ކޮވިޑް-19 އާ ގުޅިގެން މުޅި ދުނިޔޭގެ ފުޓްބޯޅަ އާމްދަނީއަށް ބޮޑު އަސަރެއް ކޮށްފައިވާ ކަމަށާއި، ފުޓްބޯޅައަށް ލިބުނު ގެއްލުމުގެ އަދަދު 11 ބިލިޔަން ޑޮލަރަށް އަރާނެ ކަމަށް ލަފާކުރެވޭ ކަމަށް ދުނިޔޭގެ ފުޓްބޯޅައިގެ މައި އިދާރާ، ފީފާއިން ބުނެފިއެވެ.

ކޮވިޑް-19 އާ ގުޅިގެން ފީފާއިން ހެދި ސްޓިއަރިންގ ކޮމިޓީގެ ޗެއާމަން އޮލީ ރެއިން ވިދާޅުވީ ކޮވިޑް-19 ގެ ސަބަބުން ފުޓްބޯޅައިގެ ތާވަލުތައް އަވަސް އަރުވާލާއިގެން ރާވަން ޖެހުމާއި، ސަޕޯޓަރުންނާ ނުލައި މެޗުތައް ކުޅެން ޖެހުމާއި، ޓީވީ ރައިޓްސް ޑީލްތަކުގެ އަގު ދަށްވުމުން އެކަމުގެ އަސަރު ކުލަބުތަކަށް ކޮށް، މާލީ ގޮތުން ބޮޑު ގެއްލުމެއް ފުޓްބޯޅައަށް ވެފައިވާ ކަމަށެވެ. އެގޮތުން ފުޓްބޯޅައަށް ލިބުނު ގެއްލުމުގެ އަދަދު 11 ބިލިޔަން ޑޮލަރަށްވުރެ މަތިވާނެ ކަމަށް ރެއިން ވިދާޅުވިއެވެ.

ރެއިން އިތުރަށް ވިދާޅުވީ ފުޓްބޯޅައަށް ލިބުނު މާލީ ގެއްލުމުން އަރައިގަތުމަށް އަހަރެއްހާ ދުވަސް ނާގާނެ ކަމަށާއި، އަންނަ އަހަރަކީ ކުލަބުތައް މާލީ ގޮތުން ގެއްލުމުގައި ހިންގަންޖެހޭނެ އަހަރަކަށް ވެދާނެ ކަމަށެވެ. އަދި ވިދާޅުވީ ކޮވިޑް-19 ރިލީފް ފަންޑަކީ ވަކި ވަގުތެއް ކަނޑައެޅިފައިވާ ފަންޑެއް ނޫން ކަމަށާއި، ކޮންމެ ގައުމަކަށްވެސް އެ ފަންޑު މެދުވެރިކޮށް ލޯނު ނެގުމުގެ ފުރުސަތު އޮންނާނެ ކަމަށެވެ. އެކަމަކު ލޯނު ލިބޭނީ އެނޫން ގޮތެއް ނެތް ގައުމުތަކަށް އެކަނި ކަމަށް ރެއިން ވަނީ ވިދާޅުވެފައެވެ.

ކޮވިޑް-19 އާ ގުޅިގެން ޔޫރަޕްގެ ބޮޑެތި ކުލަބުތައްވެސް ވަނީ އަޑިއަޅާލާފައެވެ. މީގެ ކުރިން ކޮވިޑް-19 އާ ގުޅިގެން މިއަހަރު ބޭއްވުމަށް ހަމަޖެހިފައި އޮތް ޔޫރޯ ފުޓްބޯޅަ މުބާރާތާއި ކޮޕަ އެމެރިކާ ފުޓްބޯޅަ މުބާރާތް، އަންނަ އަހަރަށް ފަސްކޮށްފައިވާއިރު، ޔޫރަޕްގެ ވަރުގަދަ ލީގުތަކުގެ މެޗުތައް ކުޅެމުން ދަނީ ސަޕޯޓަރުން ނުވައްދައެވެ.

މީގެ ކުރިން ފީފާއިން ވަނީ ކޮވިޑް-19 އާ ގުޅިގެން ދިމާވާ މާލީ ގޮންޖެހުންތަކުން އަރައިގަތުމަށް މެންބަރު ކޮންމެ ގައުމަކަށް 150 މިލިޔަން ޑޮލަރުގެ އެހީއެއް ދީފައެވެ. ފީފާ އިން އެފަހަރު ދިން އެހީއަކީ އެ ޖަމުޢިއްޔާއިން 2016 ވަނަ އަހަރު ތައާރަފުކުރި ފޯވާޑް 2.0 ޕްރޮގްރާމުގެ ފަންޑުން ނެގި ބަޔެކެވެ. އެގޮތުން 2019-2022 ގެ މުއްދަތުގައި ފީފާއިން އެ ފަންޑުން ޖުމްލަ 1.746 ބިލިޔަން ޑޮލަރު އެސޯސިއޭޝަންތަކަށް އެހީގެ ގޮތުގައި ދޭން ވަނީ ނިންމާފައެވެ.