ޖަރުމަން ލީގުގައި ހޮނިހިރު ދުވަހުގެރޭ ކުޅުނު މެޗުތަކުން އެންމެ ފަހުގެ ޗެމްޕިއަން ބަޔާން މިއުނިކާއި ބޮރޫޝިއާ ޑޯޓްމުންޑުވެސް މޮޅުވެއްޖެއެވެ.

އަމިއްލަ ދަނޑުގައި ކުޅުނު މެޗުން ބަޔާން މޮޅުވީ ހޮފެންހެއިމް އަތުން 4-0 ގެ ނަތީޖާއަކުންނެވެ. ކޮވިޑް-19 އަށް ޕޮޒިޓިވްވެފައިވާތީ މި ވަގުތު ހޯމް ކަރަންޓީނުގައި ހުރި ބަޔާނުގެ ކޯޗު ހޫލިއަން ނާގަލްސްމަން މި މެޗުގައި އެ ޓީމަށް އިރުޝާދުދީފައެއް ނުވެއެވެ.

އެކަމަކު ބަޔާނުން މި މެޗުގައި މޮޅު ކުޅުމެއް ދެއްކިއިރު، މެޗު ފަށައިގެން އަށްވަނަ މިނެޓުގައި އެ ޓީމުގެ ސާޖް ގްނަބްރީ ވަނީ ލަނޑެއް ޖަހާފައެވެ. އެކަމަކު އޭގެ ކުރިން ހޮފެންހެއިމުގެ ފްލޯރިއަން ގްރިލިޗަށް ބަޔާނުގެ ޖަމާލް މުސިއާލާ ފައުލުކޮށްފައި އޮތުމުން، ވީޑިއޯ އެސިސްޓަންޓް ރެފުރީ (ވީއޭއާރް) އިން އެ ލަނޑު ބަލައިގެންފައެއް ނުވެއެވެ. ނަމަވެސް އޭގެ އަށް މިނެޓު ފަހުން މުސިއާލާ ދިން ބޯޅައަކުން ގްނަބްރީ އަލުން ލަނޑެއް ޖަހައި، ބަޔާނަށް ލީޑު ނަގައިދީފައެވެ.

މި މެޗުގައި ބަޔާނުން ލީޑު ފުޅާކޮށްފައިވަނީ މެޗުގެ 30 ވަނަ މިނެޓުގައެވެ. ކައުންޓަ އެޓޭކެއްގައި އޭރިއާ ބޭރުން ފޮނުވާލި ބާރު ހަމަލާއަކުން މި ލަނޑު އެ ޓީމަށް ކާމިޔާބުކޮށްދިނީ އިތުބާރު ފޯވާޑް ރޮބަޓް ލެވަންޑޯސްކީއެވެ. މިއީ މި ފަހަރު ލީގުގައި ލެވަންޑޯސްކީ ކާމިޔާބުކުރި 10 ވަނަ ލަނޑެވެ.

ދެން މި މެޗުގައި ބަޔާނުން އަނެއް ދެ ލަނޑު ޖަހާފައިވަނީ މެޗު ނިމެން ގާތްވެފައި ވަނިކޮށެވެ. އެގޮތުން މެޗު ނިމެން އަށް މިނެޓަށް ވެފައި ވަނިކޮށް ބަޔާނުގެ ތިންވަނަ ލަނޑު ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި އެރިކް މެކްސިމް ޗޮޕޫ-މޯޓިންއެވެ. އޭގެ ފަސް މިނެޓު ފަހުން ކިންގްސްލީ ކޯމަން ވަނީ ބަޔާނުގެ ހަތަރުވަނަ ލަނޑު ޖަހައިދީފައެވެ.

މި މެޗުން ބަޔާން މޮޅުވިއިރު، އެ ޓީމާ ވާދަވެރި ޑޯޓްމުންޑް މޮޅުވީ ރަށުން ބޭރުގައި ކުޅެ އާމީނިއާ ބީލެފެލްޑް އަތުން 3-1 ގެ ނަތީޖާއަކުންނެވެ.

އަނިޔާގެ ސަބަބުން ނޯވޭގެ ޒުވާން ތަރި އާލިއަން ބްރައުޓް ހާލަންޑް މި މެޗުގައި ކުޅެފައި ނުވި ނަމަވެސް، މެޗުގެ 31 ވަނަ މިނެޓުގައި ބަޔާނުން ވަނީ ލީޑު ނަގާފައެވެ. ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ އެމްރޭ ޗޭންއެވެ. އަދި ފުރަތަމަ ހާފުގެ ފަހު މިނެޓުގައި މެޓް ހަމެލްސް ވަނީ ޑޯޓްމުންޑަށް ލީޑު ފުޅާކޮށްދީފައެވެ.

މި މެޗުގައި ބަޔާނުން ތިންވަނަ ލަނޑު ކާމިޔާބުކޮށްފައިވަނީ މެޗުގެ 72 ވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ ޒުވާން ތަރި ޖޫޑް ބެލިންހަމެވެ. އޭނާ މި ލަނޑު ކާމިޔާބުކޮށްފައިވަނީ ބީލެފެލްޑުގެ ތިން ކުޅުންތެރިއެއް ކައިރިން ނައްޓާލުމަށްފަހުއެވެ. އެކަމަކު މެޗު ނިމެން ތިން މިނެޓަށް ވެފައި ވަނިކޮށް ލިބުނު ޕެނަލްޓީއަކުން ފަބިއަން ކްލޯސް ވަނީ ލަނޑެއް ޖަހައި، ބީލެފެލްޑަށް ފަރަގު ކުޑަކޮށްދީފައެވެ.

މި ނަތީޖާތަކާއެކު ތާވަލުގެ އެއްވަނައިގައި ބަޔާން އޮތީ ކުޅުނު ނުވަ މެޗުން 22 ޕޮއިންޓް ހޯދައިގެންނެވެ. ދެވަނައިގައި އޮތް ޑޯޓްމުންޑަށް ވަނީ ނުވަ މެޗުން 21 ޕޮއިންޓް ލިބިފައެވެ. އަދި ތިން ވަނައިގައި އޮތީ ހޮނިހިރު ދުވަހުގެރޭ ވުލްފްސްބާގް އަތުން 2-0 ގެ ނަތީޖާއަކުން މޮޅުވި ފްރެއިބާގެވެ. އެ ޓީމަށް ވަނީ ނުވަ މެޗުން 19 ޕޮއިންޓް ލިބިފައެވެ.