ރާއްޖެ ޓީވީން ރާއްޖެ ނިއުސް ނެޓްވޯރކް (އާރު.އެން.އެން)ގެ ނަމުގައި ނިއުސް އެޖެންސީއެއް އިފްތިތާހުކޮށްފިއެވެ.
މިނިއުސް އެޖެންސީ އިފްތިތާހުކުރުމަށް ރާއްޖެ ޓީވީގައި ބޭއްވި ޚާއްސަ ހަފްލާގައި ވަނީ ރާއްޖެ ޓީވީގެ އިސްވެރިންގެ އިތުރުން މުވައްޒަފުންނާއި މިވަގުތު ނިއުސް އެޖެންސީގައި މަސައްކަތްކުރާ މުވައްޒަފުން ބައިވެރިވެފައެވެ. ނިއުސް އެޖެންސީ އާ ގުޅޭގޮތުން އިތުރު މައުލޫމާތު ދެއްވަމުން ރާއްޖެ ޓީވީގެ ހެޑް އޮފް ޕްރޮގްރާމު އާމިރު ސަލީމް ވިދާޅުވީ މަގްސަދަކީ ފުރިހަމައަށް މަސައްކަތްކުރާ ނިއުސް އެޖެންސީއެއް އުފެއްދުންކަމަށެވެ. މިވަގުތު ނިއުސް އެޖެންސީގައި މަސައްކަތްކުރަން ހަމަޖެހިފައިވާ ނޫސްވެރިންނަކީ ކުރިން ނޫސްވެރިކަމުގައި އުޅެފައި ތިބި އެކަމުގެ ތަޖުރިބާ އާއި ތައުލީމުވެސް ލިބިފައިވާ މީހުންނެވެ.
ނިއުސް އެޖެންސީގެ އެންމެ ޚާއްސަ އެއް ކަމަކީ އެމީހަކު ހުރިތާކުން ޚަބަރު ގެނެސްދިނުމުގެ ފުރުސަތު ފަހިވެފައިވުމެވެ. އާމިރު ވިދާޅުވީ ރާއްޖޭގެ އެކި ހިސާބުތަކުގައި ދިރިއުޅެމުން އަންނަ ނޫސްވެރިންނަށާއި ނޫސްވެރިކަން ކުރަން ބޭނުންވާ ފަރާތްތަކަށް އެމީހަކު ހުރިތާކުން ޚަބަރު ގެނެސްދިނުމުގެ ފުރުސަތު މިނިއުސް އެޖެންސީގައި އޮންނާނެކަމަށެވެ. އަދި އެކަމަށް ޝައުގުވެރިވާ ފަރާތްތަކަށް މިހާރުވެސް އެފުރުސަތު ހުޅުވާލާފައިވާކަމަށް އާމިރު ވިދާޅުވިއެވެ.
ރާއްޖޭގައި އަލަށް އުފެދުނު ނިއުސް އެޖެންސީ ލޯންޗްކޮށްފައިވަނީވެސް ރާއްޖޭގެ އެކި ސަރަހައްދުތަކުން ނިއުސް އެޖެންސީގައި މަސައްކަތްކުރާ ނޫސްވެރިންނާ އެކުއެވެ. އެގޮތުން ނިއުސް އެޖެންސީ ލޯންޗުކުރިއިރު ނިއުސް އެޖެންސީގައި ހއ އަތޮޅުން މަސައްކަތްކުރުމަށް ހަމަޖެހިފައިވަނީ ހއ ދިއްދޫން މަލީހާ ރަޝީދެވެ. ކުޅުދުއްފުށި ސިޓީން ނިއުސްއެޖެންސީގައި މަސައްކަތްކުރުމަށް ހަމަޖެހިފައިވަނީ ދިވެހިރާއްޖޭގެ އަޑުން ގިނަ ބަޔަކަށް އެނގިގެންގޮސްފައިވާ އުންމު ކުލްސޫމް އިބްރާހީމެވެ. އައްޑޫ ސިޓީން އައިޝަތު މުހައްމަދު އަދި މެދު ރާއްޖެ ތެރެއިން ނިއުސް އެޖެންސީގައި މަސައްކަތްކުރާނީ ޒަމްއަތު އަހުމަދު ވަހީދެވެ. މިއީވެސް ދިވެހިރާއްޖޭގެ އަޑުގައި ކުރިން މަސައްކަތްކުރުމަށްފަހު ފަހުން ޓީވީއެމްގައި އަދި ވީޓީވީގައި މަސައްކަތްކޮށްފައިވާ ނޫސްވެރިއެކެވެ.
މީގެއިތުރުން ނިއުސް އެޖެންސީގައި ކުރިން ރާއްޖެޓީވީގައި މަސައްކަތްކޮށްފައިވާ ނޫސްވެރިންވެސް މަސައްކަތްކުރާނެއެވެ. އެގޮތުން ރިޒްނާ ޒަރީރު، އަހުމަދު މުހުސިން ނިއުސް އެޖެންސީގައި މަސައްކަތްކުރާނެއެވެ.
އާމިރު ވިދާޅުވީ ނިއުސް އެޖެންސީގެ މަސައްކަތްތައް ކުރިޔަށް އޮތްތަނުގައި ބައްޓަންވެގެންދާނީ އާރުއެންއެންއަށް ސަބްސްކްރައިބް ކުރުމުން އެޖެންސީގައި ހުންނަ ޚަބަރުތައް ދުނިޔޭގެ އެހެން މީޑިޔާ ސްޓޭޝަންތަކަށް ބޭނުންކުރެވޭ ގޮތަށްކަމަށެވެ. އެގޮތުން ބައިނަލްއަގްވާމީ ގޮތުން ރޮއިޓަރސް އަދި އޭއެފްޕީ ފަދަ ތަންތަނުން ޚަބަރާއި މައުލޫމާތު ފަތުރާގޮތަށް ކުރިޔަށް އޮތްތަނުގައި އާރުއެންއެންގެ މަސައްކަތްތައް ބައްޓަންވެގެންދާނެކަމަށް އާމިރު ވިދާޅުވިއެވެ.
