ރާއްޖެއިން ދަތުރުފަތުރުގެ ނިޒާމު ކުރިއަރުވަން ކުރާ މަސައްކަތްތައް ހިއްސާކުރައްވައިފި
މިނިސްޓަރ ނަހުލާ ވަނީ މިނިސްޓީރިއަލް ރައުންޑް ޓޭބަލް ޑިސްކަޝަންގައި ބައިވެރިވެވަޑައިގެންފައި
ޓްރާންސްޕޯޓް އެންޑް ކޮމިއުނިކޭޝަން ފޯރަމްގައި ޓްރާންސްޕޯޓް މިނިސްޓަރ އައިޝަތު ނަހުލާ ވާހަކަދައްކަވަނީ
12 ވަނަ ޓްރާންސްޕޯޓް އެންޑް ކޮމިއުނިކޭޝަން ފޯރަމްގައި ދިވެހިރާއްޖޭގެ ޓްރާންސްޕޯޓް މިނިސްޓަރ އައިޝަތު ނަހުލާ ބައިވެރިވެވަޑައިގެންފިއެވެ.
12 ވަނަ ޓްރާންސްޕޯޓް އެންޑް ކޮމިއުނިކޭޝަން ފޯރަމްއަކީ މިމަހުގެ 6އިން 8 އަށް ތުރުކީގެ އިސްޓަމްބޫލްގައި ކުރިއަށްދާ ފޯރަމްއެކެވެ. މިއަހަރުގެ ފޯރަމްގައި 55 މެމްބަރު ގައުމަކުން ވަނީ ބައިވެރިވެފައެވެ.
ދިވެހިރާއްޖޭގެ ޓްރާންސްޕޯޓް މިނިސްޓަރ ތުރުކީއަށް ކުރައްވަމުންގެންދަވާ ރަސްމީ ދަތުރުފުޅުގައި ވަނީ 12 ވަނަ ޓްރާންސްޕޯޓް އެންޑް ކޮމިއުނިކޭޝަން ފޯރަމްގައި ބައިވެރިވެވަޑައިގެންފައެވެ. މި ފޯރަމް ހުޅުވުމުގެ ރަސްމިއްޔާތުގައި މިނިސްޓަރ ނަހުލާ ވަނީ ފޯރަމްގައި ބައިވެރިވެވަޑައިގެންނެވި މިނިސްޓަރުންގެ މެދުގައި ކުރިއަށްދިޔަ ވަށް މޭޒުގެ މަޝްވަރާތަކުގައި ބައިވެރިވެވަޑައިގެންފައެވެ.
މި މަޝްވަރާތަކުގައި ބައިވެރިވެވަޑައިގެން މިނިސްޓަރ ނަހުލާ ވަނީ ރާއްޖޭގެ ދަތުރުފަތުރުކުރުމުގެ ނިޒާމު ހަރުދަނާ ކުރުމަށް މިހާރު ކުރައްވަމުންގެންދަވާ މަސައްކަތްތައް ހިއްސާކުރައްވާފައެވެ. މީގެ އިތުރުން 2030 ވަނަ އަހަރުގެ ކުރިން ރާއްޖެއަކީ ނެޓް-ޒީރޯ ގައުމަކަށް ހެދުމަށް ސަރުކާރުން ކުރަމުންދާ މަސައްކަތްތަކުގެ މައްޗަށް ވެސް މިނިސްޓަރ ވަނީ އަލިއަޅުވައިލައްވާފައެވެ.
މި ފޯރަމްގައި ވަށް މޭޒު ބައްދަލުވުންތަކުގެ އިތުރުން ސެކްޓޯރަލް ސެޝަންތަކާއި، ގައުމުތަކުގެ މެދުގައި ކުރިއަށްދާ ބައްދަލުވުންތަކާއި، ޕެނަލް ޑިސްކަޝަންއެއް ވެސް ކުރިއަށްގެންދާނެއެވެ.
މި ބައްދަލުވުންތަކުގައި މުޅި ދުނިޔެއަށް އިންގިލާބީ ބަދަލެއް ގެނުވާނެފަދަ ދަތުރުފަތުރުގެ ބޮޑެތި ޕްރޮޖެކްޓުތަކާއި، މި ސިނާއަތް ކުރިއެރުވުމާއި، ސިނާއަތުގެ ކުރިއެރުމާއެކު ކޮވިޑް-19ގެ ހާލަތުގެ ފަހުން އިޤްތިޞާދު ކުރިއަރުވަން ކުރެވޭނެ ކަންކަމާއި، ގައުމުތަކުގައި ހުރި ކަމާގުޅޭ އެކި މައްސަލަތައް ހައްލުކުރުމަށް މަޝްވަރާކުރެވޭނެއެވެ.
