އެއްބަސްވުން އާކުރުމުގެ ވިސްނުމެއް ނެތް: އެމްބާޕޭ

ޕީއެސްޖީއާއެކު ހަދާފައިވާ އެއްބަސްވުން އާކުރުމުގެ ވިސްނުމެއް ނެތް ކަމަށް އެ ޓީމަށް ކުޅެމުން އަންނަ ޒުވާން ތަރި ކީލިއަން އެމްބާޕޭ ބުނެފިއެވެ.

ޕީއެސްޖީއާއެކު އެމްބާޕޭ ހަދާފައިވާ ކޮންޓްރެކްޓްގައި ބާކީ އޮތީ ނުވަ މަހެވެ. ނިމިދިޔަ ޓްރާންސްފަރ މާކެޓުގައި ސްޕެއިންގެ ގަދަ ބާރު ރެއާލުން ވަނީ އެމްބާޕޭ ގަތުމަށް ތިން ބިޑެއް ކޮށްފައެވެ. އެކަމަކު ޕީއެސްޖީން ވަނީ އެ ތިން ބިޑުވެސް އަނބުރާ ފޮނުވާލާފައެވެ. ރިޕޯޓްތައް ބުނާ ގޮތުން ޖެނުއަރީ މަހު އެމްބާޕޭ ރެއާލާއެކު ޕްރީ އެގްރިމެންޓެއްގައި ސޮއިކުރާނެއެވެ. އެއީ ޖުލައި އެއްވަނަ ދުވަހު އެޓީމާ ގުޅޭ ގޮތަށެވެ.

އުމުރުން 22 އަހަރުގެ އެމްބާޕޭ ގަތުމަށް ރެއާލުން އެންމެ ފުރަތަމަ ހުށަހެޅީ 160 މިލިޔަން ޔޫރޯގެ ބިޑެކެވެ. އޭގެ ފަހުން ބޯނަހާއެކު ޖުމްލަ 180 މިލިޔަން ޔޫރޯގެ ބިޑެއް ހުށަހެޅިއިރު، މިއީ ޕީއެސްޖީން 2018 ވަނަ އަހަރު އެމްބާޕޭގެ އެއްބަސްވުން ދާއިމީ ކުރަން މޮނާކޯއަށް ދެއްކި އަދަދާ ދާދި އެއް އަދަދެކެވެ.

ފްރާންސްގެ ނޫހަކަށް ދިން އިންޓަރވިއުއެއްގައި އެމްބާޕޭ ބުނީ އޭނާ ފުރަތަމަ ބޭނުންވީ ހިލޭ ޓްރާންސްފަރ އެއްގައި ކްލަބް ދޫކޮށްލަން ޖެހޭގޮތްނުވެ އޭގެ ކުރިން ޓީމުން ދިޔުމަށް ކަމަށެވެ. އަދި ޕީއެސްޖީއަށް އޭނާގެ ނިންމުން ސާފުވާނެ ކަމަށް އެމްބާޕޭ ބުންޏެވެ. އެމްބާޕޭ ބުނީ އޭނާ ޕީއެސްޖީ ދޫކޮށްލަން ބޭނުންވާކަން ޖުލައި މަސް ނިމުމުގެ ކުރިން އެޓީމަށް އަންގާފައިވާނެ ކަމަށެވެ. އަދި އެއީ އޭނާ ޕީއެސްޖީ ދޫކޮށްދާއިރު، އެޓީމަށް ކޮލެޓީ ރަނގަޅު ކުޅުންތެރިއެއް ގަތުމަށް ފައިސާ ލިބޭނީ އެގޮތަށް ކަމަށްވާތީ ކަމަށްވެސް އެމްބާޕޭ ބުންޏެވެ.

އެމްބާޕޭ ބުނީ ޕީއެސްޖީ ދޫކޮށް އޭނާ އެހެން ޓީމަކަށް ބަދަލުވާނަމަ އެ ޓީމަކަށްވާނީ ރެއާލް މެޑްރިޑް ކަމަށެވެ. މީގެ ކުރިން ވެސް އެމްބާޕޭ ވަނީ ރެއާލަށް ކުޅެން ބޭނުންވާކަމަށް ބުނެފައެވެ.

އެމްބާޕޭ ވަނީ މިހާތަނަށް ޕީއެސްޖީއަށް ކުޅެދިން 182 މެޗުން 136 ލަނޑު އެޓީމަށް ކާމިޔާބު ކޮށްދީފައެވެ.