ފައިޒާ ވެކްސިނުން ކުޑަކުދިންނަށް އަސަރު ކުރާ މިންވަރު ހުރީ 90.7 އިންސައްތައިގައި

އެމެރިކާގައި 5 އަހަރާއި 11 އަހަރާއި ދެމެދުގެ ކުޑަކުދިންނަށް ކޮވިޑް ވެކްސިން ޓެސްޓް ކުރަން ފަށާފައިވާ އިރު، ކްލިނިކަލް ޓްރަޔަލްތައް ދައްކާ ގޮތުން، 5 އަހަރާއި 11 އަހަރާއި ދެމެދުގެ ކުދިންނަށް 90.7 އިންސައްތަ އަސަރު ކުރާ ކަމަށް ފައިޒާ ވެކްސިން އުފައްދާ ބައޯއެންޓެކުން ބުނެފިއެވެ.

އެ ކުންފުނިން އާންމުކޮށްފައިވާ މައުލޫމާތުތައް ދައްކާ ގޮތުން، ކްލިނިކަލް ޓްރަޔަލްގައި ބައިވެރިވި ކުދިންގެ ތެރެއިން ވެކްސިން ނޫން އެހެން ބޭހެއް ދިން 16 ކުއްޖަކަށް ކޮވިޑް ޖެހުނު އިރު، ވެކްސިން ޖެހި 3 ކުދިންނަށް ކޮވިޑް ޖެހިފައެއް ނުވެއެވެ. އަދި މިހާތަނަށް ހޯދިފައިވާ މައުލޫމާތުތައް އެ ކުންފުނިން ވަނީ އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަނަށް ހުށަހަޅާފައެވެ.

ކްލިނިކަލް ޓްރަޔަލްގައި ބައިވެރިވި 2268 ކުދިންގެ ތެރެއިން ދެބައިކުޅަ އެއްބައަށްވުރެ ގިނަ ކުދިންނަށް އެހެން ފަރުވާއެއްގެ ބަދަލުގައި ދީފައވަނީ ވެކްސިނެވެ. އެއީ ބޮޑަށް ފައިދާކުރަނީ ވެކްސިން ޖަހައިގެންތިބި ކުދިންތޯ ނުވަތަ ނޫންތޯ ބެލުމަށެވެ. ނަތީޖާތައް ދައްކާ ގޮތުން އެކަމުގެ އަސަރު 90 އިންސައްތައަށް ކުރާ ކަމަށް އެ ކުންފުނިން ބުނެއެވެ.

ފައިޒާ ވެކްސިންގެ އަސަރު 5 އަހަރާއި 11 އަހަރާއި ދެމެދުގެ ކުދިންނަށް ކުރަނީ ކިހާވަރަކައްތޯ ބެލުމަށް ބޭނުންކޮށްފައިވަނީ، ވެކްސިން ޖެހުމަށްފަހު ހަށިގަނޑުގައި އެންޓިބޮޑީސް އުފައްދައިދޭ މިންވަރާއި، ބޮޑެތި މީހުންނަށް ވެކްސިން ދިނުމުން އެންޓިބޮޑީސް އުފައްދައިދޭ މިންވަރު އަޅާ ކިއުމަށްފަހުގައެވެ.

މިހާތަނަށް ލިބިފައިވާ ނަތީޖާތައް ދައްކާގޮތުން، މިދިޔަ މަހުގައި ފައިޒާގެ ވެކްސިން ޖެހި ކުދިންގެ ހަށިގަނޑުގެ ދިފާއީ ބާރު ވައިރަހާއި ދެކޮޅަށް ގަދަވެފައިވެއެވެ. މި ކުދިންނަށް ދީފައިވަނީ 10 މައިކްރޯ ގްރާމްގެ 2 ޑޯޒެވެ. މިއީ 12 އަހަރުން މަތީގެ މީހުންނަށް ދީފައިވާ ޑޯޒްގެ 3 ބައިކުޅައެވެ.