މިފަހަރުގެ އެވޯޑު ހާސިލްކުރީ ނުވަ ނޫސްވެރިއެއް

މޯލްޑިވްސް މީޑިއާ ކައުންސިލް (އެމްއެމްސީ) ގެ ނޫސްވެރިކަމުގެ އެވޯޑު ދީފިއެވެ.

2020 ވަނަ އަހަރުގެ ނޫސްވެރިކަމުގެ އިނާމަށް ތަފާތު 12 ކެޓެގަރީއަކަށް ހުޅުވާލާފައިވާއިރު، ޖުމްލަ 88 ހުށަހެޅުން ލިބިފައިވާކަމަށް އެމްއެމްސީން ބުނެފައިވެއެވެ. އެއީ 56 ނޫސްވެރިންގެ ފަރާތުންނެވެ. އެހެންނަމަވެސް އެކަށީގެންވާ މިންވަރަށް ހުށަހެޅުން ނުލިބޭތީ ދެ ކެޓަގަރީއަކުން އެވޯޑު ދީފައެއް ނުވެއެވެ.

މިފަހަރުގެ އެވޯޑު ހާސިލްކުރި ނޫސްވެރިންގެ ތެރޭގައި ދެ ދާއިރާއަކުން ރާއްޖެ ޓީވީގެ ދެ ނޫސްވެރިއަކު ވަނީ އެވޯޑު ހާސިލުކޮށްފައެވެ. އަދި ތިން ދާއިރާއެއްގެ އެވޯޑު ސަންގު ޓީވީން ހާސިލްކޮށްފައިވެއެވެ.

އެމްއެމްސީން ދޭ ނޫސްވެރިކަމުގެ އިނާމު ދިނުމުގެ އުސޫލުގައި ބަޔާންކުރާ މިންވަރަށް ހުށަހެޅުންތައް ހުށަހަޅާފައި ނެތުމުން މިއަހަރު އެންމެ އުންމީދީ ނޫސްވެރިއަކު ހޮވާފައެއް ނުވެއެވެ.

މިހަފްލާ ޝަރަފުވެރިކޮށްދެއްވާފައިވަނީ މިނިސްޓަރ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމެންޓް އަހުމަދު މަހުލޫފެވެ. މި ރަސްމިއްޔާތުގައި ވާހަކަދައްކަަވަމުން މިނިސްޓަރ މަހުލޫފް ވަނީ ނޫސްވެރިން ކުރާ މަސައްކަތަކީ ވަރަށްވެސް ބުރަ މަސައްކަތެއް ކަމަށް ވިދާޅުވެފައެވެ. ނޫސްވެރިން ވެވަޑައިގަންނަވާ ގުރުބާނީއަކީ އެންމެން ބަލައިގަންނަ ކަމެއް ކަމަށް މިނިސްޓަރ ވިދާޅުވިއެވެ. އެމަނިކުފާނަށް މިހާތަނަށް ކުރެވުނު ތަޖުރިބާއަށް ބަލާއިރު، ރާއްޖޭގައި މަސައްކަތްކުރާ ގިނަ ނޫސްވެރިންނަކީ ވަރަށް ބުރަކޮށް މަސައްކަތްކުރާ ބައެއް ކަމަށް މަހުލޫފު ވިދާޅުވިއެވެ. އަދި އެގޮތުގައި ކުރިއަށްދިއުމަށް މިނިސްޓަރ ވަނީ ނަސޭހަތްތެރިވެވަޑައިގެންފައެވެ.