މައިންބަފައިންނާ ނުލާ ބަންގްލަދޭޝްއަށް އެތެރެވެފައިވާ ރޮހިންޖާ ކުޑަކުދިންނަށް ހާއްސަ ހިޔާތަކެއް ބިނާ ކުރަނީ

މިޔަންމާގެ ރޮހިންޖާ މުސްލިމުންނާ ދެކޮޅަށް އެގައުމުގެ އަސްކަރިއްޔާ އިން ހިންގަމުންދާ ލާއިންސާނީ އަމަލުތަކުން ސަލާމަތްވުމަށް ބަންގްލަދޭޝް އަށް މައިންބަފައިިންނާ ނުލާ އައިސްފައިވާ 6000 ރޮހިންޖާ ކުޑަކުދިންނަށް ވަކި ހިޔާތަކެއް ބިނާކުރަން ރާވަމުންދާ ކަމަށް ބަންގްލަދޭޝްގެ ސަރުކާރުން އަންގާރަ ދުވަހު ބުނެފިއެވެ.

ބަންގްލަދޭޝްގެ ޖޫނިއާ މިނިސްޓަރު ނޫރުއްޒަމާން އަހްމަދު މީޑިއާތަކަށް ވިދާޅުވެފައި ވަނީ އެގައުމުގެ ސޯޝަލް ވެލްފެއާ މިނިސްޓްރީން ކަމާބެހޭ އިދާރާތަކަށް، ކުޑަކުދިންނަށް ހިޔާވަހިކަން ބިނާކުރުމަށްޓަކައި 80 ހެކްޓަރުގެ ބިން ހޯދުމަށް އެދިފައިވާނެ ކަމަށެވެ.

އޯގަސްޓް މަހު ފަހުކޮޅުން ފެށިގެން މިޔަންމާގެ އަސްކަރިއްޔާ އިން ރޮހިންޖާ މުސްލިމުންނާ ދެކޮޅަށް ހިންގަމުންދާ ލާއިންސާނީ ޖަރީމާތަކާ ގުޅިގެން ބަންގްލަދޭޝް އަށް ހިޖުރަކޮށްފައިވާ 400،000 އަށް ވުރެ ގިނަ ރޮހިންޖާ މުސްލިމުންގެ ތެރޭ ކުޑަކުދިންގެ ނިސްބަތް، 60 އިން ސައްތަ އަށް އަރައެވެ.

ބަންގްލަދޭޝް އަށް މައިންބަފައިިންނާ ނުލާ އައިސްފައިވާ 6000 ރޮހިންޖާ ކުޑަކުދިން އެބަތިބި ކަމަށް ބަންގްލަދޭޝްގެ ކަމާބެހޭ ފަރާތްތަކުން ބުނިކަމުގައިވިޔަސް، އދގެ ކުޑަކުދިންނާ ބެހޭ އެޖެންސީ ކަމަށްވާ ޔުނިސެފުން ބުނެފައި ވަނީ އެ އެޖެންސީއަށް ފާހަގަކުރެވިފައި ވަނީ މައިންބަފައިންނާ ނުލާ ބަންގްލަދޭޝްއަށް އެތެރެވެފައިވާ 1800 ކުޑަކުދިން ކަަމަށެވެ.

މިޔަންމާގައި 1.1 މިލިއަން ރޮހިންޖާ މުސްލިމުން އުޅެއެވެ. ގާތްގަނޑަކަށް އެހުރިހާ ރޮހިންޖާ މުސްލިމުން ދިިރިއުޅެނީ މިޔަންމާގެ ހުޅަނގު އައްސޭރިފަށުގެ ސްޓޭޓެއް ކަމަށްވާ ރަކައިން ސްޓޭޓުގައެވެ.