ދަނޑުވެރިކަން ކުރިއެރުވޭނީ ދަނޑުވެރިކަން ކުރާ ފަރާތްތަކުގެ ޚިޔާލާއި މަޝްވަރާ ހޯދައިގެން ކަމަށް މިނިސްޓްރީ އޮފް ފިޝަރީޒް، އެގްރިކަލްޗަރ އެންޑް މެރިން ރިސޯސަސްގެ ޑިރެކްޓަރ، އެގްރިކަލްޗަރ އެކްސްޓެންޝަން އެންޑް ޓްރެއިނިން ޢަލީ ޢާމިރު ވިދާޅުވެއްޖެއެވެ.
ރާއްޖެޓީވީގެ ފަލަ ސުރުޚީ ޕްރޮގްރާމްގައި ވާހަކަ ދައްކަމުން ޢާމިރު ވިދާޅުވީ ދަނޑުވެރިންގެ ޚިޔާލާއި މަޝްވަރާ ހޯދައިގެން ނޫން ގޮތަކަށް ދަނޑުވެރިކަން ކުރި ނޭރުވޭނެ ކަމަށާއި، އެހެންކަމުން އެކަމާގުޅޭގޮތުން ދަނޑުވެރިންނާ ބައްދަލުކުރަން ނިންމާފައިވާ ކަމަށެވެ. އެގޮތުން ދަނޑުވެރިންގެ ދުވަސް ފާހަގަ ކުރުމަށް ކަނޑޫދޫގައި ބާއްވާ ހަރަކާތްތަކުގެ ތެރޭގައި ދަނޑުވެރިންނާ ބައްދަލުކުރުން ހިމެނޭ ކަމަށް ވިދާޅުވިއެވެ.
ޢާމިރު ވިދާޅުވީ ކަނޑޫދޫގައި ބާއްވާ ފޯރަމަކީ ރާއްޖޭގެ އެކި ހިސާބުތަކުގެ ދަނޑުވެރިންނަށް ބައިވެރިވެވޭނެހެން ބާއްވަން ނިންމާފައިވާ ފޯރަމެއް ކަމަށާއި، އެގޮތުން މިހާތަނަށް އެކި އަތޮޅުތަކަށް މި ފޯރަމުގައި ބައިވެރިވުމަށް ހުށަހަޅާފައިވާނެ ކަމަށާއި، އަދި ގިނަ އަތޮޅުތަކުން ފޯރަމުގައި ބައިވެރިވާނެ ކަމަށް ބެލެވޭ ކަމަށެވެ.
އަދި ދަނޑުވެރިކަން ކުރުމުގައި ތަފާތު އެކިއެކި މައްސަލަތައް ދަނޑުވެރިންނަށް ދިމާވާ ކަމަށާއި، އެ މައްސަލަތައް ދަނޑުވެރިން މިނިސްޓްރީއަށް ހުށަހެޅުމުން ފަންނީ ގޮތުން މިނިސްޓްރީން އެ ހުށަހެޅުންތަކަށް އެހީތެރިކަން ދެމުންގެންދާ ކަމަށެވެ.
