33 ޓީމާއެކު ގައުމީ ބީޗް ވޮލީބޯޅަ މުބާރާތް ފެށިގެން ކުރިއަށް
މުބާރާތް ކުރިއަށްދާނީ އަންނަ މަހުގެ ތިނެއްގެ ނިޔަލަށް
މިހާރު ކުރިއަށްދާ ގައުމީ ބީޗް ވޮލީބޯޅަ މުބާރާތުގެ ތެރެއިން
ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން އިންތިޒާމުކޮށްގެން ބާއްވާ ގައުމީ ބީޗް ވޮލީބޯޅަ މުބާރާތުގެ ކުޅުން ފަށައިފިއެވެ.
ތިން ޑިވިޝަނަކަށް ބަހާލައިގެން މި މުބާރާތް ކުރިޔަށްދާއިރު، މި މުބާރާތުގައި ޖުމްލަ 33 ޓީމު ވަނީ ބައިވެރިވެފައެވެ. އޭގެ ތެރެއިން މި މުބާރާތުގެ 19 އަހަރުން ދަށުގެ ބައިގައި ބައިވެރިވެފައިވަނީ ހަމައެކަނި ފިރިހެން ހަތަރު ޓީމު ކަމަށް ވީއޭއެމުން ބުނެއެވެ. އަދި މި މުބާރާތުގައި ދެން ހިމެނޭ 23 އަހަރުން ދަށުގެ ފިރިހެން ބައިގައި އަށް ޓީމު ބައިވެރިވެފައިވާއިރު، މި އުމުރުފުރާގައި އަންހެން ތިން ޓީމު ވަނީ ބައިވެރިވެފައެވެ. މި މުބާރާތުގައި ދެން ހިމެނޭ އޯޕަން ޑިވިޝަނުގައި ފިރިހެން އަށް ޓީމު ބައިވެރިވެފައިވާއިރު، އަންހެން 10 ޓީމު ވަނީ މި ބައިގައި ބައިވެރިވެފައެވެ.
މި މުބާރާތުގެ ފިރިހެން ބައިގެ މެޗުތައް ހުޅުމާލޭ ރެޑްބުލް ކޯޓުގައި ކުޅޭއިރު، އަންހެން މެޗުތައް ކުޅެމުން އަންނަނީ މާލޭ ދޮންގަނޑު ބީޗް ވޮލީބޯޅަ ކޯޓުގައެވެ.
މިދިޔަ ހުކުރު ދުވަހު ގައުމީ ބީޗް ވޮލީބޯޅަ މުބާރާތުގެ ކުޅުން ފަށާފައިވާއިރު، ދުނިޔޭގެ ވޮލީބޯޅައިގެ މައި ޖަމުއިއްޔާ އެފްއައިވީބީ އާއި ވީއޭއެމް ގުޅިގެން ވަނީ ރާއްޖޭގައި ބީޗް ވޮލީބޯޅަ އިތުރަށް ތަރައްގީކުރުމަށް ގިނަ މަސައްކަތްތަކެއް ކުރުމަށް ނިންމާފައެވެ. އެގޮތުން ދުނިޔޭގެ ބީޗް ވޮލީބޯޅަ ހަބަކަށް ރާއްޖެ ހެދުމަށް މަސައްކަތް ފަށާފައިވާކަން ވީއޭއެމުން ދާދި ފަހުން ވަނީ އިއުލާންކޮށްފައެވެ. މީގެ އިތުރުން ބައިނަލްއަގުވާމީ ބީޗް ވޮލީބޯލް މުބާރާތްތައް ރާއްޖޭގައި ކުރިއަށް އޮތްތަނުގައި ބޭއްވިގެންދާނެ ކަމަށްވެސް އެ އެސޯސިއޭޝަނުން ވަނީ ބުނެފައެވެ.
ހުކުރު ދުވަހު ގައުމީ ބީޗް ވޮލީބޯޅަ މުބާރާތުގެ ކުޅުން ފެށިއިރު، މި މުބާރާތް ކުރިއަށްދާނީ އަންނަ ނޮވެމްބަރު މަހުގެ ތިންވަނަ ދުވަހުގެ ނިޔަލަށެވެ.
މީގެ ކުރިން ހަމައެކަނި އޯޕަން ޑިވިޝަނެއް ކުޅޭ ގޮތަށް ބާއްވާ މި މުބާރާތް، ގިނަ އުމުރުފުރާތަކަކަށް ބަހާލައިގެން މި ފަހަރު ކުރިއަށް ގެންދިއުމުގެ ބޭނުމަކީ ރާއްޖެއަކީ ވަރަށް ގިނައިން ބައިނަލްއަގުވާމީ ފެންވަރުގެ ބީޗް ވޮލީބޯޅަ މުބާރާތްތަކުގައި ކުޅޭ ގައުމަކަށްވާއިރު، މުސްތަގުބަލުގައި ރަނގަޅު ބީޗް ވޮލީބޯޅަ ޓީމުތަކެއްވެސް ބޭއްވުމުގެ ބޭނުމުގައި ކަމަށް ވީއޭއެމުން ވަނީ ބުނެފައެވެ. އޭގެ ތެރެއިން އަމާޒެއް ކަނޑައަަޅައިގެން ޕްލޭނެއްގެ ތެރެއިން އެންމެ ޚާއްސަ ބޭނުމެއްގެ ގޮތުގައި އޮތީ ބައިނަލްއަގުވާމީ ފެންވަރުގައި ބީޗް ވޮލީބޯޅައިން ރާއްޖެއަށް ރަން މެޑެއްޔެއް ހޯދުން ކަމަށްވެސް އެ އެސޯސިއޭޝަނުން ވަނީ ބުނެފައެވެ.
މި އަހަރު ވީއޭއެމުން ގައުމީ ބީޗް ވޮލީބޯޅަ މުބާރާތް ބާއްވާއިރު، ކޮވިޑް-19 އާ ގުޅިގެން މިދިޔަ އަހަރު މި މުބާރާތް ބާއްވާފައެއް ނުވެއެވެ.
