މި ސަރުކާރުގެ އެންމެ ބިޔަ ބޮޑު މަޝްރޫއަކީ އަތްލެވޭ މަޝްރޫއެއް ނޫން: މިނިސްޓަރު ފައްޔާޒު

ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ސަރުކާރުގެ އެންމެ ބޮޑު ބިޔަ މަޝްރޫއަކީ އަތްލެވޭ މަޝްރޫއެއް ނޫން ކަމަށް އިކޮނޮމިކް މިނިސްޓަރު ފައްޔާޒް އިސްމާއިލް ވިދާޅުވެއްޖެއެވެ.

ރާއްޖެޓީވީގެ ފަލަސުރުޚީ ޕްރޮގްރާމްގައި މިނިސްޓަރު ފައްޔާޒު ވިދާޅުވީ ސަރުކާރުގެ ސިޔާސަތުތައް ވަރަށް ފުޅާ ކަމަށެވެ. މި ސަރުކާރުގެ އެންމެ ބޮޑު ބިޔަ މަޝްރޫއަކީ އަތް ލެވޭ މަޝްރޫއެއް ނޫންކަން ފާހަގަކުރައްވައި މިނިސްޓަރު ފައްޔާޒު ވިދާޅުވީ، އުމްރާނީ ތަރައްގީގެ މަޝްރޫއުތަކަށް ވުރެ ބޮޑަށް މުޅި ދައުލަތުގެ ސިޔާސަތުތައް ބަދަލުކުރުމަށް އިސްކަންދޭ ކަމަށެވެ. އެގޮތުން ގާނޫނުތައް ބަދަލުކޮށް އުފައްދަމުންދާ ކަމަށް މިނިސްޓަރު ފައްޔާޒު ވިދާޅުވިއެވެ.

އޭގެ ތެރޭގައި އިޖްތިމާއީ، އިގުތިސާދީ، ސިޔާސީ އަދި އަދުލު އިންސާފުގެ ނިޒާމުގެ އިތުރުން ވެސް އެކި ދާއިރާތަކަށް ބޮޑެތި ބަދަލުތަކެއް ގެނެސްފައިވާކަން މިނިސްޓަރު ފައްޔާޒު ފާހަގަކުރެއްވިއެވެ. އަދި ވިދާޅުވީ ވިޔަފާރިތަކަށާއި، އާއްމު ރައްޔިތުންނަށް ފަސޭހަވާނެ މަގު ކޮށުމަށްޓަކައި ވިޔަފާރީގެ ގާނޫނުތަކަށް ބަދަލުތައް ގެނެވޭ ކަމަށެވެ. މިނިސްޓަރު ފައްޔާޒު ވިދާޅުވީ ކުންފުނީގެ ގާނޫނަށް ބޮޑެތި ބަދަލުތެއް ގެނެސް، މިއަހަރުގެ ތެރޭގައި ރައްޔިތުންގެ މަޖިލީހަށް ފޮނުވާނެ ކަމަށެވެ. އަދި ފޮރިން އިންވެސްޓްމެންޓް ގާނޫނު ވެސް އެއްކޮށް ބަދަލުކުރުމަށްފަހު މިއަހަރުގެ ތެރޭގައި ފޮނުވާނެ ކަމަށެވެ. އެއާއެކު އިންވެސްޓްކުރާ މީހުންނަށް އަދި ޚާއްސަކޮށް ފޮރިން އިންވެސްޓަރުންނަށް އިތުބާރާއި ޔަގީންކަން ލިބިގެންދާނެ ކަމަށް މިނިސްޓަރު ފައްޔާޒު ވިދާޅުވިއެވެ.

މިނިސްޓަރު ފައްޔާޒު ވިދާޅުވީ ސިޔާސީ މަސްރަހުގައި އިންވެސްޓަރުންނަށް ވަރަށް ބޮޑެތި ގޮންޖެހުންތަކާ ކުރިމަތިލާން ޖެހުނު ކަމަށާއި، ބޮޑެތި ކަންބޮޑުވުންތަކެއް އުފެދިގެން ދިޔަ ކަމަށެވެ. އަދި ސަރުކާރެއް ބަދަލުވާއިރު، ކޮށްފައިވާ އިންވެސްޓްމެންޓަށް ވާނީ ކިހިނެތްތޯ ވެސް ސުވާލު އުފެދިފައިވާ ކަމަށް މިނިސްޓަރު ފައްޔާޒު ވިދާޅުވިއެވެ.

ނަމަވެސް މިހާރު މަސައްކަތް ކުރަނީ ގާނޫނީ ހަމަތަކުން ސަރުކާރެއް ބަދަލު ވިޔަސް ނުވަތަ ކޮންމެ ޕާޓީއެއް ވެރިކަމަށް އަޔަސް އިންވެސްޓަރުންނަށް ކުރާ އިންވެސްޓްގެ ޔަގީންކަން އޮންނަ ގޮތަކަށް ބައްޓަން ކުރަން ކަމަށް މިނިސްޓަރު ފައްޔާޒު ވިދާޅުވިއެވެ. މިނިސްޓަރު ފައްޔާޒު ވިދާޅުވީ މިހުރިހާ ގޮތަކަށް ގާނޫނުތައް ބައްޓަންވެގެން ދިއުމާއެކު ގިނަ ފުރުސަތުތައް ހުޅުވިގެންދާނެ ކަމަށެވެ. އަދި ޚާއްސަކޮށް ވިޔަފާރިތަކަށް ފަހިފުރުސަތުތައް ލިބޭނެކަން މިނިސްޓަރު ފައްޔާޒު ފާހަގަކުރެއްވިއެވެ.