ވީޑިއޯ އެސިސްޓަންޓް ރެފުރީ (ވީއޭއާރް) ގެ ސަބަބުން ފުޓްބޯޅައަށް ގެއްލުމެއް ނުވާކަން ޔަގީން ކަމަށް ފީފާގެ ރައީސް ޖިއާނީ އިންފަންޓީނޯ ވިދާޅުވެއްޖެއެވެ.
ޔޫރަޕުގެ ވަރުގަދަ ލީގުތަކުގައި ވީއޭއާރް ބޭނުންކުރަމުން އަންނައިރު، ފީފާއިން އެންމެ ފުރަތަމަ ވީއޭއާރް ބޭނުންކުރި ބޮޑު މުބާރާތަކީ 2018 ވަނަ އަހަރު ރަޝިއާގައި ބޭއްވި ފީފާ ވޯލްޑް ކަޕެވެ. ވޯލްޑް ކަޕުގެ އިޓާލިއަން ލީގާއި ޖަރުމަން ލީގުގައި ވީއޭއާރް ބޭނުންކުރިއިރު، އޭގެ ފަހުން އިނގިރޭސި ޕްރިމިއާ ލީގާއި، ސްޕެނިޝް ލީގާއި، ފްރެންޗް ލީގުގެ އިތުރުން ޔުއެފާއިން އިންތިޒާމުކުރާ މުބާރާތްތަކުގައިވެސް އަންނަނީ ވީއޭއާރް ބޭނުންކުރަމުންނެވެ.
އެކަމަކު ވީއޭއާރް ފުޓްބޯޅައިގައި ބޭނުން ކުރަން ފެށުމުން ގިނަ ކޯޗުންނާއި، ކުޅުންތެރިން އަދި ސަޕޯޓަރުންގެ މެދުގައި ވަނީ ހޫނު ބަހުސްތަކެއް ކުރެވިފައެވެ. އެގޮތުން ފުޓްބޯޅައިގެ ބައެއް ކޯޗުންނާއި ތަޖުރިބާކާރުންވެސް ވަނީ ވީއޭއާރުގެ ސަބަބުން ފުޓްބޯޅައިގެ ފޯރި ކުޑަ ވެގެންދާ ކަމަށް ބުނެފައެވެ. އެކަމަކު އަނެއްބައި މީހުން ބުނަމުން އަންނަނީ ވީއޭއާރުގެ ސަބަބުން ރެފްރީންނަށް ހެދޭ ގޯސްތައް މަދުވެ، ފުޓްބޯޅަ އެހެން ހަރުފަތަކަށް ދާނެ ކަމަށެވެ.
މީގެ ކުރިން ފުޓްބޯޅައިގެ ގަވާއިދުގެ ކަންތައްތަކުގައި އިސްކޮށް ހަރަކާތްތެރިވާ އިންޓަނޭޝަނަލް ފުޓްބޯލް އެސޯސިއޭޝަން ބޯޑް (އައިފެބް) ގެ ބާރުގެ ދަށުގައި ވީއޭއާރް އޮތްއިރު، މި އަހަރުގެ ޖުލައި މަހުގެ ތެރޭގައި ފީފާއިން ވަނީ ވީއޭއާރް ބެލެހެއްޓުން އެ އިދާރާގެ ބެލުމުގެ ދަށަށް ގެންގޮސްފައެވެ.
ދާދި ފަހުން ފީފާގެ ރައީސް ޖިއާނީ އިންފަންޓީނޯ ވިދާޅުވީ ވީއޭއާރް އުފެއްދީ މީގެ ދެ އަހަރު ކުރިން ކަމަށާއި، ވީއޭއާރާއެކު ފުޓްބޯޅައަށް ބޮޑު އިންގިލާބެއް ލިބިގެންގޮސްފައިވާ ކަމަށެވެ. އެގޮތުން ވީއޭއާރުގެ ސަބަބުން ފުޓްބޯޅައަށް ގެއްލުމެއް ނުވާކަން ޔަގީން ކަމަށާއި، އޭގެ ބަދަލު ވީއޭއާރުގެ އެތައް ފައިދާއެއް ފުޓްބޯޅައަށް ކުރަމުން އަންނަ ކަމަށްވެސް ވިދާޅުވިއެވެ.
އިންފަންޓީނޯ އިތުރަށް ވިދާޅުވީ ވީއޭއާރާއެކުވެސް ބައެއް ގޯސްތައް ހެދޭކަން ގަބޫލުކުރާ ކަމަށާއި، އެކަމަކު އެފަދަ ގޯސްތައް ހެދެނީ ވީއޭއާރް ބަލަހައްޓަން ތިބޭ އޮފިޝަލުންގެ ތަޖުރިބާ މަދުވުމުން ކަމަށެވެ. އެހެންކަމުން ވީއޭއާރަށް ފާޑުކިޔުމުގެ ބަދަލުގައި ފުޓްބޯޅަ އިތުރަށް ކުރިއެރުވުމަށް އެންމެން ގުޅިގެން މަސައްކަތް ކުރަންޖެހޭ ކަމަށްވެސް އިންފަންޓީނޯ ވިދާޅުވިއެވެ.
ވީއޭއާރުގެ ދިފާއުގައި އިންފަންޓީނޯ ވާހަކަދެއްކިއިރު، މީގެ ކުރިން ފީފާ ރެފުރީސް ކޮމިޓީގެ ޗެއާމަން އަދި ދުނިޔޭގައި އުފެދުނު އެންމެ މޮޅު އެއް ރެފުރީ ޕިއަރްލުއިޖީ ކޮލީނާވެސް ވަނީ ވީއޭއާރް ދިފާއުކޮށް ވާހަކަދައްކަވާފައެވެ.
ވީއޭއާރަށް ގިނަ ބައެއްގެ ފާޑުކިޔުން އަމާޒުވެފައިވާއިރު، ދާދި ފަހުން ބީބީސީ ސްޕޯޓްއިން ވަނީ ވީއޭއާރާ ދޭތެރޭ ސަޕޯޓަރުން ދެކޭ ގޮތް ބެލުމަށް ޕޯލްއެއް ކުރިއަށް ގެންގޮސްފައެވެ. މި ޕޯލްގައި ވީއޭއާރާ އެއްކޮޅަށް 30 އިންސައްތަ ސަޕޯޓަރުން ވޯޓުދިންއިރު، 44 އިންސައްތަ ސަޕޯޓަރުން ވަނީ ވީއޭއާރުގެ ސަބަބުން ފުޓްބޯޅައިގެ ފޯރި ވަރަށް ބޮޑަށް ގެއްލިގެން ގޮސްފައިވާ ކަމަށް ވޯޓުދީފައެވެ.
