އުޒްބެކިސްތާނުގެ ވެރިރަށް ޓަޝްކެންޓުގައި ކުރިއަށްދާ 12 ވަނަ ވޯލްޑް ބޮޑީބިލްޑިން އެންޑް ފިޒީކް ސްޕޯޓްސް ޗެމްޕިއަންޝިޕް 2021 އިން ރާއްޖޭގެ އަޒްނީން ރަޝީދާއި، ހުސެއިން ހިމްޔާން ލޯ މެޑަލް ހޯދައިފިއެވެ.

އަންނަ ބުރާސްފަތި ދުވަހުގެ ނިޔަލަށް ކުރިއަށްދާ މި މުބާރާތުގައި ރާއްޖޭގެ ހަ ބޮޑީބިލްޑަރުން އަންނަނީ ވާދަކުރަމުންނެވެ. އެއީ އަޒްނީން އާއި ހިމްޔާނުގެ އިތުރުން މުޙައްމަދު މޫސާ އާއި، މުޙައްމަދު ރަޝީދާއި، ފަތުހުﷲ މުޙައްމަދު އަދި އިބްރާހީމް ނަބީލެވެ.

މި މުބާރާތުން އަޒްނީން ލޯ މެޑަލް ހޯދާފައިވަނީ މެންސް ސްޕޯޓްސް ފިޒީކުގެ 170 ސެންޓިމީޓަރު ބައިންނެވެ. މި ފަހަރުގެ މުބާރާތުން އަޒްނީން ލޯ މެޑެއްޔެއް ހޯދިއިރު، ދެކުނު ކޮރެއާގައި 2019 ވަނަ އަހަރު ބޭއްވި 11 ވަނަ ވޯލްޑް ބޮޑީބިލްޑިން އެންޑް ފިޒީކް ސްޕޯޓްސް ޗެމްޕިއަންޝިޕުގައިވެސް އޭނާ ވަނީ ހަމަ މި ކެޓަގަރީން ލޯ މެޑަލް ހޯދާފައެވެ.

މީގެ އިތުރުން މި ފަހަރުގެ މުބާރާތުގައި ރާއްޖޭގެ ހިމްޔާން ލޯ މެޑަލް ހޯދީ މެންސް އެތުލެޓިކް ފިޒީކުގެ 175 ސެންޓިމީޓަރު ބައިންގައި ވާދަކޮށްގެންނެވެ. މިއީ ބައިނަލްއަގުވާމީ މުބާރާތާކުން ހިމްޔާން ހޯދި ފުރަތަމަ މެޑެއްޔެވެ.

އަންގާރަ ދުވަހު އަޒްނީން އާއި ހިމްޔާން ހޯދި ދެ ލޯ މެޑެއްޔާއެކު، މި ފަހަރުގެ ދުނިޔޭގެ ބޮޑީބިލްޑިން މުބާރާތުން ރާއްޖޭން ވަނީ ޖުމްލަ ހަތަރު މެޑަލް ހޯދާފައެވެ. އެގޮތުން ހޯމަ ދުވަހު ރާއްޖޭގެ މުޙައްމަދު މޫސާ ވަނީ 55 ކިލޯގެ ސީނިއާ މެންސް ބޮޑީބިލްޑިން ކެޓަގަރީން ރިހި މެޑެއްޔެއް ހޯދާފައެވެ. އަދި މި ފަހަރުގެ މުބާރާތުގައި ރާއްޖޭގެ މުޙައްމަދު ރަޝީދު ވަނީ 65 ކިލޯގެ ސީނިއާ މެންސް ބޮޑީބިލްޑިން ކެޓަގަރީން ރިހި މެޑެއްޔެއް ހޯދާފައެވެ.

މި އަހަރުގެ ދުނިޔޭގެ މުބާރާތުގައި ރާއްޖޭގެ ހަ ބޮޑީބިލްޑަރުން ވާދަކުރަމުން އަންނައިރު، މި މުބާރާތުގައި ވާދަކުރާ ގައުމީ ޓީމު އެކުލަވާލާފައިވަނީ މި އަހަރުގެ ޖުލައި މަހުގެ 16 ވަނަ ދުވަހު ބޭއްވި ސިލެކްޝަނުންނެވެ. މި ޓީމުގެ ކޯޗަކީ އަބްދުލް ހަސީބު ހުސެއިންއެވެ. އަދި ޓީމުގެ މެނޭޖަރަކަށް ހަމަޖައްސާފައިވަނީ ރާއްޖޭގެ ބޮޑީބިލްޑިން ފެޑެރޭޝަން (ބީބީއޭއެމް) ނައިބު ރައީސް އަޙްމަދު އައިމަނެވެ.