ރެޝްފޯޑް ފުޓްބޯޅައަށް އިތުރަށް ސަމާލުކަން ދޭންޖެހޭ: ސޯލްޝެއާ

މެންޗެސްޓާ ޔުނައިޓެޑަށް ކުޅެމުން އަންނަ އިންގްލެންޑުގެ ފޯވާޑް މާކަސް ރެޝްފާޑް ފުޓްބޯޅައަށް އިތުރަށް ސަމާލުކަން ދޭންޖެހޭ ކަމަށް އެ ޓީމުގެ ކޯޗު އޮލެ ގުނަ ސޯލްޝެއާ ބުނެފިއެވެ.

ރެޝްފޯޑް ވަނީ ޔުނިވާސިޓީ އޮފް މެންޗެސްޓާއިން މި މަހުގެ ތެރޭގައި އެމްބީއޭ ހާސިލުކޮށްފައެވެ. މީގެ އިތުރުން ރެޝްފޯޑް ފާހަގަވެގެންދަނީ ބަނޑުހައި ހޫނުކަން މަތީ ދުވަސްތައް ވޭތުކުރުމުން އަންނަ ކުދިންނަށް އެހީވުމުގައި އިސްވެ މަސައްކަތްކުރަމުން އަންނަ ކުޅުންތެރިއެއްގެ ގޮތުގައެވެ.

ދާދި ފަހުން ދިން އިންޓަވިއުއެއްގައި ސޯލްޝެއާ ބުނީ ކުޅުންތެރިއަކަށް ފޯކަސް ކުރެވޭނީ އެންމެ ކަމަކަށް ކަމަށާއި، އެހެންކަމުން ރެޝްފޯޑް ފުޓްބޯޅައަށް އިތުރަށް ސަމާލުކަން ދޭންޖެހޭ ކަމަށެވެ. އަދި ރެޝްފޯޑަކީ ހުނަރުވެރި ފޯވާޑެއް ކަމަށާއި، އަދި އޭނާއަކީ ޔުނައިޓެޑަށް އެހާމެ މުހިންމު ކުޅުންތެރިއެއް ކަމަށްވެސް ބުންޏެވެ.

ކޮނޑުހުޅަށް ލިބިފައިވާ އަނިޔާއިން ރަނގަޅުވުމަށް އޮޕަރޭޝަނެއް ކުރުމާއެކު ރެޝްފޯޑް މި ވަގުތު ހުރީ ކުޅުމާ ދުރުގައެވެ. ރިޕޯޓުތައް ބުނާ ގޮތުން މިދިޔަ ސީޒަނުގެ ފަހުކޮޅުން ފެށިގެން ރެޝްފޯޑުގެ ކޮނޑުހުޅުގައި މައްސަލައެއް ހުރިކަން ވަނީ ފާހަގަކުރެވިފައެވެ. އެއާއެކު މި އަހަރުގެ ޔޫރޯ ފުޓްބޯޅަ މުބާރާތަށްފަހު ރެޝްފޯޑް ކޮނޑުހުޅުގެ އޮޕަރޭޝަނެއް ކުރިއިރު، މި ސީޒަނުގައި އޭނާ އެއްވެސް މެޗެއް އަދި މިހާތަނަށް ކުޅެފައެވެ.

އެ އަނިޔާއިން ރަނގަޅުވެ ކުޅުމުގެ ތެރެއަށް އަންނަން ރެޝްފޯޑް މަސައްކަތްކުރަމުން އަންނައިރު، ސޯލްޝެއާ ބުނީ ރަޝްފޯޑް ކުރިން ހުރި ފޯމަށް އެނބުރި އައުމަށް އޭނާއަށް ދޭން ޖެހޭ ވަގުތު ޔުނައިޓެޑުން ދޭނެ ކަމަށެވެ.

މިދިޔަ ސީޒަނުގެ ފަހުކޮޅުން ފެށިގެން ރެޝްފޯޑުގެ ކޮނޑުހުޅުގައި މައްސަލައެއް ހުރިކަން ފާހަގަވި ނަމަވެސް، މިދިޔަ ސީޒަނުގެ އިނގިރޭސި ޕްރިމިއާ ލީގުގައި ރެޝްފޯޑް ވަނީ މޮޅު ކުޅުމެއް ދައްކާފައެވެ. އެގޮތުން ނިމިދިޔަ ސީޒަނުގެ ޕްރިމިއާ ލީގުގައި ރެޝްފޯޑް ވަނީ ކުޅުނު 37 މެޗުގައި 11 ލަނޑު ޖަހާފައެވެ.