ވޯލްޑް ބޭންކުގެ ނާއިބުރައީސް ރާއްޖެ ވަޑައިގަންނަވަނީ

ވޯލްޑް ބޭންކުގެ ވައިސް ޕްރެޒިޑެންޓް ހާޓްވިގް ޝެއިފާ ވަރަށް އަވަހަށް ރާއްޖެ ވަޑައިގަންނަވާނެކަން ހާމަކުރައްވައިފިއެވެ.

ހާޓްވިގް ޝެއިފާ ދެއްވި ވީޑިއޯ އިންޓަވިއުއްގައި ވިދާޅުވީ ކުރިމަގުގައި އިގްތިސާދު ކުރިއެރުވުމަށް ޑިޖިޓަލް ޓެކްނޯލޮޖީގެ ބޭނުން ހިފިދާނެ ގޮތްތަކާ މެދު މަޝްވަރާ ކުރުމަށް ވަރަށް އަވަހަށް ރާއްޖެ ވަޑައިގަންނަވާނެ ކަމަށެވެ.

ކޮވިޑް-19ގެ ސަބަބުން ރާއްޖޭގެ ފަތުރުވެރިކަމުގެ ސިނާއަތަށް ވަރަށް ބޮޑު ނޭދެވޭ އަސަރެއް ކޮށްފައިވާކަން ފާހަގަ ކުރައްވައި ޝެއިފާ ވިދާޅުވީ ރާއްޖޭގެ ފަތުރުވެރިކަން އަލުން އާރާސްތުވަމުން އަންނާތީ އެކަމާ އުފާކުރާ ކަމަށެވެ. އަދި މީގެ ސަބަބުން ރާއްޖޭގެ އިގްތިސާދަށާއި ވަކިވަކި ފަރުދުންނަށް ވަރަށް ބޮޑު ހެޔޮ ބަދަލެއް އަންނާނެ ކަމަށެވެ. ޕެންޑެމިކްގެ ތެރޭގައި ރާއްޖޭގެ ސިއްހީ ނިޒާމު އިތުރަށް ހަރުދަނާ ކުރުމަށާއި، މުވައްޒަފުންނަށް އިންކަމް ސަޕޯރޓް ދިނުމަށް ވޯލްޑް ބޭންކުން ދިން އެހީތެރިކަން ޝެއިފާ ފާހަގަ ކުރެއްވިއެވެ.

"ރާއްޖޭގެ މަސްވެރިކަމުގެ ސިނާއަތާއި، ފަތުރުވެރިކަމުގެ ސިނާއަތުގެ އިތުރުން ސްކޫލް ފަދަ ތަންތަން ބިނާކޮށް ތަރައްގީ ގެނައުމަށް ވޯލްޑް ބޭންކުން ވަނީ ގިނަ އެހީތަކެއް ފޯރުކޮށްދީފައި. މީގެ އިތުރުންވެސް ގިނަ މަސައްކަތް ތަކެއް ކުރަން އެބަހުރި. އެގޮތުން ރާއްޖޭގެ ޑިޖިޓަލް ޑެވެލޮޕްމެންޓަށް ވަރަށް ޚާއްސަ ސަމާލުކަމެއް ދޭނަން" ޝެއިފާ ވިދާޅުވިއެވެ. ރާއްޖެއާއި ވޯލްޑް ބޭންކުގެ ގުޅުމަށް މިހާރު ވަނީ 40 އަހަރު ވެފައެވެ.

މީގެ އިތުރުން ރާއްޖޭގެ އުމްރާނީ ތަރައްގީއަށް ވޯލްޑް ބޭންކުގެ ފަރާތުން ފުރިހަމަ އެހީތެރިކަން ލިބޭނެކަން ފާހަގަ ކުރެއްވިއެވެ. މިކަމާއި ގުޅިގެން ރާއްޖޭގެ ފިނޭންސް މިނިސްޓަރ އިބްރާހިމް އަމީރު ވިދާޅުވީ ވޯލްޑް ބޭންކުން ރާއްޖެއަށް ދެއްވާ އެހީތެރިކަމާއި ގާތް ގުޅުމަށް ޝުކުރު އަދާކުރާ ކަމަށެވެ. އަދި ވަކިން ޚާއްސަކޮށް ކޮވިޑް-19ގެ ހާލަތުގައި ވޯލްޑް ބޭންކުން ރާއްޖެއަށް ދެއްވި އެހީތެރިކަން އަމީރު ވަނީ ފާހަގަ ކުރައްވާފައެވެ.