ސައޫދީ ޢަރަބިއްޔާގެ ރިޔާޟްގައި މިދިޔަ އާދީއްތަ ދުވަހު ބޭއްވި ޢަރަބް އިސްލާމިކް-އެމެރިކަން ސަމިޓުގެ ރަސްމީ ލިޔުމެއްގެ ގޮތުގައި، ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމްގެ ބަޔާނެއް ހަމަޖައްސަވައިފި ކަމަށް ރައީސް އޮފީހުން ބުނެފިއެވެ.
ރައީސް އޮފީހުން މިހެން ބުނެފައި މި ވަނީ ސަމިޓްގައި ރައީސް ތަގުރީރުކުރައްވާނެކަން އިއުލާންކުރައްވާފައި ވަނިކޮށް ތަގްރީރުކުރެއްވުމުގެ ކުރިން ސަމިޓް ނިންމާލާފައި ވަނިކޮށެވެ.
ޢަރަބް އިސްލާމިކް އެމެރިކަން ސަމިޓަކީ ދުނިޔެއަށް ކުރިމަތިވެފައިވާ ޓެރަރިޒަމާއި ހައްދުފަހަނަޅައިދިއުމުގެ މައްސަލައާ ދެކޮޅަށް އިސްލާމީ ގައުމުތަކާއި އެމެރިކާއާ ގުޅިގެން މަސައްކަތް ކުރުމަށާއި، ހަމަޖެހުން ގާއިމްކޮށް، އެއްބަޔަކު އަނެއް ބައެއްގެ ތަފާތުތަކަށް އިޙްތިރާމުކުރުން ކުރިއެރުވުމުގެ މަޤްޞަދުގައި ބޭއްވި ސަމިޓެކެވެ.
ރައީސް އޮފީހުން ބުނި ގޮތުގައި ސަމިޓުގެ ރަސްމީ ލިޔުމެއްގެ ގޮތުގައި ހަމަޖެއްސި ރައީސް ޔާމީންގެ ބަޔާނުގައި، އެއްބަޔަކު އަނެއް ބަޔަކަށް އިޙްތިރާމުކޮށް، ގުޅިގެން މަސައްކަތް ކުރުން ކުރިއަށް ނެރެ، އަމާންކަމާއެކީ ހުރިހާ ފަރާތްތަކުން ވެސް އުޅުމަށް ކުރަމުންދާ މަސައްކަތްތައް އިތުރަށް ހަރުދަނާ ކުރުމަކީ ސަމިޓުގައި ބައިވެރިވެވަޑައިގެންނެވި ހުރިހާ ގައުމެއްގެ ވެރިންގެ ވެސް ޒިންމާއެއްކަން ފާހަގަ ކުރައްވާފައިވާ ކަމަށް ރައީސް އޮފީހުން ބުނެއެވެ. އަދި، ރާއްޖެއިން ޓެރަރިޒަމްގެ ހުރިހާ އަމަލުތަކެއްވެ ސް ކުށްވެރިކުރާ ކަމަށާއި، ޒުވާނުން ހައްދުފަހަނަޅައި ދިއުމަށް މަގުފަހިވާ އިޖްތިމާއީ އެކިއެކި މައްސަލަތައް ހައްލުކުރުމުގެ މުހިންމު ކަމުގެ މައްޗަށް އަލިއަޅުއްވައިލައްވާފައިވާ ކަމަށް ވެސް ރައީސް އޮފީހުން ބުނެފައި ވެއެވެ.
މީގެ އިތުރުން ރައީސް އޮފީހުން ބުނީ ރައީސް ޔާމީންގެ ބަޔާނުގައި، ހައްދުފަހަނަޅާފައިވާ ފަރާތްތަކާ ދެކޮޅަށް އަނިޔާވެރިކަން އިސްކުރުމުގެ ބަދަލުގައި، އެފަދަ މައްސަލަތަކާ ދެކޮޅަށް ވަރުގަދައަށް ވަކާލާތުކުރުން މުހިންމު ކަމުގައި ވިދާޅުވެފައިވާ ކަމަށެވެ.
