ގދ. ތިނަދޫން ކޮވިޑް ބަލީގައި އިތުރު މީހަކު ނިޔާވެއްޖެއެވެ.

ތިނަދޫގައި ހުންނަ ޑރ. އަބްދުއްސަމަދު މެމޯރިއަލް ހޮސްޕިޓަލުން ވަނީ ރާއްޖެ އެމްވީއަށް މިކަން ކަށަވަރުކޮށްދީފައެވެ. ރާއްޖެ އެމްވީއަަށް މައުލޫމާތުދެމުން ޑރ. އަބްދުއްސަމަދު މެމޯރިއަލް ހޮސްޕިޓަލުން ބުނީ ތިނަދޫން ކޮވިޑް ބަލީގައި ނިޔާވި މީހާއަކީ ކޮވިޑް ފެސިލިޓީގައި އެޑްމިޓުކޮށްގެން ފަރުވާ ދެމުންދިޔަ މީހެއް ކަމަށެވެ.

ނިޔާވީ އުމުރުން 84 އަހަރުގެ ދިވެހި ފިރިހެނެއް ކަމަށާއި، އޭނާ ނިޔާވީ އަންގާރަ ދުވަހުގެ ފަތިހު 05:21 ގައި ކަމަށް އެ ހޮސްޕިޓަލުން މައުލޫމާތު ދީފައިވެއެވެ.

މިއީ މިހާތަނަށް ތިނަދޫން މި ބަލީގައި ނިޔާވި 5 ވަނަ މީހާއެވެ. އަދި މުޅި ރާއްޖެއިން މި ބަލީގައި ނިޔާވި 235 ވަނަ މީހާއެވެ. އެހެންނަމަވެސް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން މިކަން ރަސްމީކޮށް އަންގާފައެއް ނުވެއެވެ.

މި ބަލީގައި އެންމެ ފަހުން މީހަކު ނިޔާވީ މިމަހުގެ 9 ވަނަ ދުވަހުއެވެ. އެއީ ހުޅުމާލެ މެޑިކަލް ފެސިލިޓީގައި އެޑްމިޓުކޮށްގެން ފަރުވާދެމުންދިޔަ އުމުރުން 72 އަހަރުގެ ދިވެހި އަންހެނެކެވެ. އަދި މިމަހުގެ 8 ވަނަ ދުވަހުވެސް މީހަކު ނިޔާވެފައިވާއިރު، އެއީ އައްޑޫ ކޮވިޑް މެނޭޖްމެންޓް ފެސިލިޓީގައި އެޑްމިޓުކޮށްގެން ފަރުވާ ދެމުންދިޔަ އުމުރުން 97 އަހަރުގެ ދިވެހި ފިރިހެނެކެވެ.