ސީރިއާގައި "މަރުވެފައިވާ" ދިވެއްސެއްގެ ޝަރީއަތުގެ އަޑުއެހުމެއް!
ސުއައިދު ސީރިއާ ހަނގުރާމަ އަށް ދިޔަ
ފުލުހުން އާންމު ކުރި ވީޑިއޯގެ ސްކްރީންޝޮޓެއް: ރިލްވާނަށް ސުއައިދު ފާރަލަނި
ވަގަށް ނަގާފައިވާ މިނިވަން ނޫހުގެ ނޫސްވެރިޔާ އަހުމަދު ރިލްވާން އަބްދުﷲ އަށް ފާރަލުމުގައި އިސްކޮށް ހަރަކާތްތެރިވި މީހެއް ކަމަށް ފުލުހުން ބުނާ ސ. ހުޅުދޫ، އަތިރީއާގޭ މުހައްމަދު ސުއައިދުގެ މައްޗަށް ހިންގާ ޝަރީއަތެއްގެ އަޑުއެހުމެއް ބުރާސްފަތި ދުވަހަށް ތާވަލްކޮށްފި އެވެ.
ސުއައިދުގެ މައްޗަށް އުފުލާފައިވާ ފުލުހުންގެ ދައުރު އަދާކުރުމަށް ހުރި މީހަކަށް ހަމަލާދިނުމުގެ ކުށުގެ ދައުވާ އަޑުއެހުމެއް ބާއްވަން ތާވަލުކޮށްފައި އޮތީ ބުރާސްފަތި ދުވަހުގެ މެންދުރު 2:00 އަށެވެ. ނަމަވެސް، ސުއައިދު ހާޒިރުވެފައިނުވާތީ އަޑުއެހުން ވަނީ ކެންސަލް ކޮށްފަ އެވެ.
ސުއައިދުގެ މައްޗަށް އެ ދައުވާ ކޮށްފައިވަނީ 2013 ވަނަ އަހަރު އެވެ.
ސުއައިދުގެ މައްޗަށް ހިންގާ ޝަރީއަތުގެ އަޑުއެހުމެއް ބާއްވަން މަސައްކަތް ކޮށްފައިވާއިރު، ސީރިއާގައި ހިނގަމުންދާ ހަނގުރާމައިގައި އޭނާ މަރުވެފައިވާ ކަމަށް ވަނީ އަޑު ފެތުރިފަ އެވެ.
މިދިޔަ އަހަރުގެ އޭޕްރީލް ދެ ވަނަ ދުވަހު ފުލުހުން ބޭއްވި ނޫސްވެރިންގެ ބައްދަލުވުމެއްގައި ސްޕްރިންޓެންޑެންޓް އޮފް ޕޮލިސް އަބްދުﷲ ޝަތީހް ވިދާޅުވީ، ރިލްވާނަށް ފާރަލުމުގައި އިސްކޮށް ހަރަކާތްތެރިވީ ސުއައިދު ކަމަށެވެ. އަދި ތަހުގީގަށް ކުރިން އޭނާ ހައްޔަރު ވެސް ކުރި ކަމަށް ވިދާޅުވި އެވެ.
ނަމަވެސް އޭގެ ފަހުން ކޯޓުން ސުއައިދު ދޫކޮށްލާފައިވާ ކަމަށާއި، އަދި އޭނާ މިހާރު ރާއްޖެއިން ބޭރަށް ފުރައިގެން ގޮސްފައިވާ ކަމަށް ޝަތީހު ވިދާޅުވެފައިވެ އެވެ. އަދި އޭނާ ދުނިޔޭގައި ހުރި ކަމެއް އަދި ނެތް ކަމެއް ވެސް ޔަގީންނުވާ ކަމަށް ޝަތީހު ވިދާޅުވެފައިވެ އެވެ.
ފުލުހުން އާންމުކުރި ވީޑިއޯ އިން ފެންނަ ގޮތުގައި، ރިލްވާނުގެ ފަހަތުން މާލޭގެ އެކި މަގުތަކުގައި ސުއައިދު ދުއްވާފައިވެ އެވެ. އަދި ރިލްވާނަށް ފާރަލަމުން ހުޅުމާލޭ ޓާމިނަލަށް ވެސް ސުއައިދު ގޮސްފައިވާއިރު، އެއީ އެންމެ ފަހުން ރިލްވާނު ފެނުނު ސަރަހައްދެވެ.
ފުލުހުން ހާމަކޮށްފައިވާ މައުލޫމާތުތަކަށް ބަލާއިރު، ރިލްވާނު ވަގަށް ނަގައިގެން އަރުވާފައިވަނީ ރަތް ކާރަކަށެވެ. އަދި އެ ކާރުން ފެނުނު އިސްތަށިތައް ރިލްވާނުގެ މަންމަގެ އެމްޓީ ޑީއެންއޭ ލިބިފައިވާ ކަމަށް ވެސް ފުލުހުން ބުނެފައިވެ އެވެ.
ރިލްވާނު ވަގަށް ނެގިތާ ދެ އަަހަރަށް ވުރެ ގިނަ ދުވަސްވެފައިވާއިރު، އެކަމުގައި ބައިވެރިވި ކަމަށް ފުލުހުން ބުނާ ގިނަ މީހުން މިހާރު ވަނީ ރާއްޖެ ދޫކޮށް ގޮސްފަ އެވެ. އެ މައްސަލައާ ގުޅިގެން ފުލުހުންގެ ބަންދުގައި އެއްވެސް މީހަކު މިހާރު ނެތެވެ.
