ސީރިޔާ ސިފައިން ދަތުރުކުރި ބަހެއް ގޮއްވާލައި 13 މީހުން މަރާލައިފި
21 އޮކްޓޯބަރު 2021 | ބުރާސްފަތި 03:11އެ ސަރަހައްދުން އިތުރު ބޮމެއްވެސް ވަނީ ހޯދާފައި
ސީރިއާ ސިފައިންގެ ބަހަކަށް އަމާޒުކޮށް ދިން ހަމަލާއަށްފަހު ބަސް ބޭނުން ނުކުރެވޭ ވަރަށް ވަނީ އަނދާފައި
ސީރިއާގެ ސިފައިން ގޮވައިގެން ދަތުރުކުރި ބަހަކަށް ދިން ހަމަލާއެއްގައި ސިފައިންގެ ތެރެއިން 13 މީހުން މަރުވެ އިތުރު 3 މީހަކު ޒަޚަމް ވެއްޖެއެވެ.
ރިޕޯޓްތައް ބުނާ ގޮތުން ސިފައިން ގޮވައިގެން ދަތުރުކުރި ބަސް ގޮއްވާލައިފައި ވަނީ ވެރިރަށް ދިމިޝްގުގެ މެދުގައިވާ ބްރިޖެއްގެ މަތިން ދަތުރުކުރަމުން ދަނިކޮށެވެ. މިބަހުގައި ދެ ބޮން ހަރުކޮށްފައިވާ ކަމަށާއި، ބޮންތައް ގޮއްވާލައިފައިވަނީ ދުރުން ކޮންޓްރޯލް ކުރެވޭ އެއްޗެއް ބޭނުންކޮށްގެން ބެލެވޭ ކަމަށް މައުލޫމާތު ލިބެއެވެ.
ބަސް ގޮއްވާލިއިރު، އެ ސަރަހައްދުން ސީރިއާ ސިފައިންގެ އިންޖިނިއަރުން ވަނީ އެހެން ބޮމެއް ވެސް ހޯދާފައެވެ.
މި ހަމަލާގެ ޒިންމާ މިހާތަނަށް އެއްވެސް ޖަމާއަތަކުން ނަގާފައިނުވެއެވެ. ސަރުކާރުން ބުނީ މިއީ ސިފައިންނަށް އަމާޒުކޮށްދިން ވަރުގަދަ ޓެރަރިސްޓް ހަމަލާއެއް ކަމަށެވެ.
މިދިޔަ އޮގަސްޓް މަހުގެ ތެރޭގައިވެސް ސީރިއާ ސިފައިންގެ ބަހަކަށް ވަނީ ބޮމުގެ ހަމަލާއެއް ދީފައެވެ. އެހަމަލާގައި އެކަކު މަރުވެ ތިން މީހުން ވަނީ ޒަޚަމްވެފައެވެ.
