ޒަހާގެ ދުލުން ނޮވެމްބަރު ތިނެއް: ''ދުވަސްތަކެއް ވަންދެން ބިރުން ނުނިދޭ''
ނޮވެމްބަރު ތިނެއްގައި ހޭލެވުނީ ބާރުގަދަ އަޑަކުން
ރައީސް އޮފީހުގެ މިނިސްޓަރު އަދި ކުރީގެ ފިޝަރީޒް މިނިސްޓަރު ޒަހާ ވަހީދު
ނޮވެމްބަރު ތިނެއްގެ އުދުވާނީ ހަމަލާގައި ލިބުނު ބިރުވެރިކަމުން ގިނަ ދުވަސްތަކަކަށް އެކަމުގެ ބިރުވެރިކަން ތަހައްމަލް ކުރަން ޖެހުނު ކަމަށް ރައީސް އޮފީހުގެ މިނިސްޓަރު އަދި ކުރީގެ ފިޝަރީޒް މިނިސްޓަރު ޒަހާ ވަހީދު ވިދާޅުވެއްޖެއެވެ.
ޒަހާ ދިރިއުޅުއްވަމުން ގެންދަވާ މެދުޒިޔާރަތް މަގު، ހ.ހަތިހާގޭގެ ފާރަށް ގިނަ އަދަދެއް ވަޒަން އެރިއެވެ.
ނަސްރުގެ ދުވަހުގެ މުނާސަބަތުގައި އެމްއާރްއެމްއިން ބޭއްވި ކްލަބްހައުސްގެ ޚާއްސަ ސެޝަންގައި އެދުވަހުގެ ތަޖުރިބާ ހިއްސާ ކުރައްވައި ޒަހާ ވިދާޅުވީ އެދުވަހުގެ ބިރުވެރިކަން ހިތަށް ގެނައުމަށް އަދިވެސް އުނދަގޫވާ ކަމަށާއި، ގިނަ ދުވަސްތަކަކަށް ރޭގަނޑު ނިދުމުން މަހުރޫމްވި ކަމަށެވެ. އަދި ނިދީގައި ވެސް އިރުއިރުކޮޅާ ހޭލެވޭކަން ޒަހާ ފާހަގަކުރެއްވިއެވެ.
ޒަހާ ވިދާޅުވީ ނޮވެމްބަރު ތިނެއްގައި ހޭލެވުނީ ބާރުގަދަ އަޑަކުން ކަމަށާއި، އޭރު ބޮޑަށް ހީކުރެވުނީ ނޮވެމްބަރު މަހުގެ 11ށް ސިފައިން ތައްޔާރުވަމުން ދަނީ ކަމަށެވެ. އޭރު އުމުރަކީ 20 އަހަރު ކަމުން ބޮޑަށް ކަންކަން ނުވިސްނޭ ކަމަށް ޒަހާ ވިދާޅުވިއެވެ. އަދި ވިދާޅުވީ ވެގެން އުޅޭ ގޮތެއް ބެލުމަށް ގޭގެ ދޮރުމައްޗަށް ދައްތައާއި ބޭބެއާއެކު ނުކުތް ކަމަށާއި، ބަޑި ހިފައިގެން އައި ބަޔަކު ވެސް ފެނުނު ކަމަށެވެ.
ޒަހާ ވިދާޅުވީ އެމީހުން ދުރުން ފެނުމާއެކު ގެއަށް ވަން ނަމަވެސް ދައްތަ ގެއަށް ވަނީ ވަރަށް ފަހުން ކަމަށެވެ. ދައްތަ ގެއަށް ވަނުމާއެކު ވަޒަން ފާރަަށް އެރިކަމާއި، އެއީ ވަރަށް ބިރުވެރި ވަގުތުކޮޅެއް ކަމަށް ޒަހާ ވިދާޅުވިއެެވެ.
މިސެޝަންގައި ދައުލަތަށް ގިނަ ދުވަހު ހިދުމަތް ކުރެއްވި، އަދި ރައްޔިތުންގެ ޚާއްސަ މަޖިލީހުގައި މުލަކު އަތޮޅު މެންބަރުކަން ވެސް ކުރެއްވި އަނީސާ އަހުމަދާއި، ސަރުކާރަށް ގިނަދުވަހު ޚިދުމަތް ކުރެއްވި އަދި ދިވެހި ބަހަށާ ނޫސްވެރިކަމުގެ ދާއިރާއަށް ގިނަ ގުނަ ޚިދުމަތްތަކެއް ކުރެއްވި އައްބާސް އިބްރާހިމް އަދި ބްރިގޭޑިއާ ޖެނެރަލް ރިޓަޔާޑް އިބްރާހިމް މުހައްމަދު ދީދީ ވަނީ އެދުވަހުގެ ހަދާން އައު ކުރައްވައި މައުލޫމާތު ހިއްސާކުރައްވާފައެވެ.
އެބޭފުޅުން ވިދާޅުވި ގޮތުގައި މިއިން ދުވަހު ވެސް އެފަދަ ބިރުކަމެއް ދެކެފައިނުވާ ކަމަށާއި، އެފަދަ ދުވަހެއް ދެވަނަ ފަހަރަށް ދެކެން ބޭނުން ނުވާ ކަމަށެވެ. އެބޭފުޅުން ވިދާޅުވީ އުދުވާނުގެ ކަންކަން ހަނދާން އާވުމުން މިހާރުވެސް ހިތަަށް ނުތަނަވަސް ލިބޭ ކަމަށެވެ. އަދި ބިރުވެރި ހާލަތެއްގައި ހުރިހާކަމެއް ވެގެންދިޔައީ ވަރަށް އާދަޔާ ޚިލާފު ގޮތަކަށް ކަމަށާއި، މިދުވަސް ފާހަގަކުރުމަކީ ވަރަށް މުހިންމު ކަމެއް ކަމަށް އެބޭފުޅުން ވިދާޅުވިއެވެ.
