ފަހު ވަގުތު ރޮނާލްޑޯ ޔުނައިޓެޑް ސަލާމަތްކޮށްދީފި

ޔުއެފާ ޗެމްޕިއަންސް ލީގުގައި އަންގާރަ ދުވަހުގެރޭ ކުޅުނު މެޗުން އެޓަލާންޓާ އަތުން ފަހު ވަގުތު މެންޗެސްޓާ ޔުނައިޓެޑް ބަލިނުވެ ސަލާމަތްވެއްޖެއެވެ.

އެޓަލާންޓާގެ ދަނޑުގައި ކުޅުނު މެޗު އެއްވަރުވީ 1-1 ގެ ނަތީޖާއަކުންނެވެ.

ފޯރިގަދަ ކުޅުމެއް ފެނިގެންދިޔަ މި މެޗުގެ ވަރަށް ކުރީކޮޅު އެޓަލާންޓާއިން ވަނީ ލީޑު ނަގާފައެވެ. މެޗު ފަށައިގެން 12 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ޔޯސިފް އިލިޗިޗެވެ. އެކަމަކު ފުރަތަމަ ހާފު ނިމުމުގެ ކުރިން ޔުނައިޓެޑުން ނަތީޖާ އެއްވަރުކުރިއިރު، މި ލަނޑު އެ ޓީމަށް ކާމިޔާބުކޮށްދިނީ އިތުބާރު ފޯވާޑް ކްރިސްޓިއާނޯ ރޮނާލްޑޯއެވެ.

މި މެޗުގައި އެޓަލާންޓާއިން ދެވަނަ ފަހަރަށް ލީޑު ނަގާފައިވަނީ ދެވަނަ ހާފު ފަށައިގެން 11 ވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ ޑުވާން ޒަޕާޓާއެވެ. މި މެޗުން ޔުނައިޓެޑް ބަލިނުވެ ސަލާމަތްވީ މެޗުގެ އިތުރު ވަގުތުގައި ރޮނާލްޑޯ ކާމިޔާބުކޮށްދިން ލަނޑުންނެވެ.

މި މެޗުގެ ފަހު ވަގުތު ރޮނާލްޑޯ ޔުނައިޓެޑް ސަލާމަތްކޮށްދިންއިރު، މި ސީޒަނުގެ ޗެމްޕިއަންސް ލީގުގައި ވިޔަރެއާލް އަތުން ޔުނައިޓެޑް މޮޅުވީ ފަހު ވަގުތު ރޮނާލްޑޯ ޖެހި ލަނޑުންނެވެ. އަދި މިދިޔަ މަހު ކުޅުނު މެޗުން އެޓަލާންޓާ އަތުންވެސް ޔުނައިޓެޑް މޮޅުވީ ފަހު ވަގުތު ރޮނާލްޑޯ ޖެހި ލަނޑުންނެވެ. މީގެ އިތުރުން އަންގާރަ ދުވަހުގެރޭ ކުޅުނު މެޗުގައި ރޮނާލްޑޯ ދެ ލަނޑު ޖެހިއިރު، އޭނާ ވަނީ މި ސީޒަނުގެ ޗެމްޕިއަންސް ލީގުގައި ކުޅުނު ހުރިހާ މެޗެއްގައި ލަނޑު ޖަހާފައެވެ.

މި ނަތީޖާއާއެކު ގްރޫޕް އެފްގެ އެއްވަނައިގައި ޔުނައިޓެޑް އޮތީ ކުޅުނު ހަތަރު މެޗުން ލިބުނު ހަތް ޕޮއިންޓާއެކުއެވެ. ދެވަނައިގައި އޮތް ވިޔަރެއާލުން އަންގާރަ ދުވަހުގެރޭ ކުޅުނު މެޗުން 2-0 ގެ ނަތީޖާއަކުން ޔަންގް ބޯއީސް ބަލިކުރިއިރު، އެ ޓީމަށްވެސް ވަނީ ހަތަރު މެޗުން ހަތް ޕޮއިންޓް ލިބިފައެވެ. އެކަމަކު ޔުނައިޓެޑަށް ކުރި ލިބެނީ ހެޑް-ޓު-ހެޑް ގަވާއިދުންނެވެ. އަދި ތާވަލުގެ ތިންވަނައިގައި އޮތް އެޓަލާންޓާއަށް ހަތަރު މެޗުން ފަސް ޕޮއިންޓް ލިބިފައިވާއިރު، ފުލުގައި އޮތް ޔަންގް ބޯއީސްއަށް ހަތަރު މެޗުން ލިބިފައިވަނީ ތިން ޕޮއިންޓެވެ.