އެމެރިކާގެ ކުރީގެ ރައީސް ބިލް ކްލިންޓަން އާލާސްކަންފުޅަކަށް ފަރުވާ ހޯއްދަވަން ފައްޓަވައިފިއެވެ.
ޑޮކްޓަރުންނާ ޙަވާލާދީ ބޭރުގެ ނޫސްތަކުން ރިޕޯޓު ކޮށްފައިވާ ގޮތުގައި ރައީސް ކްލިންޓަން ވަނީ އިންފެކްޝަންއެއްގެ ސަބަބުން 2 ދުވަަސް ވަންދެން ކެލިފޯނިއާގެ ހޮސްޕިޓަލެއްގައި ފަރުވާ ހޯއްދަވާފައެވެ. އަދި މިހާރު ގެންދަވަނީ ރިކަވަރީ ފަރުވާ ހޯއްދަވަމުންނެވެ.
އުމުރުފުޅުން 74 އަހަރުގެ ކްލިންޓަން ފަރުވާ ހޯއްދަވާފައިވަނީ އިރްވީންގެ މެޑިކަލް ސެންޓަރަކުންނެވެ. އަދި އެމަނިކުފާނު ފަރުވާ ހޯއްދަވާފައިވަނީ ކޮވިޑު ޖެހިވަޑައިގެން ނޫންކަން އެމަނިކުފާނުގެ ތަރުޖަމާނު ވަނީ ނޫސްތަކަށް ކަށަވަރު ކޮށްދެއްވާފައެވެ. އަދި ކްލިންޓަންގެ ހާލުކޮޅު މިހާރު ރަނގަޅުވަމުން އަންނަކަން ވެސް ތަރުޖަމާނު ފާހަގަކުރެއްވިއެވެ.
ތަރުޖަމާނު ވިދާޅުވެފައިވާ ގޮތުގައި ރައީސް ކްލިންޓަން ވަނީ އެމަނިކުފާނަށް ފަރުވާދެއްވި ޑޮކްޓަރުންނާއި ސިއްޙީ ޓީމަށް ޝުކުރު އަދާ ކުރައްވާފައެވެ.
ރިޕޯޓުތައް ބުނާގޮތުން ކްލިންޓަން އެންމެ ފުރަތަމަ ފަރުވާ ހޯއްދަވަން ވަޑައިގެންނެވީ މާބޮޑަށް ވަރުބަލިފުޅުވުމުގެ ސަބަބުންނެވެ. އަދި ހާލަތު ބެލުމަށްފަހު ޑޮކްޓަރުން ވަނީ ރައީސް ކްލިންޓަން "ސެޕްސިސް އިންފެކްޝަން" އަށް ޑައިގްނޯސް ކޮށްފައެވެ. އެއީ ލެޔަށް ޖެހޭ އިންފެކްޝަނެކެވެ. އަދި މިހާރު ކްލިންޓަން ގެންދަވަނީ އެންޓިބައޮޓިކް ނަންގަވަމުންނެވެ. އެހެންނަމަވެސް، ޑޮކްޓަރުން އިތުރަށް ގާތުން ބެލުމަށް ބޭނުންވާތީ އަދިވެސް އޮންނެވީ ހޮސްޕިޓަލުގައި މޮނިޓަރިންގ ގެ ހާލަތުގައެވެ.
ޑިމޮކްރެޓިކް ޕާޓީއަށް ނިސްބަތްވެވަޑައިގަންނަވާ ކްލިންޓަން އެމެރިކާގެ ރައީސްކަން ކުރެއްވީ 1993ން 2001އަށެވެ. ފާއިތުވި އަހަރުތަކުގައި ވެސް އެމަނިކުފާނު ސިއްޙީ އެކި ކަންކަން ތަޙައްމަލު ކުރައްވާފައިވެއެވެ. އެގޮތުން 2004 ވަނަ އަހަރާއި 2010 ވަނަ އަހަރު ހިތުގެ އޮޕަރޭޝަނެއް ކުރައްވާފައިވެއެވެ.
