"ތްރިފްޓް" ކުރުން: ދިވެހިންގެ ތެރެއަށް ތައާރަފުވި ވަރަށް ސާދާ އާދައެއް!

ޒަމާނުއްސުރެވެސް ދިވެހިންނަކީ ވަރަށް ސާދާ ރީތި އާދަކާދަތަކެއް ގެންގުޅޭ ބައެކެވެ. އާއިލާއެއް ތިމާގެ މީހެއް ނުބަލައި، އެކަކު އަނެކަކާ ގުޅުން އިތުރަށް ބަދަހިކުރުމަށް ގިނަ ކަންތައްތަކެއް ކޮށްއުޅެއެވެ. މިގޮތުން ކައިރި ގޭގެއަށް ޒިޔާރަތްކުރުމާއި، ގޭގައި ކައްކާ އެއްޗެހި އެހެން ގޭގެއަށް ގެންގޮސްދިނުމާއި، އެކި އެކި ކަންކަމުގައި އެކަކު އަނެކަކަށް އެހީތެރިކަން ފޯރުކޮށްދިނުން ފާހަގަކޮށްލެވެއެވެ.

ދިވެހިންގެ މިފަދަ ރީތި ބައެއް އާދަތައް މިހާތަނަށް އައިއިރު ކޮންމެވެސް ވަރަކަށް ފަނޑުވެފައިވީނަމަވެސް މީގެ ތެރެއިން ބައެއް އާދަތައް އަދިވެސް އެބައޮތެވެ. މަންމަމެން މާމަމެން ކިޔައިދޭ ވާހަކަތަކުން އެނގޭ ގޮތުގައި އެއްފަހަރު ނުވަތަ މަދުފަހަރަކު ލާފައި ހުންނަ އަންނައުނު އެހެން މީހުންނަށް ދީ އުޅެއެވެ. އެ ޒަމާނުގައި އަތްމަތި ތަނަވަސްކޮށް ހުރިހާ އެއްޗެއް ލިބިގެން ފުދިގެން އުޅޭ މީހުން ވަރަށް މަދުވާނެއެވެ.

މިހާރު މިވަނީ ޒަމާން ވަރަށް ބޮޑަށް ބަދަލުވެފައެވެ. އެހެންނަމަވެސް އަދިވެސް ދިވެހިންގެ ތެރޭގައި މި ރީތި އާދަ އޮތްކަމީ އުފަލާއެކު ފާހަގަކޮށްލަންޖެހޭ ކަމެކެވެ. އެހެންނަމަވެސް ބަދަލުވި ޒަމާނާއެކު އެއްފަހަރު ލާފައި ހުންނަ އަންނައުނާއި، ބޭނުންކޮށްފައި ހުންނަ އެހެނިހެން ތަކެތި މީހުންނަށް ދޭ ގޮތް މިހާރު ވަނީ ބަދަލުވެފައެވެ.

މިހާރު ގިނަ މީހުން މިކަށް ކުރަނީ އިންސްޓަގްރާމް، ފޭސްބުކް ފަދަ ސޯޝަލް މީޑިއާ ފްލެޓްފޯމްތަކުގައި ޕޭޖުތައް ހަދައިގެން ވިޔަފާރިއެއްގެ ގޮތުގައެވެ. ހަމައެކަނި އަންނައުނެއް ނޫނެވެ. ހިފައި ގެންގުޅޭ ތަކެއްޗާއި، ފޮތްތައްވެސް މެއެވެ. އިނގިރޭސި ބަހުން ނަމަ 'ތްރިފްޓް' ކުރުން މިހާރު ވަނީ ދިވެހިންގެ ތެރޭގައި އާންމުވެފައެވެ. މިއީ ބޭރު ގައުމުތަކުގައިވެސް ކުރަމުން އަންނަ ކަމެކެވެ.

