް ސްޓޭޖުގައި ކުޅުނު މެޗުން ޑެންޒޯ އާއި ކޯކޭގެ ޕެއާ ބަލިކޮށްފައެވެ. އެކަމަކު ބުދަ ދުވަހުގެރޭ ކުޅުނު ފައިނަލު މެޗުގައި ކުޑަކާއްޓޭ އާއި އައްކަޅޭގެ މައްޗަށް ޑެންޒޯ އާއި ކޯކޭގެ ޕެއާ ކުރިހޯދީ ފަހަތުން އަރައި 2-1 ސެޓުން މެޗު ކާމިޔާބުކޮށްގެންނެވެ.

މި މެޗުގެ ފުރަތަމަ ސެޓު ކުޑަކާއްޓޭ އާއި އައްކަޅޭގެ ޕެއާއިން ގެންދިޔައީ 21-18 އިންނެވެ. އެކަމަކު ޖެހިގެން އައި ދެވަނަ ސެޓުގައި ޑެންޒޯ އާއި ކޯކޭގެ ޕެއާއިން މޮޅު ކުޅުމެއް ދެއްކިއިރު، މި ސެޓު ޑެންޒޯ އާއި ކޯކޭގެ ޕެއާއިން ގެންދިޔައީ 21-18 އިންނެވެ. އަދި ނަތީޖާ ނެރެން ކުޅުނު ފަހު ސެޓު ޑެންޒޯ އާއި ކޯކޭ ޕެއާއިން ކާމިޔާބުކުރީ 15-9 އިންނެވެ.

މި ފަހަރުގެ މުބާރާތުގެ ފައިނަލުގައި ޑެންޒޯ އާއި ކޯކޭގެ ޕެއާއިން ކުޑަކާއްޓޭ އާއި އައްކަޅޭގެ ޕެއާ ބަލިކުރިއިރު، ކުޑަކާއްޓޭ އާއި އައްކަޅޭގެ ޕެއާއަކީ އެންމެ ފަހުގެ ޗެމްޕިއަނުންނެވެ. އެގޮތުން އެންމެ ފަހުން 2017 ވަނަ އަހަރު ބޭއްވި ގައުމީ ބީޗް ވޮލީބޯޅަ މުބާރާތުގެ ޗެމްޕިއަންކަން ހޯދައި ކުޑަކާއްޓޭ އާއި އައްކަޅޭގެ ޕެއާއިން ވަނީ ޖެހިޖެހިގެން ނުވަވަނަ ފަހަރަށް މި މުބާރާތް ކާމިޔާބުކޮށްފައެވެ.

މީގެ އިތުރުން މި އަހަރުގެ މުބާރާތުގެ އޯޕަން ޑިވިޝަނުގެ އަންހެން ބައިގެ ޗެމްޕިއަންކަން އަރީ އާއި ނާންގެ ޕެއާއިން ކާމިޔާބުކޮށްފައިވަނީ މެޗަކުން ބަލިނުވެއެވެ. އެގޮތުން ބުދަ ދުވަހުގެރޭ ކުޅުނު ފައިނަލް މެޗުގައި ފާތިމަތު ޖޫޒާން ޒަރީރާއި އައިޝަތު މާޖިދާގެ ޕެއާ އަތުން އަރީ އާއި ނާންގެ ޕެއާ މޮޅުވީ 2-1 ސެޓުންނެވެ.

ފައިނަލު މެޗުގެ ފުރަތަމަ ސެޓު ޖޫޒާން އާއި މާޖިދާގެ ޕެއާއިން 22-20 އިން ކާމިޔާބުކުރި ނަމަވެސް، ޖެހިގެން އައި ދެ ސެޓުގައި އަރީ އާއި ނާންގެ ޕެއާއިން ވަނީ ކާމިޔާބުކޮށްފައެވެ. އެގޮތުން ދެއްކި މޮޅު ކުޅުމާއެކު އެ ދެ ސެޓު އަރީ އާއި ނާންގެ ޕެއާއިން ކާމިޔާބުކުރީ 21-11 އަދި 15-8 އިންނެވެ.

ދެން މި މުބާރާތުގައި ކުރިއަށްދިޔަ 23 އަހަރުން ދަށުގެ އަންހެން ބައިގެ ޗެމްޕިއަންކަން ހޯދީ އައިމިނަތު އަފާފް ނިޒާމާއި ނަރީމާ އިދުރީސް (ނަންނި) ގެ ޕެއާއިންނެވެ. އަފާފް އާއި ނަންނިގެ ޕެއާއިން ވަނީ ފައިނަލުގައި ފާތިމަތު މާހިޔާ އާއި އައިޝަތު ޒައިނާ އިބްރާހީމުގެ މައްޗަށް ސީދާ ދެ ސެޓުން ކުރި ހޯދާފައެވެ. މި މެޗުގެ ސެޓުތައް ދިޔައީ 21-18 އަދި 21-14 އިންނެވެ.

މި އުމުރުފުރާގެ ފިރިހެން ބައިގެ ޗެމްޕިއަންކަން ހޯދީ އަޙްމަދު ނާފިއު އާއި ޝާމިލް މުޙައްމަދުގެ ޕެއާއިންނެވެ. ފައިނަލުގައި މުޙައްމަދު އަމާން އަސްލަމާއި ހަސަން ސަމީހުގެ ޕެއާ އަތުން ނާފިއު އާއި ޝާމިލުގެ ޕެއާ މޮޅުވީ 21-8 އަދި 21-10 އިންނެވެ.

އަދި މި މުބާރާތުގެ 19 އަހަރުން ދަށުގެ ފިރިހެން ބައިގެ ޗެމްޕިއަންކަން ހޯދާފައިބަނީ ހައިލަމް ހަސަން އާއި މާއިޝް އަޙްމަދުގެ ޕެއާއިންނެވެ. އެ ޕެއާއިން ވަނީ ފައިނަލުގައި މައުޒޫން ނިޔާޒާއި ޝާއިން އަބްދުﷲ ގެ ޕެއާ އަތުން 2-1 ސެޓުން މޮޅުވެފައެވެ. މި މެޗުގެ ސެޓުތައް ދިޔައީ 24-26، 21-8 އަދި 15-11 އިންނެވެ.

މި އަހަރުގެ މުބާރާތް ތިން ޑިވިޝަނަކަށް ބަހާލައިގެން ކުރިއަށްގެންދިޔައިރު، މި މުބާރާތް މީގެ ކުރިން ބާއްވަމުން އައީ ހަމައެކަނި އޯޕަން ޑިވިޝަނެއް ކުޅޭ ގޮތަށެވެ. އަދި މި ފަހަރުގެ ގައުމީ ބީޗް ވޮލީބޯޅަ މުބާރާތަކީ ކޮވިޑް-19 ގެ މެދުކެނޑުމަށްފަހު ވީއޭއެމުން މި ގޮތަށް ހުޅުވާލައިގެން ބޭއްވި ފުރަތަމަ މުބާރާތެވެ.