ފީފާ ވޯލްޑް ކަޕުގެ ޔޫރަޕް ކޮލިފައިންގައި ހޮނިހިރު ދުވަހުގެރޭ ކުޅުނު މެޗުން އެންޑޯރާ ބަލިކޮށް، އަންނަ އަހަރު ގަތަރުގައި ބޭއްވުމަށް ހަމަޖެހިފައިވާ ވޯލްޑް ކަޕަށް ކޮލިފައިވުމާ ގާތަށް އިންގްލެންޑް ޖެހިލައިފިއެވެ.

ކޮލިފައިންގެ ގްރޫޕް އައިގައި ހިމެނޭ އިންގްލެންޑް މޮޅުވީ އެންޑޯރާ އަތުން ފަސޭހަކަމާއެކު 5-0 ގެ ނަތީޖާއަކުންނެވެ. މި މޮޅާއެކު އިންގްލެންޑުން ވަނީ ވޯލްޑް ކަޕް ކޮލިފައިންތަކުގައި ބަލިނުވެ 28 މެޗު ހަމަކޮށްފައެވެ.

އެންޑޯރާގައި ކުޅުނު މި މެޗު ފަށައިގެން 17 ވަނަ މިނެޓުގައި އިންގްލެންޑުން ވަނީ ލީޑު ނަގާފައެވެ. ޖޭޑަން ސަންޗޯ ދިން ބޯޅައަކުުން މި ލަނޑު އެ ޓީމަށް ކާމިޔާބުކޮށްދިނީ ބެން ޗިލްވެލްއެވެ. އަދި ފުރަތަމަ ހާފު ނިމެން ފަސް މިނެޓަށް ވެފައި ވަނިކޮށް ފިލް ފޯޑެން ދިން ބޯޅައަކުން ބުކާޔޯ ސަކާ ވަނީ ލަނޑެއް ޖަހައި، އިންގްލެންޑުގެ ލީޑު ފުޅާކޮށްދީފައެވެ.

މި މެޗުގައި އިންގްލެންޑުން ޖެހި ތިންވަނަ ލަނޑު ދެވަނަ ހާފު ފަށައިގެން 14 ވަނަ މިނެޓުގައި ކާމިޔާބުކޮށްދިނީ ޓެމީ އަބްރަހަމެވެ. މި ސީޒަނުގައި ރޯމާއަސް ބަދަލުވެ މޮޅު ކުޅުމެއް ދައްކަމުން އަންނަ އަބްރަހަމް މި މެޗުގައި ލަނޑު ޖެހިއިރު، އޭނާއަށް އިންގްލެންޑުގެ ސްކޮޑުން ފުރުސަތު ދީފައި މި ވަނީ މިދިޔަ އަހަރުގެ ނޮވެމްބަރު މަހަށް ފަހުއެވެ.

ދެން މި މެޗުގައި އިންގްލެންޑުން ކާމިޔާބުކުރި އަނެއް ދެ ލަނޑު ޖަހައިދިނީ ޖޭމްސް ވޯޑް-ޕްރައުސް އާއި ޖެކް ގްރީލިޝްއެވެ. މި މެޗުގައި ގްރީލިޝް ލަނޑު ޖެހިއިރު، މިއީ މިދިޔަ އަހަރުގެ ސެޕްޓެމްބަރު މަހު އިންގްލެންޑުގެ ސްކޮޑުން ޖާގަ ހޯދި ގްރީލިޝް، ގައުމީ ޓީމުގެ ޖާޒީގައި ކާމިޔާބުކުރި ފުރަތަމަ ލަނޑެވެ.

މި މޮޅާއެކު ކޮލިފައިންގެ ގްރޫޕް އައިގެ އެއްވަނައިގައި އިންގްލެންޑް އޮތީ ކުޅުނު ހަތް މެޗުން ލިބުނު 19 ޕޮއިންޓާއެކުއެވެ. ދެވަނައިގައި އޮތް އަލްބޭނިއާއަށް ހަތް މެޗުން 15 ޕޮއިންޓް ލިބިފައިވާއިރު، ތިންވަނައިގައި އޮތް ޕޮލެންޑަށް ހަތް މެޗުން ލިބިފައިވަނީ 14 ޕޮއިންޓެވެ.