ދައުލަތުގެ ފަރާތުން ކުއްޔަށް ދޫކުރުމަށް އިއުލާނުކުރި ރިސޯޓުތަކުގެ ތެރެއިން ކުއްޔަށް ދޫކުރެވުނީ އެންމެ ރިސޯޓެއް ކަމަށް ފިނޭންސް މިނިސްޓްރީން ބުނެފިއެވެ.

ފިނޭންސް މިނިސްޓްރީގެ ޗީފް ފައިނޭންޝިއަލް ބަޖެޓް އެގްޒެކިއުޓިވް އަހުމަދު ސަރުވާޝް އާދަމް ވިދާޅުވީ; ބަޖެޓަށް ފައިނޭންސް ހޯދުމަށް ރިސޯޓުތައް ކުއްޔަށްދޫކުރާއިރު، އެކުއިޒިޝަންގެ ދަށުން ދިގު މުއްދަތަކަށް ރަށްތައް ކުއްޔަށް ދޫކުރާނެ ކަމަށެވެ.

މިއަހަރުތެރޭގައި 19 ރިސޯޓެއް ކުއްޔަށް ދިނުމަށް އިއުލާނުކޮށްފައިވާކަމަށާއި، އޭގެތެރެއިން ކުއްޔަށް ދެވުނީ އެންމެ ރިސޯޓެއް ކަމަށް ސަރުވާޝް ވިދާޅުވިއެވެ. ފަތުރުވެރިކަމުގެ ބޭނުމަށް ރަށްތައް ކުއްޔަށް ދޫކުރުމުގެ މަސައްކަތަކީ މިނިސްޓްރީ އޮފް ޓުއަރިޒަމުން ކުރާ ކަމެއް ކަމަށާއި, މިހާރު ކުއްޔަށް ދޫނުކުރެވި ހުރި ރަށްތައް ދޫކުރުމުގެ މަސައްކަތްވެސް ކުރަމުންދާކަމަށް ސަރުވާޝް ވިދާޅުވިއެވެ.

ސަރުވާޝް ވިދާޅުވީ ޓުއަރިޒަމް ބޭނުމަށް ރިސޯޓުތަކާއި ރަށްތައް ކުއްޔަށް ދޫކުރުމަށް އެންމެ ޚާއްސަ ސަމާލުކަމެއްދެނީ ރާއްޖޭގެ އެންމެ އުތުރާއި އެންމެ ދެކުނުން ކަމަށެވެ. އަދި އެ އަތޮޅުތަކުގެ ރަށްތަކުގެ ކުލިވެސް މިހާރު ކުޑަކުރެވިފައިވާކަމަށާއި، މިއީ އެ ސަރަހައްދުތަކުގައި ފަތުރުވެރިކަން ކުރިއަރުވަންވެސް މަގުފަހިވާނެ ކަމެއް ކަމަށެވެ. ސަރުވާޝް ވިދާޅުވީ ޓުއަރިޒަމް ރަށްތައް ކުއްޔަށް ދޫކޮށްގެން 7 ލައްކައަށްވުރެ ގިނަ ޑޮލަރު އެކުއިޒިޝަން ފީގެ ގޮތުގައި ލިބޭނެ ކަމަށް ބެލެވޭ ކަމަށެވެ.

މިގެ އިތުރުން ބިންތައް ވިއްކައިގެން ބަޖެޓަށް ފައިނޭންސް ހޯދުމުގެ މަސައްކަތަށް، ރަށްރަށުގެ ކައުންސިލްތަކާ ވާހަކަދައްކައިގެން, މިނިސްޓްރީ އޮފް ނޭޝަނަލް ޕްލޭނިން ހައުސިން އެންޑް އިންފްރާސްޓްރަކްޗަރއިން ޕޮލިސީއެއް ކަނޑައަޅާފައިވާކަމަށް ސަރުވާޝް ވިދާޅުވިއެވެ. އެއީ ރަށްރަށުގައި ހިއްކާފައިވާ ބިންތަކުގެ ތެރެއިން 30 އިންސައްތަ ބިން ވިއްކުމަށް ކަމަށާއި, އެއީ ރެސިޑެންޝަލް ބޭނުންތަކަށާއި އިންޑަސްޓްރިއަލް ބޭނުންތަކަށް ކަނޑައަޅާފައި އޮންނަ ބިން ކަމަށް ސަރުވާޝް ވިދާޅުވިއެވެ. މިގޮތުން ބިން ވިއްކައިގެން ދައުލަތަށް ރަނގަޅު އާމްދަނީއެއް ލިބޭ ވަރަށް ރާއްޖޭގެ އެކި ކަންކޮޅުތަކުގައި ބިން އެބަހުރި ކަމަށް ސަރުވާޝް ވިދާޅުވިއެވެ.

މިކަންކަމުން ފައިނޭންސް ހޯދުމުގެ ބަދަލުގައި ބޮޑަށް މަސައްކަތްކުރަނީ އާންމުކޮށް ލިބޭ ޓެކްސްތަކާ ފީތަކުން އާމްދަނީ ހޯދަންކަމަށް ސަރުވާޝް ވިދާޅުވިއެވެ. އެހެންނަމަވެސް އައު ކަންތައްތައް ތަންފީޒުުކުކުރެވުމުން އެކަންކަމަށް ބަރޯސާވާނެ ކަމަށް ވިދާޅުވިއެވެ. 2021 ވަނަ އަހަރުގެ ބަޖެޓުގައި ބަޖެޓު ފައިނޭންސިންގެ ގޮތުގައި ހިމަނާފައިވަނީ 1 ބިލިއަން ރުފިޔާއެވެ.