ޖަރުމަން ލީގު ފަށަން ނިންމުމަކީ ފުޓްބޯޅައަށް ލިބުނު ކުރިއެރުމެއް: ކެފެރިން

ނޮވެލް ކޮރޯނާވައިރަސް (ކޮވިޑް-19) އާ ގުޅިގެން މެދުކަނޑާލާފައިވާ ޖަރުމަން ލީގު އަލުން ފަށަން ނިންމުމަކީ ފުޓުބޯޅައަށް ލިބުނު ކުރިއެރުމެއްކަމަށް ޔުއެފާގެ ރައީސް ސްލޮވީނިއާގެ އަލެކްސަންޑަ ކެފެރިން ވިދާޅުވެއްޖެއެވެ.

ޖަރުމަން ލީގު މިމަހުގެ 16 ވަނަ ދުވަހު ފަށަން މިހާރުވަނީ ނިންމާފައެވެ. އެހެންކަމުން ޖަރުމަން ލީގަކީ ކޮވިޑް-19 އާ ގުޅިގެން މެދުކަނޑާލި ލީގުތަކުގެ ތެރެއިން ކުޅުން އަލުން ފަށާނެ އެންމެ ފުރަތަމަ ލީގެވެ.

ޖަރުމަން ލީގު އަލުން ފަށާނީ ސަޕޯޓަރުން ނުވައްދާ މެޗުތައް ކުޅޭ ގޮތަށެވެ. މި މަހުގެ 16 ވަނަ ދުވަހު ޖަރުމަން ލީގު ފަށައި، ޖޫން 28ށް ލީގުގެ ކުޅުން ނިންމަން ވަނީ ތާވަލުކޮށްފައެވެ.

ޔުއެފާގެ ރައީސް އަލެކްސަންޑަ ކެފެރިން ވިދާޅުވީ ކޮވިޑް-19އާ ގުޅިގެން ދުނިޔޭގެ ފުޓުބޯޅަ އެއްކޮށް ހުއްޓުނު ކަމަށާއި، އެކަމަކު މިހާރު މަޑުމަޑުން ފުޓުބޯޅައިގެ ހަރަކާތްތައް ފެށެމުންދާ ކަމަށެވެ. އެގޮތުން ޖަރުމަން ލީގު އަލުން ފަށަން ނިންމި ނިންމުމަކީ ފުޓުބޯޅައަށް ލިބުނު ބޮޑު ކުރިއެރުމެއް ކަމަށްވެސް ވިދާޅުވިއެވެ.

ކެފެރިން ވަނީ ޖަރުމަން ލީގު ފެށުމުގެ ހުއްދަ ދިނުމުން އެ ގައުމުގެ ސަރުކާރަށް ޝުކުރު އަދާކޮށް، ފުޓްބޯޅަ އަލުން ފަށާއިރު ހުރިހާ އެންމެންވެސް ގަވާއިދުތަކަށް ބޯލެނބުމަށް އިލްތިމާސް ކޮށްފައެވެ.

ޖަރުމަން ލީގު އަލުން ފަށަން ނިންމިއިރު، މީގެ ކުރިން ޖަރުމަންގެ ފުރަތަމަ ޑިވިޝަނާއި ދެވަނަ ޑިވިޝަނުގެ ހުރިހާ ކުޅުންތެރިން ވަނީ ކޮވިޑް-19 އަށް ޓެސްޓުކޮށްފައެވެ. އެގޮތުން ދެ ޑިވިޝަނުން 1،724 ކުޅުންތެރިން ކޮވިޑް-19 އަށް ޓެސްޓު ކުރިއިރު، 10 ކުޅުންތެރިއަކު ވަނީ މި ވައިރަސްއަށް ޕޮޒިޓިވްވެފައެވެ. އަދި އޭގެ ކުރިން ކޮލޯންގެ ތިން ކުޅުންތެރިއަކުވެސް ވަނީ ކޮވިޑް-19އަށް ޕޮޒިޓިވްވެފައެވެ.

ޖަރުމަން ލީގުގެ އިތުރުން ތުރުކީ ލީގު ފަށަން ވެސް މިހާރު ވަނީ ނިންމާފައެވެ. އެގޮތުން ތުރުކީން ލީގު ފަށަން ނިންމާފައިވަނީ ޖޫން މަހުގެ 12 ވަނަ ދުވަހުން ފެށިގެންނެވެ. އަދި ޖޫން މަހުގެ 6 ވަނަ ދުވަހު ކްރޮއޭޝިއާ ލީގު ފަށަންވެސް އަންނަނީ މަސައްކަތް ކުރަމުންނެވެ.