ރައީސް އޮފީހުން ބުނާގޮތުގައި ރައީސް ޔާމީންގެ ބަޔާނުގައި، ޢަރަބި-މުސްލިމް ގައުމުތަކުން މިއަދު ތިބީ، މި ބަހުސްގެ މެދުގައިކަން ހިތާމައާއެކު ފާހަގަ ކުރައްވާފައިވެއެވެ. އަދި، އިސްލާމްދީނުގެ ނަމުގައި ޓެރަރިޒަމްގެ އަމަލުތައް ހިންގަނީ، އިސްލާމްދީނުގެ ތަސައްވުރާއި، އަމަނާއި، އިޙްތިރާމާއި، ހަމަޖެހުމާއި، ތަފާތުތަކަށް ޖާގަ ދިނުމާއި، އިންސާފާއި، އެއްބައިވަންތަކަމަށް ބާރުއަޅާ، އިސްލާމު ދީނުގެ ރީތި ނަން ކިލަނބުކުރަން ކަމުގައިވެސް ރައީސް ޔާމީން ވިދާޅުވެފައިވާ ކަމަށް ރައީސް އޮފީހުން ބުނެއެވެ.
ސަލާމަތީ ކަންކަން ބެލެހެއްޓުމުގައި މިއަދު ކުރިމަތިވާ ގޮންޖެހުންތަކުގެ މައްޗަށް އަލިއަޅުއްވައިލައްވަމުން، އެކި ގައުމުތަކުން ގުޅިގެން ރާވައި ހިންގާ ކުށްތަކުގެ ސަބަބުން އެފަދަ ކުށްތަކުގެ އަޑީގައި ތިބޭ ފަރާތްތައް ހޯދުން ދަތިކަން ރައީސް ޔާމީން ފާހަގަ ކުރައްވާފައިވާ ކަމަށް ވެސް ރައީސް އޮފީހުން ބުނެފައި ވެއެވެ. އެހެންކަމުން، އެކި ގައުމުތަކުން ގުޅިގެން މިފަދަ ޖަރީމާތަކާ ބެހޭ މައުލޫމާތު މިހާރަށްވުރެ އިތުރަށް ހިއްސާ ކުރަންޖެހޭ ކަމުގައި ރައީސް ޔާމީންގެ ބަޔާނުގައި ވިދާޅުވެފައިވާ ކަމަށް ވެސް ރައީސް އޮފީހުނެ ބުނެފައި ވެއެވެ. ހަމަ އެއާއެކު، ޓެރަރިޒަމާ ދެކޮޅަށް އދ. އިން އަޅާ ގާނޫނީ އަދި ދިފާއީ ފިޔަވަޅުތައް އިތުރަށް ވަރުގަދަކޮށް، އެންމެންގެ އެއްބައިވަންތަކަން ކުރިއަށް ނެރުމަށް ރައީސް ޔާމީން ވަނީ ގޮވާލައްވާފަ ކަމަށްވެސް ރައީސް އޮފީހުން ބުނެއެވެ.
ޢަރަބް އިސްލާމިކް އެމެރިކަން ސަމިޓުގެ ރިޔާސަތު ބެލެހެއްޓެވީ ސަޢޫދީ ޢަރަބިއްޔާގެ ރަސްގެފާނު ސަލްމާން ބިން ޢަބްދުލްޢަޒީޒް އާލް-ސަޢުދެވެ. މި ސަމިޓުގައި، އިސްލާމީ ގައުމުތަކުގެ އިސްވެރިންނާއި، އެމެރިކާގެ ރައީސް ޑޮލަންޑް ޓްރަމްޕް ބައިވެރިވެވަޑައިގެންނެވިއެވެ.
ރައީސް ޔާމީން ވަނީ ސަމިޓަށް ފަހު އަންގާރަ ދުވަހު ރާއްޖެ ވަޑައިގެންފައެވެ.
