މޯލްޑިވްސް ރިފޯމް މޫވްމަންޓް (އެމްއާރްއެމް) އަލަށް އިންތިޚާބުވި އެކްސްކޯގެ ތެރޭގައި ވަކި އާއިލާއަކަށް ނިސްބަތްވާ ގިނަ ބަޔަކު ނުތިބޭނެ ކަމަށް އެ ޕާޓީގެ ރައީސް ފާރިސް މައުމޫން ވިދާޅުވެއްޖެއެވެ.
އެމްއާރްއެމްއިން ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ފާރިސް ވިދާޅުވީ އާއިލާގެ ބައެއް މެމްބަރުން ލީޑަރޝިޕްގެ މަގާމުތަކުގައި ތިއްބެވި ނަމަވެސް ޕާޓީގެ ޒައީމު ކުރީގެ ރައީސް މައުމޫން އަބްދުލް ގައްޔޫމް ހުންނެވި މަގާމަކީ ސީދާ ޕާޓީ ހިންގެވުން ނޫން ކަމަށެވެ. ފާރިސް ވިދާޅުވީ ޕާޓީން އަބަދުވެސް އަމަލުތައް ހުންނަ ގޮތާއި އުސޫލުތައް ހުންނަ ގޮތް ދައްކަމުން އަންނަ ކަމަށާއި އިންތިޚާބަށް ހުޅުވާލިއިރު ޕާޓީގެ ހަރަކާތްތަކާއި މައުލޫމާތު ދިނުން މަދުވެފައިވާތީ އިންތިޚާބަށް ކުރިމަތިލި މީހުންގެ އަދަދު މަދު ކަމަށެވެ.
ފާރިސް ވިދާޅުވީ މަސައްކަތް ރޭވިފައި އޮތް ގޮތުން މިހާރު ޕާޓީގެ ކަންކަމުގައި ހަރަކާތްތެރިވާނީ މިހާރުގެ ލީޑަރޝިޕުން ކަމަށެވެ. އަދި މަގުން ކައްސާލައިގެން ދާ ހިނދު ނޫނީ ލަފަޔެއް ބޭނުންވާ ހިނދު ޕާޓީގެ ޒަޢީމު ހުންނަވާނެ ކަމަށެވެ. ޕާޓީ ހިންގުމުގައި އަދި ސިޔާސަތުތައް ކަނޑައެޅުމުގައި ވެސް ދެން ހަރަކާތްތެރިވާނީ މި އައު ލީޑަރޝިޕުން ކަމަށް ފާރިސް ވިދާޅުވިއެވެ.
ނޫސްވެރިންގެ ބައްދަލުވުމުގައި ވާހަކަ ދައްކަވަމުން ފާރިސް އިތުރަށް ވިދާޅުވީ ސިޔާސީ މަގުސަދެއް ހާސިލްކުރުމަށް ޕާޓީގެ އުސޫލުތައް ދޫނުކުރާނެ ކަމަށެވެ. ފާރިސް ވިދާޅުވީ ޕާޓީގެ އުސޫލުތައް ދޫނުކުރައްވާނެ ކަމަށާއި ގާތް މީހަކަށް މަންފާ ހޯދުމަށް ވެސް ޕާޓީގެ އުސޫލުތައް ބަދަލުނުކުރައްވާނެ ކަމަށެވެ. ކުށެއް ކުރިޔަސް ގާނޫނުގެ އަތް ނުފޯރާ ބައެއް އެބަތިބިކަމަށް ރައްޔިތުން ބުނަމުންދާ ކަމަށާއި ޕާޓީން ބޭނުންވަނީ މިކަންތައްތައް ނައްތާލުމަށް ކަމަށް ފާރިސް ވިދާޅުވިއެވެ.
މި މަސައްކަތުގައި ގޮންޖެހުންތައް ހުރިކަން ފާހަގަކުރައްވާ ފާރިސް ވިދާޅުވީ ޓެކްނިކަލް ލެވަލްގައި ކަންތައްތައް ހައްލުކުރުމަށް މަސައްކަތް ކުރަން ޖެހޭ ކަމަށެވެ. ރާއްޖޭގައި މިހާރު އުފެދިފައިވާ ޕޮލިޓިކަލް ކަލްޗަރ ބަދަލު ކުރަން ޖެހޭނެ ކަމަށާއި އެމްއާރްއެމްއިން ސާބިތުކަމާއެކު އެ އަމާޒަށް ވާސިލްވުމަށް މަސައްކަތް ކުރާނެ ކަމަށް ވެސް ވިދާޅުވިއެވެ.
ޕާޓީގެ މަސައްކަތްތަކަށް އަލިއަޅުއްވާލައްވައި ފާރިސް ވިދާޅުވީ އިންތިގާލީ މަރުހަލާގެ ކަންތައްތައް ކޮވިޑުގެ ސަބަބުން ލަސްވެގެން ދިޔަ ކަމަށެވެ. އެހެންނަމަވެސް މިހާރު ޕާޓީގެ އައު ލީޑަރޝިޕް އުފެދި، ހަރަކާތްތައް އިތުރަށް ފުޅާވެގެންދާނެ ކަމަށެވެ. ޕާޓީން ސިޔާސަތުތައް ކަނޑައަޅާނީ ރައްޔިތުންނާ މަޝްވަރާ ކުރުމަށްފަހު ކަމަށާއި, ރައްޔިތުންނާ ހަމައަށް ޕާޓީގެ ސިޔާސަތުތައް ހާމަކޮށްދިނުމަށް މަސައްކަތް ކުރައްވާނެ ކަމަށް ވެސް ވިދާޅުވިއެވެ.
ގައުމުގެ ހުރިހާ ކަމެއްގައި އަންހެނުންގެ ބައިވެރިވުން އޮންނަން ޖެހޭނެ ކަމަށާއި އެ އުސޫލުގެ ދަށުން އެމްއާރްއެމްގެ 50 އިންސައްތަ ހިއްސާވާނީ އަންހެނުންކަމަށް އެޕާޓީން ބުންޏެވެ. އަދި އެކްސްކޯގެ 30 އިންސައްތަ އަކީ ޒުވާނުން ކަމަށް ކަނޑައަޅާފައިވާ ކަމަށާއި, ޕާޓީން ޒުވާނުންނަށް ހުރި ދަތިތައް ހައްލުކުރުމަށް ކައިރިއިން މަސައްކަތް ކުރާނެ ކަމަށް ވިދާޅުވިއެވެ. ޕާޓީން ކަންކަމުގައި ގޮތް ނިންމާއިރު ޒުވާނުންގެ ބަސް ހިމަނައިގެން ނިންމުންތައް ނިންމާނެ ކަމަށާއި ޕާޓީން ކުރިއަތް އޮތް ދުވަސްތަކުގައި އިތުރު ހަރަކާތްތައް ހިންގައި, މަސައްކަތްތައް އިތުރަށް ހަރުދަނާ ކުރުމަށް މަސައްކަތް ކުރައްވާނެކަމަށް ވެސް ފާރިސް ވިދާޅުވިއެވެ.
