ބަޔާނާއި ޔުވެންޓަސް ދެވަނަ ބުރަށް

ޔުއެފާ ޗެމްޕިއަންސް ލީގުގެ ދެވަނަ ބުރުގެ ޖާގައެއް ޖަރުމަނުގެ ބަޔާން މިއުނިކާއި އިޓަލީގެ ޔުވެންޓަސްއިން ހޯދައިފިއެވެ.

ގަދަ 16 ގެ ޖާގައެއް ބަޔާނުން ހޯދީ އަންގާރަ ދުވަހުގެރޭ ކުޅުނު މެޗުން ބެންފީކާ އަތުން 5-2 ގެ ނަތީޖާއަކުން މޮޅުވެގެންނެވެ.

އަމިއްލަ ދަނޑުގައި ކުޅުނު މި މެޗުގައި ބަޔާނުން މޮޅު ކުޅުމެއް ދެއްކިއިރު، މި މެޗުގައި އެ ޓީމުގެ އިތުބާރު ފޯވާޑް ރޮބަޓް ލެވަންޑޯސްކީ ވަނީ ހެޓްރިކެއް ހަދާފައެވެ. މިއީ އޭނާގެ ކެރިއަރުގެ 28 ވަނަ ހެޓްރިކެވެ. އޭގެ ތެރެއިން ހަތަރު ހެޓްރިކް ހަދާފައިވަނީ ޗެމްޕިއަންސް ލީގުގައެވެ. އަދި މި މެޗުގައި ލެވަންޑޯސްކީ ހެޓްރިކެއް ހެދިއިރު، މި މެޗަކީ ލެވަންޑޯސްކީ ޗެމްޕިއަންސް ލީގުގައި ކުޅުނު 100 ވަނަ މެޗެވެ.

ދެން މި މެޗުގައި ބަޔާނުން ކާމިޔާބުކުރި އަނެއް ދެ ލަނޑު ޖަހައިދިނީ ސާޖް ގްނަބްރީ އާއި ލެރޯއި ސާނޭއެވެ. އަދި މި މެޗުގައި ބެންފީކާއިން ކާމިޔާބުކުރި ދެ ލަނޑު އެ ޓީމަށް ޖަހައިދިނީ މޮރާޓޯ އާއި ޑާވިން ނޫނޭޒެވެ.

މި މޮޅާއެކު ގަދަ 16 ގެ ޖާގައެއް ބަޔާނުން ކަށަވަރުކުރީ މި ސީޒަނުގެ ޗެމްޕިއަންސް ލީގުގައި ކުޅުނު ހަތަރު މެޗުންވެސް މޮޅުވެ، ސައްތައިން ސައްތަ ރިކޯޑަކާއެކުއެވެ. އެގޮތުން ގްރޫޕް އީގެ އެއްވަނައިގައި ބަޔާން އޮތީ ކުޅުނު ހަތަރު މެޗުންވެސް މޮޅުވެ 12 ޕޮއިންޓާއެކުއެވެ. ދެވަނައިގައި އޮތީ އަންގާރަ ދުވަހުގެރޭ ޑީނަމޯ ކިއޭވް އަތުން 1-0 ގެ ނަތީޖާއަކުން މޮޅުވި ބާސެލޯނާއެވެ. އެ ޓީމަށް ވަނީ ހަތަރު މެޗުން ހަ ޕޮއިންޓް ލިބިފައެވެ. އަދި ތިންވަނައިގައި އޮތް ބެންފީކާއަށް ހަތަރު މެޗުން ހަތަރު ޕޮއިންޓް ލިބިފައިވާއިރު، ފުލުގައި އޮތް ކިއޭވަށް ހަތަރު މެޗުން ލިބިފައިވަނީ އެންމެ ޕޮއިންޓެކެވެ.

މީގެ އިތުރުން ޗެމްޕިއަންސް ލީގުގައި ގަދަ 16 ގެ ޖާގައެއް ޔުވެންޓަސްއިން ހޯދީ އަންގާރަ ދުވަހުގެރޭ ކުޅުނު މެޗުން ޒެނިތު އަތުން 4-2 ގެ ނަތީޖާއަކުން މޮޅުވެގެންނެވެ.

އަމިއްލަ ދަނޑުގައި ކުޅުނު މެޗުގައި ޔުވެންޓަސްއިން މޮޅު ކުޅުމެއް ދެއްކިއިރު، މި މެޗުގައި އެ ޓީމުގެ ތަރި ޕައުލޯ ޑިބާލާ ވަނީ ދެ ލަނޑު ޖަހާފައެވެ. އޭގެ ތެރެއިން އެއް ލަނޑު އޭނާ ކާމިޔާބުކޮށްފައިވަނީ ދެވަނަ ހާފުގެ ކުރީކޮޅު ލިބުނު ޕެނަލްޓީއަކުންނެވެ.

ދެން މި މެޗުގައި ޔުވެންޓަސްއިން ކާމިޔާބުކުރި އަނެއް ދެ ލަނޑު ޖަހައިދިނީ ފެޑެރީކޯ ކިއޭސާ އާއި އަލްވާރޯ މޮރާާޓާއެވެ. އަދި މި މެޗުގައި ޒެނިތުން ކާމިޔާބުކުރި ދެ ލަނޑުގެ ތެރެއިން އެއް ލަނޑަކީ ޔުވެންޓަސްގެ ލިއޮނާޑޯ ބޮނޫޗީ އަތުން ބައިކޮޅަށް ވަން ލަނޑެކެވެ. އެ ޓީމުގެ އަނެއް ލަނޑު މެޗުގެ އިތުރު ވަގުތުގައި ކާމިޔާބުކޮށްދިނީ ސަރްދާރް އަޒްމޫނެވެ.

މި ސީޒަނުގެ އިޓާލިއަން ލީގުގައި ޔުވެންޓަސްގެ ނަތީޖާތައް ވަރަށް ބޮޑަށް ދަށްވި ނަމަވެސް، އެ ޓީމުން އަންނަނީ މި ފަހަރުގެ ޗެމްޕިއަންސް ލީގުގައި މޮޅު ކުޅުމެއް ދައްކަމުންނެވެ. އެގޮތުން ގަދަ 16 ގެ ޖާގައެއް ޔުވެންޓަސްއިން ކަށަވަރުކުރީ ކުޅުނު ހަތަރު މެޗުންވެސް މޮޅުވެ، ސައްތައިން ސައްތަ ރިކޯޑަކާއެކުއެވެ. އެގޮތުން ގްރޫޕް އެޗްގެ އެއްވަނައިގައި ޔުވެންޓަސް އޮތީ ކުޅުނު ހަތަރު މެޗުންވެސް މޮޅުވެ 12 ޕޮއިންޓާއެކުއެވެ.

ދެވަނައިގައި އޮތީ އަންގާރަ ދުވަހުގެރޭ މަލްމޯ އަތުން 1-0 ގެ ނަތީޖާއަކުން މޮޅުވި ޗެލްސީއެވެ. އެ ޓީމަށް ވަނީ ހަތަރު މެޗުން ނުވަ ޕޮއިންޓް ލިބިފައެވެ. އަދި ތިންވަނައިގައި އޮތް ޒެނިތަށް ހަތަރު މެޗުން ތިން ޕޮއިންޓް ލިބިފައިވާއިރު، ފުލުގައި އޮތް މަލްމޯއަށް އަދި މިހާތަނަށް ޕޮއިންޓެއް ލިބިފައެއް ނުވެއެވެ.