ޔާމީން ފަނޑިޔާރުންނަށް: ނިޔާގެ މުގުރު ނަންގަވާއިރު ވިސްނަވާ، ދައުލަތުން އަދުލުގެ ނިޒާމަށް އަތް ބާނާ
5 އޮކްޓޯބަރު 2021 | އަންގާރަ 06:37ޔާމީނު ވަނީ މީގެ ކުރިން ޝަރީއަތުގެ އަޑުއެހުންތަކުގައި ދެއްކެވި ވާހަކަތައް ތަކުރާރު ކުރައްވާފައި
ރައީސް ޔާމީނުގެ ޖަލު ޙުކުމުގެ އިސްތިއުނާފު އަޑުއެހުން ސުޕްރީމް ކޯޓުގައި މިހާރު ކުރިއަށްދޭ
ދައުލަތުގެ ފަރާތުން އަދުލުގެ ނިޒާމަށް އަތްބާނާ ކަމަށް ވިދާޅުވެ ކުރީގެ ރައީސް އަބްދުﷲ ޔާމީނު އެކަމުގެ ކަންބޮޑުވުން ފާޅު ކުރައްވައިފިއެވެ.
ރައީސް ޔާމީނު އެ ކަންބޮޑުވުން ފާޅު ކުރައްވާފައިވަނީ އަންގާރަ ދުވަހު ސުޕްރީމް ކޯޓުގައި މި މައްސަލައާ ގުޅިގެން ކުރިއަށްދިޔަ އަޑުއެހުމުގައި ވާހަކަ ދައްކަވަމުންނެވެ. އެގޮތުން ރައީސް ޔާމީނު ވަނީ ފަނޑިޔާރުން "ނިޔާގެ މުގުރު ނަންގަވާއިރު" ވިސްނާވަޑައިގަންނަވަން ޖެހޭ ކަންކަން ހުރިކަމަށް ވިދާޅުވެ، މީގެ ކުރިން ޝަރީއަތުގެ އަޑުއެހުންތަކުގައި ދެއްކެވި ވާހަކަތައް ތަކުރާރުކުރައްވާފައެވެ. އެގޮތުން ގިނަ ދުވަސްތަކެއް ވަންދެން ޖަލު ޙުކުމް ތަންފީޒު ކުރައްވާފައިވާކަން ފާހަގަކުރައްވައި ރައީސް ޔާމީނު ވަނީ އެމަނިކުފާނުގެ ޝުއޫރުތައް އަޑުއައްސަވާލެއްވުމަށް ފަނޑިޔާރުންގެ ކިބައިން އެދިވަޑައިގެންފައެވެ. އެގޮތުން ތަހުގީގު މަރުޙަލާގައި ވޮޑަމުލާއާ ގުޅޭ ސުވާލެއް ކޮށްފައި ނުވާ ކަމަށާއި، އަދީބާއި ޒިޔަތުގެ ހެކިބަހާ ގުޅިގެން ދައްކަވަމުން ގެންދެވި ވާހަކަފުޅުތައް ރައީސް ޔާމީނު ވަނީ ތަކުރާރު ކުރައްވާފައެވެ.
ރައީސް ޔާމީނު ވިދާޅުވީ، އެމަނިކުފާނުގެ ޙައްޤުތަކެއް ގެއްލިފައިވާ ކަމަށާއި، އެމަނިކުފާނު ފްރޭމް ކޮށްފައިވާ ކަމަށެވެ. އެގޮތުން ފްރޭމް ކުރުން ފެށިފައިވަނީ ކްރިމިނަލް ކޯޓުގެ މަރުޙަލާއިން ފެށިގެންކަން ވެސް ރައީސް ޔާމީނު ފާހަގަކުރެއްވިއެވެ. ޔާމީނު ވަނީ މި މުޅި މައްސަލަ "މަކުނު ވާ ފުރާފައި" އޮތްކަމަށް ސިފަ ކުރައްވައި، އެ ވާތައް ސާފު ކުރައްވައި، ސުޕްރީމް ކޯޓުގެ ފަނޑިޔާރުންނަށް ވެސް އެކަންކަން ސާފުވާން ޖެހޭކަން ބަޔާން ކުރައްވާފައެވެ. އަދި ދައުލަތުން އަދުލުގެ ނިޒާމަށް އަތް ބާނާކަމަށް ރައީސް ޔާމީނު ވަނީ ތުހުމަތު ކުރައްވާފައެވެ.
ރައީސް ޔާމީނުގެ ވާހަކަފުޅުގައި ތަކުރާރުކޮށް އެމަނިކުފާނުގެ ޝުއޫރު އަޑުއެއްސެވުމަށް އެދިވަޑައިގެންފައިވާތީ ފަނޑިޔާރު މަހާޒް އަލީ ޒާހިރު ވިދާޅުވީ، ފަނޑިޔާރުން ގޮތް ނިންމަވާއިރު ޝުއޫރާއި ޖަޒުބާތަކަށް ނުބައްލަވާނެ ކަމަށެވެ. އަދި ބައްލަވާނީ ޤާނޫނީ ނުކުތާތަކަށް ކަން ފަނޑިޔާރު ފާހަގަކުރެއްވިއެވެ.
ރައީސް ޔާމީނު މީގެ ކުރީގެ އަޑުއެހުންތަކުގައި ވެސް ވަނީ އެ ވާހަކަތައް ތަކުރާރު ކުރައްވާފައެވެ. އެގޮތުން ރައީސް ޔާމީނު ވަނީ އެމަނިކުފާނަށް ލިބިވަޑައިގެން ފައިސާއާ ގުޅޭގޮތުން ވެސް ވާހަކަ ދައްކަވާފައެވެ. އެގޮތުން ދައުލަތުން ހުށަހެޅި އެއްވެސް ލިއެކިއުމެއްގައި އެމަނިކުފާނު އެ ފައިސާ ހޯދުމަށް އެސްއޯއެފްގައި އެދިފައިވާކަމަށް ފެންނަން ނޯންނާނެކަން ފާހަގަކުރައްވައި ރައީސް ޔާމީން ވިދާޅުވީ، އެއްވެސް އިރަކު އެމްއެމްޕީއާރްސީގެ ފައިސާ ހޯދުމަށް އެދިވަޑައިގެންފައިނުވާނެ ކަމަށެވެ. އަދި އަދީބު ގާތުގައި އެދިވަޑައިގަތީ އެމަނިކުފާނުގެ އަމިއްލަފުޅު ފައިސާ އަނބުރާ ދެއްވުމަށްކަމަށް ރައީސް ޔާމީނު ވިދާޅުވިއެވެ. އެގޮތަށް އަދީބު ގާތުގައި އެދިވަޑައިގަތީ ވެސް ރިޔާސީ ލޯންޗުކޮޅު ގޮއްވާލުމުގައި އަދީބުގެ ބަައިވެރިވުން އޮތްކަމަށް އެނގިވަޑައިގަތް ހިސާބުންކަމަށް ޔާމީން ވިދާޅުވިއެވެ.
ރައީސް ޔާމީނުގެ ފަރާތުން އިސްތިއުނާފު ކޮށްފައިވާ މައްސަލަ ނިމުމަކާ ގާތްވެފައިވާއިރު، މި މައްސަލައިގައި ރައީސް ޔާމީނުގެ ފަރާތުން 22 އިސްތިއުނާފީ ނުކުތާއެއް ވަނީ ހުށައަޅުއްވާފައެވެ.
