ކުރިން ރާއްޖެއަކީ މެރިޓައިމް ދާއިރާގައި ނަން މަޝްހޫރު ޤައުމެއް
ޓްރާންސްޕޯޓް މިނިސްޓަރ ނަހުލާ
ކުރީ ސަރުކާރުތަކުން ރާއްޖޭގެ މެރިޓައިމް ދާއިރާ ތަރައްގީ ކުރަން އެކަށީގެންވާ މަސައްކަތެއް ކޮށްފައި ނުވާތީ އެ ސިނާއަތަށް ވަރަށް ބޮޑު ހީނަރުކަމެއް ލިބިފައިވާ ކަމަށް ޓްރާންސްޕޯޓް މިނިސްޓަރު އައިޝަތު ނަހުލާ ވިދާޅުވެއްޖެއެވެ.
މިނިސްޓަރު މިފަދައިން ވިދާޅުވީ ބައިނަލްއަގުވާމީ ކަނޑުދަތުރާ ބެހޭ ދުވަސް ފާހަގަކުރުމަށް އަންގާރަ ދުވަހުގެ ރޭ ބޭއްވި ރަސްމިއްޔާތުގައި ވާހަކަދައްކަވަމުންނެވެ. ނަހުލާ ވިދާޅުވީ ކުރީ ސަރުކާރުތަކުން އެ ދާއިރާ ކުރިއަރުވަން މަސައްކަތް ކޮށްފައި ނުވި ނަމަވެސް މި ސަރުކާރުން އެ ދާއިރާ ކުރިއެރުވުމަށް ހާއްސަ އިސްކަމެއް ދޭ ކަމަށެވެ. އެގޮތުން، މެރިޓައިމް ދާއިރާއިން މީހުން ބިނާ ކުރުމަށް ސަރުކާރުން މިހާރު މަސައްކަތް ކުރަމުން އަންނަ ކަމަށާއި އޭގެ ސަބަބުން ރާއްޖެއަށް ގިނަ ފައިދާތަކެއް ވާނެ ކަން މިނިސްޓަރު ފާހަގަކުރެއްވިއެވެ.
ރާއްޖެއަކީ މީގެ ކުރިން މެރިޓައިމް ދާއިރާގައި ބައިނަލްއަގުވާމީ ގޮތުން ފާހަގަކޮށްލެވޭ ޤައުމެއްކަން ފާހަގަކުރައްވާ ނަހުލާ ވިދާޅުވީ އޭރު އެ ދާއިރާގައި މަސައްކަތް ކުރި މީހުންނަކީ މިއަދު ކާމިޔާބު ބައެއް ކަމަށެވެ.
ބައިނަލްއަގުވާމީ ކަނޑުދަތުރާ ބެހޭ ދުވަސް ފާހަގަކުރުމަށް ޓްރާންސްޕޯޓް މިނިސްޓްރީއާއ މޯލްޑިވްސް ސްޓޭޓް ޝިޕިން އާ ގުޅިގެން ވަނީ "މެރިޓައިމް ސޭފްޓީ ވީކް" ގެ ނަމުގައި ހާއްސަ ހަފްތާއެއް ފާހަގަ ކުރުމަށް ވެސް ނިންމާފައެވެ. މި ހަފްތާ ފާހަގަކުރުމަށް ހާއްސަ ހަރަކާތްތަކެއް ވެސް ވަނީ ރާވާފައެވެ.
މިއަހަރުގެ ކަނޑުދަތުރާ ބެހޭ ދުވަސް ފާހަގަ ކުރާނީ މި މަހުގެ 29 ވަނަ ދުވަހުއެވެ. މިއަހަރުގެ ޝިއާރަކީ "ނިއު ޓެކްނޮލޮޖީސް ފޯރ ގްރީނާ ޝިޕިން"އެވެ. އެހެންވެ މެރިޓައިމް ސޭފްޓީ ވީކް ހާއްސަކޮށްފައިވަނީ އަންނަ އޮތް ޖީލަށް ކަމަށް މިނިސްޓަރު ނަހުލާ ފާހަގަކުރެއްވިއެވެ.
ބައިނަލްއަގުވާމީ ކަނޑުދަތުރާ ބެހޭ ދުވަސް ފާހަގަކުރުމަށް ބޭއްވި ރަސްމިއްޔާތުގައި މެރިޓައިމް ދާއިރާއާ ގުޅުންހުރި ތިން ފޮތެއް ވެސް ވަނީ ތައާރަފު ކޮށްފައެވެ. މީގެ ތެރޭގައި ސްކޫލް ކުދިންނަށް ހާއްސަ ދެ ފޮތާއި އުޅަނދުތަކުގެ ވެރިންނާއި އޮޕަރޭޓް ކުރާ ފަރާތްތަކުގެ އިތުރުން ކެޕްޓަނުންނަށް ހާއްސަ ފޮތެއް ހިމެނެއެވެ. މި ފޮތްތައް ތައާރަފު ކޮށްދެއްވީ މިނިސްޓަރު ނަހުލާ އާއި މިނިސްޓަރ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމެވެ.
