ކަނޑަށް ވެއްޓި ނިޔާވި ނާހިދާގެ ޖަނާޒާ ބާއްވައިފި، ކުޑަކުއްޖާ އަދިވެސް ހޯދަނީ
ނާހިދާގެ ހަށިގަނޑު ކޯސްޓްގާޑްގެ އެހީތެރިކަމާއެކު މާލެ ގެނެސްފައިވަނީ އާދިއްތަ ދުވަހުގެ ހެނދުނު 7:30ހާއިރު
ނާހިދާގެ މަހާނަ
ހޮނިހިރު ދުވަހު މާލެއިން ވ. އަތޮޅަށް ދަތުރުކުރި ލޯންޗަކުން ކަނޑަށް ވެއްޓި ނިޔާވި މަރިޔަމް ނާހިދާގެ ޖަނާޒާ އާދިއްތަ ދުވަހުގެ އަސުރު ނަމާދަށްފަހު ބާއްވައިފިއެވެ.
ނާހިދާގެ ޖަނާޒާ ބާއްވާފައިވަނީ މަސްޖިދުއް ތައާވުން އާސަހަރާ މިސްކިތުގައެވެ. ނާހިދާގެ މޫނު ދެކިލުމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ ދެކަނބަލުންނާއި ނައިބު ރައީސް ފައިސަލް ނަސީމް ވަޑައިގެންނެވިއެވެ.
އުމުރުން 33 އަހަރުގެ މަރިޔަމް ނާހިދާގެ ހަށިގަނޑު ކޯސްޓްގާޑްގެ އެހީތެރިކަމާއެކު، މާލެ ގެނެސްފައިވަނީ އާދިއްތަ ދުވަހުގެ ހެނދުނު 7:30 ހާއިރުއެވެ. ނާހިދާ ފެނުނު އިރުވެސް އޮތީ ނިޔާވެފައެވެ. ރާއްޖެއެމްވީއަށް މައުލޫމާތުދެމުން ކ. ގުރައިދޫ ހެލްތު ސެންޓަރުން ބުނީ, ނާހިދާ އެ ސެންޓަރަށް ގެނެސްފައިވަނީ ހޮނިހިރު ދުވަހުގެ އިރުއޮއްސި 6:35 ހާއިރު ކަމަށާއި، ގެނައި އިރުވެސް ނިޔާވެފައިވާ ކަމަށެވެ.
މިހާދިސާގައި ކަނޑަށް ވެއްޓުނު ނާހިދާގެ އުމުރުން 4 އަހަރުގެ ކުޑަދަރިފުޅު ހޯދުމުގެ މަސައްކަތް އަދިވެސް އަންނަނީ ކުރަމުންނެވެ. ގެއްލިފައިވަނީ ވ. ފުލިދޫއަށް ނިސްބަތްވާ އުމުރުން 4 އަހަރުގެ ޖައިޝް ޖިނާހްއެވެ. ކުއްޖާ ހޯދުމުގެ މަސައްކަތްކުރަމުންދާއިރު އެމްއެންޑީއެފުން ބުނީ މިހާތަނަށް 10 ސްކޮޔަރ ކިލޯމީޓަރުގެ ސަރަހައްދެއް ބަލާފައިވާކަމަށެވެ. ކުއްޖާ ހޯދުމުގެ މަސައްކަތް ކަނޑުގެ މަގުން ކުރަމުންދާއިރު މީހަކު ގެއްލިގެން ހޯދުމަށް ބޭނުންކުރާ ހުރިހާ ވަސީލަތެއް ބޭނުންކުރަމުންދާކަމަށް އެމްއެންޑީއެފުން ބުނެއެވެ. ނަމަވެސް ކަނޑުގަދަވުމާއި ވިއްސާރުވުމުގެ ސަބަބުން އެންމެ އެކަށީގެންވާ ގޮތުގައި ކުއްޖާ ހޯދުމުގެ މަސައްކަތް ނުކުރެވޭކަމަށް އެމްއެންޑީއެފުން ބުނެއެވެ. ކުއްޖާ ހޯދުމަށް ޑޯނިއަރ ބޭނުންކުރަމުންދޭތޯ ނޫސްވެރިއަކު ކުރި ސުވާލަށް ޖަވާބު ދެއްވަމުން އެމްއެންޑީއެފްގެ އިންފޮރމޭޝަން އޮފިސަރ ވިދާޅުވީ ޓެކްނިކަލް މައްސަލައެއްގެ ސަބަބުން ޑޯނިއަރ ބޭނުންނުކުރާކަމަށެވެ.
ކުޑަކުއްޖާ ހޯދުމަށް އާންމުންގެ އެހީއަށް އެމްއެންޑީއެފުން ވަނީ އެދިފައެވެ. އެކުއްޖާއާ ބެހޭ އެއްވެސް މަޢުލޫމާތެއް ލިބިއްޖެނަމަ ލަސްނުކޮށް, ކޯސްޓްގާޑްގެ ހިލޭ ގުޅޭ ނަމްބަރު 191 ނުވަތަ 3395981 އަދި 3398898 ފޯނަށް ގުޅުމަށާއި, އަދި ފެކްސް ކުރައްވާނަމަ 3391665 ނަމްބަރަށް ފެކްސް ކުރުމަށް އެމްއެންޑީއެފްއިން އެދެއެވެ. މި ހާދިސާ ހިނގާފައިވަނީ ޅ. އޮޅުވެލި ރިސޯޓުގެ އިރު ދެކުނުން 1 ނޯޓިކަލް މޭލުންކަމަށް ލަފާކުރެވޭ ކަމަށާއި, އެކުއްޖާ ލައިގެން ހުރީ ކަޅު ކުލައިގެ ޓީޝާޓެއް ކަމަށް އެމްއެންޑީއެފުން މައުލޫމާތުދެއެވެ
މިލޯންޗުން 12 މީހުންނާއި 2 ކުޑަކުދިން ދަތުރުކުރިއެވެ. އެރި ރާޅާއެކު ނާހިދާއާއި އޭނާގެ ދެކުދިން ކަނޑަށް ވިއްސައިގެން ވެއްޓުނެވެ. މިހާދިސާގައި ނާހިދާ ނިޔާވެފައިވާއިރު އޭނާގެ ދެން ހުރި ކުއްޖާ ވަނީ ސަލާމަތްކޮށްފައެވެ. ފުލުހުން ބުނެފައިވަނީ ލޯންޗުން ދަތުރުކުރި އިތުރު 3 މީހަކަށް އެކިވަރުގެ އަނިޔާ ވެފައިވާކަމަށެވެ.
