އަންނަ ސީޒަނަށް ޗެލްސީގެ ސްކޮޑް އިތުރަށް ވަރުގަދަކުރަން އެބަ ޖެހޭކަމަށް ޗެލްސީގެ ކޯޗް ކޮންޓޭ ބުނެފިއެވެ
އެފްއޭކަޕްގެ ފައިނަލުން އާސެނަލް އަތުން ބަލިވި މެޗަށްފަހު މީޑީއާތަކާ ވާހަކަ ދައްކަމުން ޗެލްސީގެ ކޯޗް ކޮންޓޭބުނީ، ފައިނަލުގައި އާސެނަލް އަތުން ބަލި ވުމުން އޭގެ ދޭހަވި އެއްޗަކީ އަންނަ ސީޒަނަށް ޓީމު އިތުރަށް ވަރުގަދަ ކުރަން ޖެހޭ ކަމަށެވެ.
އަދި މެޗުން ބަލިވީ ޗެލްސީއަށް ފެށުން ގޯސްވެގެން ކަމަށްވެސް ކޮންޓެ ވަނީ ބުނެފައެވެ. އިތުރަށް ވާހަކަ ދައްކަމުން ކޮންޓޭ ބުނީ، އަންނަ ސީޒަނަށް ވާދަވެރި ޓީމުތަކުންވެސް މޮޅުތި ކުޅުންތެރިންތަކެއް ގެނެސް ތައްޔާރީތައް ވާނެ ކަމަށާއި، އެހެންކަމުން ޗެލްސީއަށް އަންނަ ސީޒަނަށް ސްކޮޑް އިތުރަށް ވަރުގަދަ ކުރަން ޖެހޭ ކަމަށެވެ. އަދި ލީގު ކާމިޔާބު ކުރުމަށްފަހު ކުޅުނު ފުރަތަމަ މެޗުން ބަލިވުމުން، އަންނަ ސީޒަނަށް ވަރަށް ބޮޑަށް ތައްޔާރުވާން ޖެހިފައި ވާކަން ދޭހަ ވި ކަމަށް ކޯޗު ބުނެފައިވެ އެވެ.
އަންނަ ސީޒަނަށް ސްކޮޑް ވަރުގަދަ ކުރުމަށް ޗެލްސީއިން މިހާރުވެސް ދަނީ މަސައްކަތް ކުރަމުންނެވެ. އެގޮތުން އެޓީމުން މިހާރުވެސް އަންނަ ޓްރާންސްފާއަށް ބައެއް ކުޅުންތެރިންނާއި އެކު މަޝްވަރާ ކުރަމުން ދާކަމަށް މީޑިއާ ރިޕޯޓްތައް ވަނީ ބުނެފައެވެ.
ހޮނިހިރު ދުވަހު ކުޅުނު ފައިނަލް މެޗުގައި ފުރަތަމަ ލަނޑުޖަހާ ލީޑު ނެގީ އާސެނަލްއިން ނެވެ. ނަމަވެސް ޗެލްސީއިން ނަތީޖާ ހަމަހަމަ ކޮށްފައި ވަނިކޮށް ދެވަނަ ފަހަރަށް ލީޑު ނަގައި އާސެނަލްއިން ވަނީ ޗެމްޕިއަންކަން ހޯދާފައެވެ. އަދި ރޭގެ ކާމިޔާބީއަށްފަހު އާސެނަލްގެ ކޯޗު ވެންގާ ވެގެން ގޮސްފައިވަނީ މިހާތަނަށް އެއް ޓީމަކަށް އެންމެ ގިނަ ފަހަރަށް އެފްއޭކަޕް ކާމިޔާބުކޮށްދިން ކޯޗަށެވެ.
