ސިޔާސީ މަގުސަދު ހާސިލްކުރުމަށް، ޕާޓީގެ އުސޫލުތައް ދޫނުކުރާނެ: ފާރިސް
ރާއްޖޭގައި މިހާރު އުފެދިފައިވާ ޕޮލިޓިކަލް ކަލްޗަރ ބަދަލު ކުރަން ޖެހޭ
އެމްއާރްއެމްއިން ބޭއްވި ނޫސްވެރިންގެ ބައްދަލުވުމުގެ ތެރެއިން
ސިޔާސީ މަގުސަދު ހާސިލްކުރުމަށް ޕާޓީގެ އުސޫލުތައް ދޫނުކުރާނެ ކަމަށް މޯލްޑިވްސް ރިފޯމް މޫވްމަންޓް (އެމްއާރްއެމް)ގެ ރައީސް ފާރިސް މައުމޫން ވިދާޅުވެއްޖެއެވެ.
އެމްއާރްއެމްއިން ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ފާރިސް ވިދާޅުވީ ޕާޓީގެ އުސޫލުތައް ދޫނުކުރައްވާނެ ކަމަށާއި ގާތް މީހަކަށް މަންފާ ހޯދުމަށް ވެސް ޕާޓީގެ އުސޫލުތައް ބަދަލުނުކުރައްވާނެ ކަމަށެވެ. ކުށެއް ކުރިޔަސް ގާނޫނު އަތް ނުފޯރާ ބައެއް އެބަތިބިކަމަށް ރައްޔިތުން ބުނަމުންދާ ކަމަށާއި ޕާޓީން ބޭނުންވަނީ މިކަންތައްތައް ނައްތާލުމަށް ކަމަށް ފާރިސް ވިދާޅުވިއެވެ.
މި މަސައްކަތުގައި ގޮންޖެހުންތައް ހުރިކަން ފާހަގަކުރައްވާ ފާރިސް ވިދާޅުވީ ޓެކްނިކަލް ލެވަލްގައި ކަންތައްތައް ހައްލުކުރުމަށް މަސައްކަތް ކުރަން ޖެހޭ ކަމަށެވެ. ރާއްޖޭގައި މިހާރު އުފެދިފައިވާ ޕޮލިޓިކަލް ކަލްޗަރ ބަދަލު ކުރަން ޖެހޭނެ ކަމަށާއި އެމްއާރްއެމްއިން ސާބިތުކަމާއެކު އެ އަމާޒަށް ވާސިލްވުމަށް މަސައްކަތް ކުރާނެ ކަމަށް ވެސް ވިދާޅުވިއެވެ.
ޕާޓީގެ މަސައްކަތްތަކަށް އަލިއަޅުއްވާލައްވައި ފާރިސް ވިދާޅުވީ އިންތިގާލީ މަރުހަލާގެ ކަންތައްތައް ކޮވިޑުގެ ސަބަބުން ލަސްވެގެން ދިޔަ ކަމަށެވެ. އެހެންނަމަވެސް މިހާރު ޕާޓީގެ އައު ލީޑަރޝިޕް އުފެދި، ހަރަކާތްތައް އިތުރަށް ފުޅާވެގެންދާނެ ކަމަށެވެ. ޕާޓީން ސިޔާސަތުތައް ކަނޑައަޅާނީ ރައްޔިތުންނާ މަޝްވަރާ ކުރުމަށްފަހު ކަމަށާއި, ރައްޔިތުންނާ ހަމައަށް ޕާޓީގެ ސިޔާސަތުތައް ހާމަކޮށްދިނުމަށް މަސައްކަތް ކުރައްވާނެ ކަމަށް ވެސް ވިދާޅުވިއެވެ.
