ފުލުހުންގެ ލޯންޗު ރޯކޮށްލި މައްސަލައިގެ އަޑުއެހުމެއް މާދަމާ

މޯލްޑިވްސް ޕޮލިސް ސަރވިސްގެ ލޯންޗެއްގައި ގަސްދުގައި ރޯކޮށްލި މައްސަލައިގައި ދައުވާތައް އުފުލި ދެ މީހުންގެ އަޑުއެހުމެއް އާދިއްތަ ދުވަހު ކްރިމިނަލް ކޯޓުގައި ތާވަލުކޮށްފިއެވެ.

މި މައްސަލައިގެ އަޑުއެހުން ކޯޓުގައި ތާވަލު ކޮށްފައިވަނީ އާދިއްތަ ދުވަހުގެ މެންދުރު 1400 އަށެވެ. މި މައްސަލައިގައި ދައުވާ އުފުލާފައި ވަނީ، ލ. ގަން، ތުނޑި، ލަވްސައިޑް ޢަބްދުއްލަޠީފް އާއި ލ. ކަޅައިދޫ ފިނިހިޔާގެ މޫސާ އިނާސްގެ މައްޗަށެެވެ. 

މި މައްސަލައިގައި މިހިނގާ އޮކްޓޯބަރު މަހުގެ 17 ވަނަ ދުވަހުވެސް އަޑުއެހުމެއް ބާއްވާފައިވެއެވެ. މި އަޑުއެހުމުގައި ދައުލަތުގެ ވަކީލު ވިދާޅުވީ، އިނާސްގެ މައްޗަށް ތުހުމަތު ކުރެވޭ މައްސަލައިގައި ޝަރީއަތް ނިމެންދެން ބަންދު ކުރުމަށް ނިންމާފައިވާ ނިންމުން ދެމެހެއްޓުމަށް އެދޭ ކަމަށެވެ. އެގޮތުން ބަންދު ކުރި ސަބަބު ދެމި އޮތްކަން ފާހަގަ ކުރައްވައި ވަކީލު ވިދާޅުވީ، އިނާސްއަކީ 2007 ވަނަ އަހަރު ސަލްޓަންޕާކު ބޮން ގޮއްވާލި މައްސަލައިގައިވެސް ކުށް ސާބިތުވެ ޙުކުމް ތަންފީޒު ކޮށްފައިވާ މީހެއް ކަމަށެވެ. އަދި އޭނާގެ މައްޗަށް މިހާރު އުފުލާފައިވާ ދައުވާގައިވެސް އެކަށީގެންވާ މިންވަރަށް ހެކި ހުރިކަމަށް ވަކީލު ވިދާޅުވިއެވެ.

ވަކީލު ވިދާޅުވީ، އޭނާ ބަންދުކޮށްފައިވަނީ މުޖުތަމައުގެ ސަލާމަތަށް ބަލާފައި ކަމަށެވެ. އެގޮތުން އޭނާ ރޯކޮށްލާފައިވަނީ ފުލުހުންގެ ލޯންޗެއްގައި ކަމަށާއި، އެކަމުގެ ސަބަބުން ދައުލަތަށް ގެއްލުންވެ، އާންމުންގެ ތެރޭގައި ވެސް ބިރުވެރިކަން އުފެދިފައިވާ ކަމަށެވެ.

މި މައްސަލަ ބައްލަވާ ގާޒީ ސޮފްވަތު ޙަބީބް ވަނީ މިހާރު ހުރި ހެކިތަކަށް ބަލާއިރު އޭނާއަކީ މި މައްސަލައިގެ އިސްކޮށް އުޅުނު ފަރާތްކަމަށް ތުހުމަތު ކުރެވޭކަން ފާހަގަ ކުރައްވައި، ވަށައިގެންވާ ސަބަބުތަކަށް ރިއާޔަތް ކުރައްވައި އިނާސް ޝަރީއަތް ނިމެންދެން ބަންދު ކުރުމަށް ނިންމެވި ނިންމެވުން ދަމަހައްޓަވާފައެވެ. އަދި ބަންދުގައި ތިބި މީހުންގެ ފަރުވާގެ ކަންކަމާމެދު އިހުމާލު ނުވުމަށް ދައުލަތަށްވެސް ހަނދުމަ ކޮށްދެއްވާފައެވެ.

ލ. ގަން، ތުނޑި ބަނދަރު ސަރަހައްދުގައި އޮތް ފުލުހުންގެ ލޯންޗުގައި އަލިފާން ރޯކޮށްލާފައިވަނީ 22 މާރޗު 2020 ދުވަހުއެވެ.