ކުޑަކުދިންނަށް ޖިންސީ ގޯނާ ކުރިކަން ސިއްރުކޮށްދިން އިސް ފާދިރީ މަޤާމުން ދުރުވަނީ

އޮސްޓްރޭލިއާގެ ކްރިސްޓިއަން ފައްޅިއެއްގައި ފާދިރީއަކު ކުޑަކުދިންތަކަކަށް ޖިންސީ ގޯނާ ކުރިކަން ސިއްރުކޮށްދިން ކަމަށް ސާބިތުވެފައިވާ ފާދިރީ މަޤާމުން ދުރުވާން ނިންމައިފިއެވެ.

އެޑަލެއިޑްގެ އިސް ފާދިރީ، ފިލިޕް ވިލްސަންގެ މައްޗަށް ސާބިތުވެފައިވަނީ، މީގެ ފަންސާހަކަށް އަހަރު ކުރިން، 1970 އިގެ އަހަރުތަކުގައި އޭނާ ނިއު ސައުތު ވޭލްސްގެ މެއިޓްލޭންޑްގެ ފާދިރީއެއް ކަމުގައިވާ، ޖޭމްސް ފްލެޗަރގެ އެސިސްޓަންޓެއްގެ ގޮތުގައި އޭނާ މަސައްކަތްކުރިއިރު، ޖޭމްސް ފްލެޗަރ ކުޑަކުދިންނަށް ޖިންސީ ގޯނާ ކުރިކަން އެނގިހުރެ އެކަން ސިއްރު ކުރި ކަމުގެ ކުށެވެ.

ކުށް ސާބިތުވުމާއި ގުޅިގެން، ވިލްސަން ނެރުނު ބަޔާނެއްގައި ބުނެފައިވަނީ، ކޯޓުގެ ނިންމުމާއިއެކު، މިވަގުތު އޭނާ ހުރި އާޗްބިޝަޕްގެ މަޤާމުގެ މަސްއޫލިއްޔަތުތަކުން ދުރުވުމަކީ އެންމެ މުނާސަބު ގޮތް ކަމަށް ދެކޭ ކަމަށެވެ. އެހެންކަމުން ހުކުރު ދުވަހުން ފެށިގެން އޭނާ މަޤާމުގެ މަސްއޫލިއްޔަތުތަކުން ދުރުވާނެ ކަމަށް އެ ބަޔާނުގައި ވަނީ ބުނެފައެވެ.

ބަޔާނުގައި އިތުރަށް ބުނެފައިވަނީ، އޭނާ މަޤާމުން އިސްތިޢުފާ ދޭން ޖެހިއްޖެ ހާލަތެއްގައި މަޤާމުން އިސްތިޢުފާ ދިނުމަށްވެސް ތައްޔާރަށް ހުރި ކަމަށެވެ.

ވިލްސަން އަކީ މިފަދަ މައްސަލައެއްގައި، މުޅި ދުނިޔެއިންވެސް މިހާތަނަށް ކުށް ސާބިތުވި އެންމެ އިސް ފާދިރީއެވެ.

މި މައްސަލައިގެ ޝަރީއަތުގައި އެކަން ހިނގިކަން އެނގިފައި ނުވާކަމަށް ވިލްސަން ބުނި ނަމަވެސް، އޭރު ޖިންސީ ގޯނާގެ ޝިކާރައަކަށްވި ބައެއް ފަރާތްތަކުން ވަނީ ވިލްސަންއަށް އެ ވާހަކަތައް ކިޔައިދިން ކަމަށް ހެކިބަސްދީފައެވެ.

މި މައްސަލައިގައި ވިލްސަން އާއި ދެކޮޅަށް ހެކިބަސްދީފައިވާ އެކަކީ 1970 އިގެ އަހަރުތަކުގައި ފައްޅީގައި އޯލްޓަރ ބޯއީއެއްގެ ގޮތުގައި އުޅުނު ޕީޓަރ ކްރެއިގެވެ. ކޯޓުގައި ކްރެއިގް ބުނެފައިވާގޮތުން، ފާދިރީ ފްލެޗަރ އޭނާއަށް ޖިންސީ ގޯނާ ކުރިތާ 5 އަހަރު ފަހުން، 1976 ވަނަ އަހަރު އޭނާ ވަނީ ވިލްސަންއަށް އެ ވާހަކަތައް ތަފްޞީލުކޮށް ކިޔައިދީފައެވެ.

ކާކުކަން ހާމަނުކޮށް ކޯޓުގައި ހެކިބަސްދިން ފަރާތަކުން ބުނީ އޭނާގެ އުމުރުން 11 އަހަރުގައި ފާދިރީ ފްލެޗަރ އޭނާއަށް ޖިންސީ ގޯނާ ކުރުމުން، އެ ވާހަކަ ވިލްސަންއަށް ކިޔައިދިން ކަމަށެވެ. ނަމަވެސް އެއީ ދޮގެއްކަމަށް ބުނެ، ވިލްސަން އޭނާއަށް އަދަބު ދީފައިވާ ކަމަށްވެސް ހެކިބަސްދިން މީހާ ވަނީ ބުނެފައެވެ.

ވިލްސަންގެ މައްޗަށް ކުށް ސާބިތުވާކަން ނިންމާފައިވާއިރު، އޭނާއަށް ޙުކުމް ކުރާނީ އަންނަ ޖޫން މަހުއެވެ. ވިލްސަންގެ ކުށަށް ބަލާއިރު، އޭނާގެ މައްޗަށް ކުރެވޭނީ ގިނަވެގެން 2 އަހަރުގެ ޖަލު ޙުކުމެކެވެ.

މި މައްސަލައިގައި ޤާނޫނީ ގޮތުން އެޅެން ހުރި ފިޔަވަޅުތައް ބަލާނެ ކަމަށް ވިލްސަންގެ ޤާނޫނީ ޓީމުން ބުނެފައިވާއިރު، އުމުރުން 67 އަހަރުގެ ވިލްސަންއަށް އޮލްޒައިމަރޒް (ހަނދާން ނެތޭ ބަލި) ޖެހުމާއި ގުޅިގެން އޭނާގެ ޤާނޫނީ ޓީމުން ވަނީ 4 ފަހަރެއްގެމަތިން މި މައްސަލަ ބާޠިލްކޮށްދޭން އެދިފައެވެ.

މި މައްސަލައިގައި ހިމެނޭ، ކުޑަކުދިންނަށް ޖިންސީ ގޯނާ ކުރި ފާދިރީ، ޖޭމްސް ފްލެޗަރގެ މައްޗަށް 9 ކުއްޖަކަށް ޖިންސީ ގޯނާ ކުރި ކަމުގެ ކުށް ސާބިތުވެ އެ މައްސަލައިގައި 2004 ވަނަ އަހަރު އޭނާ ވަނީ ޖަލަށް ލާފައެވެ. އޭގެ 2 އަހަރުފަހުން 2006 ގައި އޭނާ މަރުވީ ޖަލު ޙުކުމް ތަންފީޒު ކުރަމުންދަނިކޮށެވެ.