ގައުމުގެ ހުރިހާ ކަމެއްގައި އަންހެނުންގެ ބައިވެރިވުން އޮންނަން ޖެހޭނެ ކަމަށާއި އެ އުސޫލުގެ ދަށުން އެމްއާރްއެމްގެ 50 އިންސައްތަ ހިއްސާވާނީ އަންހެނުންކަމަށް އެޕާޓީން ބުންޏެވެ. އަދި އެކްސްކޯގެ 30 އިންސައްތަ އަކީ ޒުވާނުން ކަމަށް ކަނޑައަޅާފައިވާ ކަމަށާއި, ޕާޓީން ޒުވާނުންނަށް ހުރި ދަތިތައް ހައްލުކުރުމަށް ކައިރިއިން މަސައްކަތް ކުރާނެ ކަމަށް ފާރިސް ވިދާޅުވިއެވެ. ޕާޓީން ކަންކަމުގައި ގޮތް ނިންމާއިރު ޒުވާނުންގެ ބަސް ހިމަނައިގެން ނިންމުންތައް ނިންމާނެ ކަމަށާއި ޕާޓީން ކުރިއަތް އޮތް ދުވަސްތަކުގައި އިތުރު ހަރަކާތްތައް ހިންގައި, މަސައްކަތްތައް އިތުރަށް ހަރުދަނާ ކުރުމަށް މަސައްކަތް ކުރައްވާނެކަމަށް ވެސް ފާރިސް ވިދާޅުވިއެވެ.
ޕާޓީގެ ޒަޢީމު, ކުރީގެ ރައީސް މައުމޫން ޢަބްދުލްޤައްޔޫމް މި ނޫސްވެރިންގެ ބައްދަލުވުމުގައި ބައިވެރިވެވަޑައިނުގެންނެވީ ކީއްވެގެންތޯ ނޫސްވެރިޔަކު ކުރި ސުވާލަށް ޖަވާބު ދެއްވަމުން ފާރިސް ވިދާޅުވީ މަސައްކަތް ރޭވިފައި އޮތް ގޮތުން މިހާރު ޕާޓީގެ ކަންކަމުގައި ހަރަކާތްތެރިވާނީ މިހާރުގެ ލީޑަރޝިޕުން ކަމަށެވެ. އަދި މަގުން ކައްސާލައިގެން ދާ ހިނދު ނޫނީ ލަފަޔެއް ބޭނުންވާ ހިނދު ޕާޓީގެ ޒަޢީމު ހުންނަވާނެ ކަމަށެވެ. ޕާޓީ ހިންގުމުގައި އަދި ސިޔާސަތުތައް ކަނޑައެޅުމުގައި ވެސް ދެން ހަރަކާތްތެރިވާނީ މި އައު ލީޑަރޝިޕުން ކަމަށް ފާރިސް ވިދާޅުވިއެވެ.
ހޮނިހިރު ދުވަހު އޮންލައިންކޮށް ކުރިއަށް ގެންދިޔަ ނެޝަނަލް ކޮންވެންޝަންގައި ޕާޓީގެ އަސާސީ ގަވާއިދާއި, ޕާޓީ ހިންގުމަށް ބޭނުންވާ ގަވާއިދުތައް ފާސްކޮށްފައިވެއެވެ.
ލީޑަރޝިޕް އިންތިޚާބު ކުރިއަށް ގެންގޮސްފައިވާއިރު، ޒަޢީމަކަށް ކުރީގެ ރައީސް މައުމޫން, ޕާޓީގެ ނާއިބުރައީސަކަށް ސަޒައިލް ސިޔާމް، ނާއިބުރައީސްގެ މަގާމުގެ އަންހެނުންގެ ޚާއްސަ ގޮނޑިއަށް އައިމިނަތު ނާދިރާ އިންތިޚާބު ކޮށްފައިވެއެވެ. އަންހެނުންގެ ކައުންސިލްގެ ރައީސަކަށް އާރިޒާ ރަޝީދު، ޒުވާނުންގެ ކައުންސިލްގެ ރައީސަކަށް އިބްރާހިމް ފަރުހާދު އިންތިޚާބު ކޮށްފައިވެއެވެ. އަދި އެގްޒެކެޓިވް ކޮމިޓީއަށް 10 ފިރިހެން މެމްބަރުންނާއި 10 އަންހެން މެމްބަރުން އިންތިޚާބު ކޮށްފައިވެއެވެ. މީގެ އިތުރުން އެގްޒެކެވި ކޮމިޓީއަށް ޒުވާނުންގެ ކައުންސިލް ތަމްސީލު ކުރާ 10 މެމްބަރުން އިންތިޚާބު ކޮށްފައިވެއެވެ. އެއީ އަންހެން 5 މެމްބަރުންނާއި ފިރިހެން 5 މެމްބަރުންނެވެ.
