ޗެމްޕިއަން އޮފް ޗެމްޕިއަންސް 2021 ފެތުމުގެ މުބާރާތުން ފެންމުތުގެ ޝަރަފު ކާމިޔާބު ދެ ފެތުންތެރިން ކަމަށްވާ ހަމްނާ އަޙްމަދާއި މުޙައްމަދު އާން ހުސެއިން ހޯދައިފިއެވެ.

ސްވިމިން އެސޯސިއޭޝަން އޮފް މޯލްޑިވްސްއިން އިންތިޒާމުކުރި މި މުބާރާތަކީ މި ސީރީޒްގެ މުބާރާތްތަކުގެ ދަށުން ބޭއްވި ފުރަތަމަ މުބާރާތެވެ. މި މުބާރާތުން އެއްވަނައަށް ދިޔަ ފެތުންތެރިންނަށް ފެންމުތުގެ ޝަރަފު އެރުވިއިރު، މި މުބާރާތަކީ ވޭތުވެދިޔަ އަހަރުތަކުގައި ކޮންމެ އިވެންޓެއްގެވެސް އެންމެ މޮޅެތި ފެތުންތެރިންނަށް ދައުވަތުދީގެން ބޭއްވި ޚާއްސަ މުބާރާތެއް ކަމަށް ސްވިމިން އެސޯސިއޭޝަނުން މައުލޫމާތުދެއެވެ.

މިދިޔަ ހުކުރު ދުވަހުން ފެށިގެން ބުދަ ދުވަހުގެ ނިޔަލަށް ހުޅުމާލޭ ސްވިމިން ޕޫލުގައި ބޭއްވި ފެތުމުގެ މި ޚާއްސަ މުބާރާތުން ހަމްނާ ފެންމުތުގެ ޝަރަފު ހޯދިއިރު، އޭނާ ވަނީ މި މުބާރާތުގެ 13 އިވެންޓުގައި ވާދަކޮށް 12 އިވެންޓުން ރަން މެޑަލް ހޯދާފައެވެ. ހަމްނާއަށް ރަން މެޑަލް ނުލިބުނީ އޭނާ ވާދަކުރި 100 މީޓަރު ބަޓަފްލައި އިވެންޓުން ޑިސްކޮލިފައިވުމާ ގުޅިގެންނެވެ.

މި މުބާރާތުގައި ހަމްނާ ރަން މެޑަލް ހޯދި އިވެންޓުތަކަކީ 100 މީޓަރާއި 200 މީޓަރު ބެކްސްޓްރޯކް، 100 މީޓަރާއި 50 މީޓަރު ބްރެސްޓްސްޓްރޯކް، 50 މީޓަރު ބެކްސްޓްރޯކް، 200 މީޓަރު ފްރީސްޓައިލް، 400 މީޓަރު ފްރީސްޓައިލް، 100 މީޓަރާއި 200 މީޓަރު އިންޑިވިޖުއަލް މެޑްލީ، 50 މީޓަރު ބަޓަފްލައި އަދި 50 މީޓަރާއި 100 މީޓަރު ފްރީ ސްޓައިލްއެވެ.

ދެން މި މުބާރާތުން ފެންމުތުގެ ޝަރަފު ހޯދި އާން ވަނީ 15 އިވެންޓެއްގައި ވާދަކޮށް 14 އިވެންޓުން ރަން މެޑަލް އަދި އެއް އިވެންޓުން ރިހި މެޑަލް ހޯދާފައެވެ. އާންއަށް ރިހި މެޑަލް ލިބުނީ 200 މީޓަރު ބަޓަފްލައި އިވެންޓުންނެވެ. މި މުބާރާތުން އާން ރަން މެޑަލް ހޯދި އިވެންޓުތަކަކީ 400 މީޓަރު އިންޑިވިޖުއަލް މެޑްލީ، 100 މީޓަރާއި 200 މީޓަރު ބެކްސްޓްރޯކް، 100 މީޓަރު ބްރެސްޓްސްޓްރޯކް، 100 މީޓަރު ބަޓަފްލައި، 50 މީޓަރު ބެކްސްޓްރޯކް، 200 މީޓަރު ފްރީ ސްޓައިލް، 50 މީޓަރު ބްރެސްޓްސްޓްރޯކް، 400 މީޓަރު ފްރީ ސްޓައިލް، 100 މީޓަރާއި 200 މީޓަރު އިންޑިވިޖުއަލް މެޑްލީ، 50 މީޓަރު ބަޓަފްލައި އަދި 50 މީޓަރާއި 100 މީޓަރު ފްރީ ސްޓައިލްއެވެ.

މި އަހަރުގެ މުބާރާތުން ފެންމުތުގެ ޝަރަފު ހަމްނާ އާއި އާން ހޯދިއިރު، އެ ދެ ފެތުންތެރިން ވަނީ އަންނަ ޑިސެމްބަރު މަހު ޔުނައިޓެޑް އަރަބި އެމިރޭޓްސް (ޔޫއޭއީ) ގެ ވެރިރަށް އަބޫ ދާބީގައި ބާއްވާ ދުނިޔޭގެ ފެތުމުގެ މުބާރާތް ކަމަށްވާ 15 ވަނަ ފީނާ ވޯލްޑް ސްވިމިން ޗެމްޕިއަންޝިޕުގައި ވާދަކުރުމަށްވެސް ހޮވާފައެވެ. ދެން އެ މުބާރާތުގައި ރާއްޖެ ތަމުސީލުކުރާނީ އައިޝަތު ސައުސަން އާއި އިމްއާން އަލީއެވެ.

ސްވިމިން އެސޯސިއޭޝަނުން އިންތިޒާމުކުރި ޗެމްޕިއަން އޮފް ޗެމްޕިއަންސް ފެތުމުގެ މުބާރާތުް ކާމިޔާބުކަމާއެކު ނިންމާލިއިރު، މި މުބާރާތަކީ ހުޅުމާލޭ ސްވިމިން ޕޫލުގައި ބޭއްވި ފެތުމުގެ ފުރަތަމަ މުބާރާތެވެ. ރާއްޖޭގެ އެންމެ މޮޅެތި 37 ފެތުންތެރިން ބައިވެރިވި މި މުބާރާތުގައި ޖުމްލަ 75 އިވެންޓެއް ވަނީ ކުރިއަށްގެންގޮސްފައެވެ.