ފްރާންސްގެ ޕީއެސްޖީއަށް މި ސީޒަނުގައި މީހުންގެ ސަމާލުކަން ލިބެމުން ދަނީ ނޭމާގެ ސަބަބުން ކަމަށް ޕޯޗުގަލްގެ ލެޖެންޑް ލުއިސް ފީގޯ ބުނެފިއެވެ.
މިދިޔަ ހޫނު މޫސުމުގެ ޓްރާންސްފާ މާކެޓުގައި ސްޕެއިންގެ ބާސެލޯނާއިން ދުނިޔޭގެ ރެކޯޑު ފީ އެއް ކަމަށްވާ 222 މިލިއަން ޔޫރޯއަށް ޕީއެސްޖީއަށް ނޭމާ ބަދަލުވި ފަހުން އެ ޓީމަށް ޔޫރަޕާއި ދުނިޔޭގެ އެކިކަންކޮޅު ތަކުގައި ލިބެމުން އަންނަ ތަރުހީބު އަންނަނީ އިތުރު ވަމުންނެވެ. އެގޮތުން 2014 ވަނަ އަހަރުގެ ފަހުން މަޝްހޫރު ފޮޓޯ ޝެއާ ކުރާ ޕްލެޓްފޯމެއް ކަމަށްވާ އިންސްޓަގްރަމްގައި އެ ޓީމުގެ ފޮލޯވަރުން އަންނަނީ އިންތިހާއަށް ގިނަވަމުންނެވެ. އެގޮތުން އެ ޓީމަކީ މި ޕްލެޓްފޯމުގައި ހަތް ވަނައަށް އެންމެ ގިނަ ފޮލޯވަރުން ތިބޭ ކުޅިވަރު ކްލަބެވެ.
ފީގޯ ބުނެފައިވަނީ ނޭމާ އަކީ މިވަގުތު ދުނިޔޭގެ އެންމެ މޮޅު ކުޅުންތެރިންގެ ތެރޭގައި ގުނާލެވޭ ކުޅުންތެރިޔެއް ކަމަށާއި އޭނާ ޕީއެސްޖީއާ ގުޅުމަކީ އެ ޓީމަށް ލިބުނު ވަރަށް ބޮޑު ކުރިއެރުމެއް ކަމަށާއި ނޭމާގެ ސަބަބުން ޕީއެސްޖީ ވަރަށް ބޮޑަށް ޓީމެއްގެ ގޮތުގައި ވަރަގަދަ ވެފައިވާކަން ފާހަގަ ކުރެވޭ ކަމަށެވެ. އަދި ނޭމާ އެ ޓީމާއި ގުޅުމުގެ ސަބަބުން ދުނިޔޭގެ އެކި ކަންކޮޅުތަކުން އެ ޓީމަށް ސަޕޯޓު ކުރާ މީހުން ވަރަށް ބޮޑަށް އިތުރު ވެފައިވާ ކަމަށާއި އެކަމުގެ ސަބަބުން އެ ޓީމުގެ މެޗުތަށް ބަލާ މީހުން ވެސް ވަރަށް ބޮޑަށް އިތުރު ވެފައިވާކަން ފާހަގަ ކުރެވޭ ކަމަށް ވެސް ފީގޯ ބުނެފައިވެއެވެ.
ޕީއެސްޖީއަކީ ފޭސްބުކްގައި ވެސް ހަތް ވަނައަށް އެންމެ މަގްބޫލު ކުޅިވަރު ކްލަބެއެވެ. އެގޮތުން ނޭމާ އެ ޓީމާއި ގުޅުނު ފަހުން އެކަނިވެސް 1.4 މިލިއަން މީހުން އެ ކްލަބުގެ ފޭސްބުކް ޕޭޖް ލައިކް ކޮށްފައިވެއެވެ. އަދި އެ ކްލަބަކީ ދެވަނައަށް އެންމެ އަވަހަށް ފޮލޯވަރުން ގިނަވަމުންދާ ކްލަބަށްވާއިރު ގިނަ ބަޔަކު ގަބޫލް ކުރާ ގޮތުގައި މިކަމުގެ އެންމެ ބޮޑު ސަބަބަކީ ނޭމާ އެ ޓީމާއި ގުޅުމެވެ. ނޭމާއަކީ ދުނިޔޭގެ އެންމެ މާކެޓަބަލް އެއް ކުޅުންތެރިޔާއެވެ.
ފީގޯ އިތުރަށް ބުނެފައިވަނީ ގަތަރުގެ ކުންފުނިތަކުން ޕީއެސްޖީއަށް ފައިސާ ފޯރު ކޮށްދިނުމަކީ އެ ޓީމަށް އަގުބޮޑު ކުޅުންތެރިން ގެނައުމަށް އެންމެ ބޮޑަށް ބާރު ލިބޭ ސަބަބު ކަމަށާއި އެހެން ކްލަބުތަކުން ކުޅުންތެރިން ގެނައުމުގައި ޕީއެސްޖީއާ ވާދަނުކުރެވޭނެ ކަން ގަބޫލް ކުރާ ކަމަށެވެ. އަދި ޔުއެފާގެ ފައިނޭންޝިއަލް ފެއާޕްލޭގެ އުސޫލްތަކަށް އެ ޓީމުން ތަބާ ވާނަމަ އެ ކަމުގައި އެއްވެސް މައްސަލައެއް ނެތް ކަމަށް ފީގޯ ބުނެފައިވެއެވެ.
މިދިޔަ ސީޒަނުގެ ފްރެންޗް ލީގު ވާދަވެރި މޮނާކޯއަށް ގެއްލުމާއި ޔުއެފާ ޗެމްޕިއަންސް ލީގުގައި ލަދުވެތި ގޮތަކަށް ބާސާ އަތުން ބަލިވެ އެ ޓީމު ކެޓުމާއި ވިދިގެން ޕީއެސްޖީގެ މެނޭޖްމަންޓުން ވަނީ މިދިޔަ ހޫނު މޫސުމުގެ ޓްރާންސްފާގައި 400 މިލިއަން ޔޫރޯ ހޭދަ ކޮށްފައެވެ. ނޭމާގެ އިތުރުން 180 މިލިއަން ޔޫރޯގެ އެއްބަސްވުމެއްގެ ދަށުން މޯނާކޯއަށް ކުޅެމުން އައި ޒުވާން ފޯވާޑް ކިލިއަން އެމްބާޕޭއާ ބްރެޒިލްގެ ޑެނީ އަލްވޭސް ވެސް ވަނީ އެ ޓީމަށް ގެނެސްފައެވެ.
ޕީއެސްޖީއަށް ބަދަލުވި ފަހުން ނޭމާ އަންނަނީ އެ ޓީމުގައި ރަނގަޅު ކުޅުމެއް ދައްކަމުންނެވެ. އެގޮތުން މިހާތަނަށް ޕީއެސްޖީއަށް ކުޅުނު 15 މެޗުގައި އޭނާ ވަނީ 10 ލަނޑު ޖަހާފައެވެ.
