މިދުވަސްވަރަކީ އިރުވަޔަށް އެޅުމުގެ ކުރީގައި ދޫނި ސޫފާސޫފި ހިޖުރަކުރާ މޫސުން ކަމަށްވާއިރު ދޫނި ހިޖުރަކުރާ މަގަށް ހުރަސް ނޭޅުމަށް އެންވަޔަރަމެންޓަލް ޕްރޮޓެކްޝަން އެޖެންސީ (އީޕީއޭ)ން ކުރަމުންދާ އިލްތިމާސް ތަކުރާރުކުރައްވައި އެކަމާ ގުޅޭގޮތުން ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވާހަކަފުޅު ދައްކަވައިފިއެވެ.

ބުދަ ދުވަހުގެ ރައްޔިތުންގެ މަޖިލީހުގެ ޖަލްސާ ފައްޓަވަމުން ރިޔާސަތުގައި އިންނަވައި ވާހަކަދައްކަވަމުން ނަޝީދު ވިދާޅުވީ ރާއްޖޭގެ ހުރިހާ ރައްޔިތުންނަށް ވެސް މިއީ ދޫނި ސޫފާސޫފި ހިޖުރަކުރާ މޫސުންކަން ސާފުވަމުންދާކަމަށެވެ. އީޕީއޭން ބުނާގޮތުގައި މިވަގުތު ރާއްޖޭގައި ގުޑުގުޑާ ދޫނި ނުވަތަ ފްލެމިންގޯ ކޮންމެވެސް ވަރަކަށް އުޅޭކަމަށް ނަޝީދު ވިދާޅުވިއެވެ. އެއީ ބައެއް އަހަރު އަހަރު ރާއްޖެއަށް އަންނަ ދޫންޏެއްކަމަށާއި އެދޫނި އާއި އެހެން ދޫނިތައް ހިޖުރަކުރަމުން އެދަނީ ބިސްއަޅާ ވިހެއުމަށް ކަމަށް ނަޝީދު ވިދާޅުވިއެވެ.

އެހެންކަމުން ދޫނި ސޫފާ ސޫފީގެ ހިޖުރައިގެ މަގަށް، ރާސްތާއަށް ހުރަސް އެޅޭ ބާވަތުގެ ކަންކަން ނުކުރުމަށް އީޕީއޭން ވަނީ އިއުލާންކުރައްވާފައިކަމަށް ނަޝީދު ވިދާޅުވިއެވެ.

ގުޑުގުޑާ ދޫނި ނުވަތަ ފްލެމިންގޯ ހިފައި، ވިއްކަން އުޅޭ މައްސަލަ ފުލުހުންނާ ގުޅިގެން ތަހުގީގުކުރަމުން އަންނަ ކަމަށް އީޕީއޭއިން ވަނީ ބުނެފައެވެ. އީޕީއޭން ބުނީ ބައެއް މީހުން މިދޫނިތައް ހިފައި ހައްޔަރުކޮށް ވިއްކާކަމުގެ ޝަކުވާ ލިބެމުންދާ ކަމަށެވެ. އެގޮތުން ބާރަށުގައި، ބަޔަކު ގުޑުގުޑާދޫނި ހިފައި، ވިއްކަން އުޅޭކަމުގެ މައްސަލައެއް ލިބިފައިވާ ކަމަށާއި މި މައްސަލަ މޯލްޑިވްސް ޕޮލިސް ސާރވިސްއާ ގުޅިގެން ތަހުގީގު ކުރަމުންދާ ކަމަށް އީޕީއޭއިން ބުނެއެވެ.

އީޕީއޭއިން ބުނީ މިގޮތަށް ހިމާޔަތްކުރެވިފައިވާ ދޫނިތައް ހިފާ މީހުންނާއި، އަދި މިދޫނިތައް ގަނެވިއްކާ ވިޔަފާރި ކުރަމުންދާ މީހުންނާމެދު "ތިމާވެއްޓަށްދޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލު ހޯދުމުގެ ގަވާއިދު" އާއި "ގުދުރަތީ ގޮތުގައި ނުވަތަ ޠަބީއީ ގޮތުގައި ހިމާޔަތްކޮށް ރައްކައުތެރިކުރާ ދިރޭ ތަކެއްޗާބެހޭ ގަވާއިދު"ގެ ދަށުން ޖޫރިމަނާ ކުރެވޭނެ ކަމަށެވެ.

ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނުގެ ދަށުން ހިމާޔަތްކުރެވިފައިވާ، ހިޖުރަކުރާ ދޫނިތައް ހިފައި ހައްޔަރުކޮށް ގޯނާކުރާ މީހުން ހުއްޓުވުމަށާއި، އަދި މިފަދަ މީހުންނަށް ފާރަވެރިވާން ޖެހޭ ކަމަށް އީޕީއޭއިން ބުނެއެވެ. އެހެންކަމުން މިފަދަ ކަންކަން ކުރާ މީހުންގެ މައުލޫމާތު (ދޫނި ހިފައި، ވިއްކާ ފަރާތުގެ ނަން، ގޭގެ ނަމާއި އަތޮޅާއި ރަށް، އަދި ހިފާވިއްކާ ދޫނީގެ ބާވަތާއި އަދަދު) އަދި ފޮޓޯ މި އެޖެންސީގެ ހޮޓްލައިން ނަންބަރު 7980379ށް މެސެޖުކޮށް ނުވަތަ [email protected] އަށް އީމެއިލް ކޮށްދިނުމަށް އީޕީއޭއިން ވަނީ އެދިފައެވެ.

ރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނާއި މި ގާނޫނުގެ ދަށުން ހެދިފައިވާ ގަވާއިދުތަކާއި ހިމާޔަތްކޮށްފައިވާ ދިރުންތަކާ ގުޅޭގޮތުން އެ އެޖެންސީއިން އަންގާ އެންގުންތަކާއި، މި ގާނޫނާއި ގަވާއިދުތައް ތަންފީޒުކުރުމަށް ހުރިހާ މީހުންގެ އެއްބާރުލުން ބޭނުންވާ ކަމަށެވެ. އަދި، މިހާރު ވެސް އެކި މީހުންގެ ފަރާތުން ލިބެމުންދާ އެއްބާރުލުން އީޕީއޭއިން ފާހަގަކޮށްފައިވެއެވެ.

އަންގާރަ ދުވަހު ރާއްޖޭގެ އެކި ހިސާބުތަކުން ގުޑުގުޑާ ދޫނި ފެނުމާއެކު ގިނަ ބަޔެއްގެ ސަމާލުކަމަށް ވަނީ އެކަން އައިސްފައެވެ.