މިގޮތަށް ބޭނުންކޮށްފައި ހުންނަ ތަކެތި ވިއްކުމަށް މީގެ ކުރިން މާލޭގައި ވަކި ސަރަހައްދެއް ކަނޑައަޅާފައި އޮތް ނަމަވެސް ސޯޝަލް މީޑިއާ ޕްލެޓްފޯމްތައް ބޭނުންކޮށްގެން މިކަން ކުރަން ފެށިތާ އަދި މާ ގިނަ އަހަރުތަކެއް ނުވާނެއެވެ. މިވީ މަދު ދުވަސްކޮޅުގެ ތެރޭގައިވެސް މިކަން މިވަނީ ގިނަ ބައެއްގެ މެދުގައި ވަރަށްވެސް މަގުބޫލު ކަމަކަށް ވެފައެވެ. އެއްފަހަރު ބޭނުންކޮށްފައި ހުންނަ އެއްޗެހި ތްރިފްޓު ޕޭޖުތަކުން ވިއްކަނީ ވަރަށްވެސް ކުޑަ އަގެއްގައެވެ. މިގޮތުން 200 ރުފިޔާއަށް ގަނެފައި އެއްފަހަރު ބޭނުންކޮށްފައި ހުންނަ އެއްޗެހި 40 ރުފިޔާއަށް ނުވަތަ 50 ރުފިޔާއަށް ތްރިފްޓް ޕޭޖަކުން ވިއްކާލައެވެ. އަދި އެމީހަކު ހުރި ތަނަކަށް އެ އެއްޗެއް ގެންގޮސްދެއެވެ.

މީގެ ކުރިން މިކަން ކޮށް އުޅުނީ މިގޮތަށް ނޫން ކަމުގައިވިޔަސް، ސޯޝަލް މީޑިއާ މެދުވެރިކޮށް މިކަން ކުރުމުން އަތޮޅުތެރޭގައި ހުންނަ މީހާއަށްވެސް އެ އެއްޗެއް ގަނެވި ބޭނުންކުރުމުގެ ފުރުސަތު ލިބެއެވެ. އަދި އެއްފަހަރު ބޭނުންކޮށްފައި ހުންނަ އެއްޗެހި، އެއަށް ބޭނުންޖެހިފައިވާ އެތައް ބަޔަކާ ހަމައަށް ފޯރުކޮށްދިނުމަށް އިތުރަށް ފަސޭހަވެގެންދެއެވެ. އެންމެންނަކީ ބޮޑު އަގު ދީފައި އެއްޗެހި ގަނެވޭނެ ބައެއް ނޫނެވެ. އެހެންކަމުން ރަނގަޅު ތަކެތި ހެޔޮ އަގުގައި ލިބުމަކީ މީހުންގެ އަތުން ދާ ޚަރަދުވެސް ކުޑަ ކުރެވިގެންދާނެ ކަމެކެވެ.

މީގެ އިތުރުން ގޭގައި ތިބެގެން އާމްދަނީ ހޯދަން މަސައްކަތްކުރާ މީހުންނާއި، އިތުރު އާމްދަނީ ހޯދުމަށް މަސައްކަތްކުރާ މީހުންނަށްވެސް މިއީ ކުރެވިދާނެ ކަމެކެވެ. ތްރިފްޓިން އަކީ މިހާރު ދިވެހިންގެ ތެރޭގައި ވަރަށްވެސް މަގުބޫލުވެފައިވާ ކަމެކެވެ. އަރާ ފައިވާނާއި އަންނައުނުން ފެށިގެން ގޭގައި ހިފައި ގެންގުޅޭ ތަކެތިވެސް "ތްރިފްޓު" ކުރުން ވަނީ އާންމުވެފައެވެ. ބަދަލުވި ޒަމާނާއެކު އެހެން މީހުން ބޭނުންކޮށްފައި ހުންނަ ތަކެތި ބޭނުންކޮށްފައިވާ ގޮތް ބަދަލުވިޔަސް، މިއީ ދިވެހިންގެ ތެރެއަށް އާންމުވި ސާދާ ވަރަށް އާދައެއް ކަމަށް ގިނަ ބަޔަކު ދެކެއެވެ.