ކުރީގެ ރައީސް ޔާމީނާއި މުއިއްޒުގެ ގެ އެޅި ގޮތް ބެލުމަށް ދިއްގަރު ދާއިރާގެ މެމްބަރު އިކްރާމް ހަސަން ގޮވާލައިފިއެވެ.
އިދިކޮޅު މެންބަރުން މި މައްސަލައަށް ވޯޓު ދިނުމަށް ތަޅުމުގައި ނެތް ކަމަށް ވެސް އިކްރާމް ވިދާޅުވިއެވެ. ބޮޑު އަގުގައި ފްލެތްތައް އަޅާފައިވާއިރު، ކުރީގެ ހައުސިންގ މިނިސްޓަރ ޑރ. މުހައްމަދު މުއިއްޒާއި، ކުރީގެ ރައީސް ޔާމީންގެ ގެ އަޅާފައިވަނީ ކޮންތާކުން ފައިސާ ހޯދައިގެންތޯ ބަލަން ޖެހޭ ކަމަށެވެ. މަޖިލީހުގައި ތިއްބެވި އިދިކޮޅު މެމްބަރުން ވެސް ތިއްބެވީ ހުވާ ކުރައްވައިގެން ކަމަށާއި، ކުޑަވެސް އިޚުލާސްތެރިކަމެއް ހުރިނަމަ މިކަންކަން ބެލުމަށް އެއްބާރުލުން ދެއްވަން ޖެހޭ ކަމަށް އިކްރާމް ވިދާޅުވިއެވެ. ވަކި ބޭފުޅަކު ގޯސް ނުހައްދަވާނެ ކަމަށް ވިސްނުމަކީ ރަނގަޅު ވިސްނުމެއް ނޫން ކަމަށެވެ. ގައުމަށާއި ރައްޔިތުންނަށް އިޚުލާސްތެރިވުމުގެ ވިސްނުންފުޅުގައި ކަންކަން ކުރައްވަން ޖެހިވަޑައިގަންނަވާ ކަން އިކްރާމް ފާހަގަކުރެއްވިއެވެ.
ރައްޔިތުންގެ މަޖިލީހަށް ހުށަހަޅާފައިވާ މައްސަލައަކީ، ހިޔާ ފްލެޓްގެ އަގު ކަނޑައަޅާފައިވާ ގޮތުގެ އޮޑިޓް ރިޕޯޓް ނެރުނު ހިސާބުން މިކަމުން ގެއްލުން ވެފައިވާ މިންވަރު ދެނެގަނެވި، އެކަމުގެ ހަގީގަތް ހޯދުމަށް ހުށަހެޅުނު މައްސަލައެއްގެ ގޮތުގައި އިކްރާމް ސިފަކުރެއްވިއެވެ.
އިކްރާމް ވިދާޅުވީ، ހިޔާ ފްލެޓްގެ އަގު ކަނޑައަޅާފައިވަނީ، މި ސަރުކާރަށް އުނދަގޫ ކުރުމަށް ކަމަށާއި، ރައްޔިތުންނަށާއި ސަރުކާރާ ޖެއްސުމަށް ކަނޑައަޅާފައިވާ އަގުތަކެއް ކަމަށެވެ. ކޮންމެ ސަރުކާރެއް ވެސް ހުވާ ކޮށްގެން އަންނަނީ ގައުމާއި ރައްޔިތުންނަށް އިޚުލާސްތެރިވުމަށް ކަމަށާއި، ކުރާ ކޮންމެ މަސައްކަތަކީ އިޚުލާސްތެރިކަމާއެކު ކުރާ މަސައްކަތަކަށް ވާން ޖެހޭނެ ކަމަށެވެ. ސިޔާސީ ވިސްނުމެއްގައި، އެއްބަޔަކާއި އަނެއް ބަޔަކާ ތަޅާފޮޅުމަށް މިފަދަކަންކަން ކުރުމަކީ ހެޔޮވާވަރުގެ ކަމެއް ނޫން ކަމަށާއި، ކޮންމެ ވެރިކަމެއް އޮތް ނަމަވެސް ތެދުވެރިވާން ޖެހޭ ކަމަށް އިކްރާމް ވިދާޅުވިއެވެ.
