އޯޕަން ޕްރިޒަންއަކުން ރަނގަޅު ރިހެބިލިޓޭޝަން ޕްރޮގްރާމަށް ފުރުސަތު ހުޅުވިގެންދާނެ ކަމަށް ހޯމް މިނިސްޓަރ ޝެއިޚް އިމްރާން އަބްދުﷲ ވިދާޅުވެއްޖެއެވެ.
އޯޕަން ޕްރިޒަނެއް އެޅުމުން މިހާރު ޖަލުތަކުގެ ނިޒާމަށް ބަދަލު އަންނާނެކަން ފާހަގަކުރައްވަމުން މިނިސްޓަރ ވިދާޅުވީ، ކުށްކުރާ ޒުވާނުންގެ އަދަދު ދުނިޔޭގެ ނިސްބަތުން ރާއްޖޭގައި ގިނަ ކަމަށާއި، ޖަލުގައި އެފަދަ ޒުވާނުންނަށް ހިންގަން ޖެހޭ ރިހެބިލިޓޭޝަން ޕްރޮގްރާމް ރަނގަޅަށް ނުހިންގުމުގެ ސަބަބުން ޖަލުން ނުކުންނަތާ މާގިނަ ދުވަސް ނުވެ އަނެއްކާވެސް ކުށެގެ ވެއްޓަށް އެ ޒުވާނުން ވަންނަކަމަށް މިނިސްޓަރ ވިދާޅުވިއެވެ. އޯޕަން ޕްރިޒަންއަކުން އެފަދަ ޒުވާނުންނަށް ރަނގަޅު ރިހެބިލިޓޭޝަން ޕްރޮގްރާމް ހިންގުމުން މިކަމަށް ހައްލު ލިބިގެންދާނެ ކަމަށް ވިދާޅުވިއެވެ.
ޖަލުގައި ޑްރަގް ރިހެބިލިޓޭޝަން ޕްރޮގްރާމް ކުރިން ހިންގާފައި ނުވާ ކަމަށާއި، މިހާރު އެ ޕްރޮގްރާމްތައް ފަށައިގެން ކުރިއަށްދާ ކަމަށް ވިދާޅުވިއެވެ. ޖަލަށް މަސްތުވާތަކެތި އެތެރެކުރުމުގެ ދޮރު މިހާރު ބަންދު ކޮށްފައިވާ ކަމަށް ވެސް މިނިސްޓަރ ވިދާޅުވިއެވެ.
ހދ. ނޭކުރެންދޫގައި ގާއިމްކުރާ އޯޕަން ޕްރިޒަންގެ މަސައްކަތް މިހާރު ގޮސްފައިވާ ހިސާބާ ބެހޭ ގޮތުން މަކުނުދޫ ދާއިރާގެ މެންބަރު މުޙައްމަދު ރާޢީ ކުރެއްވި ސުވާލަށް ހޯމަދުވަހުގެ ޖަލްސާގައި ޖަވާބު ދެއްވަމުން މިނިސްޓަރ ވިދާޅުވީ، ޖަލުތަކުގެ ހާލަތު ރަނަގަޅު ކުރުމަކީ މި ސަރުކާރުގެ ވައުދެއް ކަމަށާއި، ހދ. ނޭކުރެންދޫ ގައި ގާއިމްކުރާ އޯޕަން ޕްރިޒަންގެ މަސައްކަތް ފެށިގެން ދިޔައީ އެގޮތުން ކަމަށެވެ. އަދި 2019 ވަނަ އަހަރު އެ މަސައްކަތް ފެށިގެން ދިޔައިރު، އެ އަހަރުގެ ބަޖެޓްގައި އެކަން ނެތް ކަމަށެވެ. އެހެންނަމަވެސް ޖެހިގެން އައި އަހަރުގެ ބަޖެޓްގައި އެކަން ހިމަނައި އެ މަސައްކަތް ފެއްޓެވި ކަމަށް މިނިސްޓަރ ވިދާޅުވިއެވެ.
މިނިސްޓްރީން ނޭކުރެންދޫގައި ޖަލު އިމާރާތްކުރާ ސަރަހައްދު ބަލައި ބަދަލެއް ގެންނަން ޖެހޭނަމަ އެކަން ބަލައި، މަޝްވަރާ ކުރެވުނު ކަމަށެވެ. އަދި 2020 ވަނަ އަހަރު ބަޖެޓްގައި 17.4 މިލިއަން ރުފިޔާގެ އެ ކަމަށް ކަނޑައެޅުނު ކަމަށެވެ. އެ މަސައްކަތް ފަށައިގެން ކުރިއަށްދަނިކޮށް ކޮވިޑާ ގުޅިގެން ޕީއެސްއައިޕީ މަޝްރޫއުތަކުގެ ބަޖެޓް 150،000 ކުޑަކޮށް ބާކީ ބައި ކަނޑާލަން ޖެހުނު ކަމަށެވެ. އޭގެ ފަހުން ވެސް އެ މަސައްކަތް ހުއްޓުމެއްނެތި ކުރިއަށް ގެންދިޔަ ކަމަށެވެ. އެގޮތުން 2021 ވަނަ އަހަރު މާޗް މަހު އެ ސަރަހައްދުގައި ހުރި ރުއްގަހަށް ބަދަލު ދީ ނިމިފައިވާ ކަމަށެވެ. އީއައިއޭގެ މަސައްކަތް 27 އެޕްރީލް 2021 ގައި ނިމިފައިވާ ކަމަށެވެ.
އެރަށުގެ ބަނދަރުން ޖަލާ ހަމައަށް އޮންނަ ބޮޑު މަގު ފާހަގަކޮށް ސާފުކުރުމަށް ކައުންސިލާ މަޝްވަރާތައް ކުރި ކަމަށެވެ. މަހެއްހާ ދުވަސް ވަންދެން މަޝްވަރާ ކުރެއްވުމަށްފަހު ކައުންސިލްގެ ބަޖެޓުން އެކަން ކުރެވެން ނެތް ކަމަށް ބުނުމުން، ޖަލުގެ ބަޖެޓުން އެމަސައްކަތް މިހާރު ކުރަމުން އަންނަ ކަމަށް ވިދާޅުވިއެވެ.
އޯޕަން ޕްރިޒަންގެ ކޮންސެޕްޓް ޑްރޯވިން މިހާރު ކުރިއަށްދާއިރު، ބައުންޑްރީ ވޯލްގެ މަސައްކަތް ޓެންޑަރ ކުރެވި، 3 ފަރާތަކުން ބިޑް ކޮށްފައިވާކަން މިނިސްޓަރ ފާހަގަކުރެއްވިއެވެ. އެތަނުން ބަޔަކަށް ބިޑް ކާމިޔާބު ކުރެވި، މި އަހަރު ބައުންޑްރީ ވޯލް މަސައްކަތް ފެށޭނެ ކަމުގެ އުއްމީދު އެބައޮތް ކަމަށް މިނިސްޓަރ ވިދާޅުވިއެވެ.
ދައުލަތުގެ އާމްދަނީއާ ކެރިފޯރުންތެރިކަން ހުރި މިންވަރުން މަޝްރޫއުގެ މަސައްކަތް ކުރިއަށްދާކަން މިނިސްޓަރ ފާހަގަކުރެއްވިއެވެ.
